الموضوع: هحكي تجربتى كاملة مع مدرسة المرور

السلام عليكم

انا النهارده جى احكيلكم تجربتى كامله مع مدرسة المرور من اول ما رحت اقدم لحد ما طلعت الرخصه
مبدئيا انا بسوق بس على قدى يعنى ممكن امشى بالعربية اطلع وارجع وكده بس اتجاهاتى مش مظبوطه اوى عشان كده لازم يبقا حد جنبى وانا سايق عشان يلحق الدركسيون بمعنى تانى ممكن اكون عايز اجى يمين شوية صغيرين فممكن الاقى نفسى رحت يمين بزياده والعكس
المهم انا مش معايا عربيه بس ناوى ان شاء الله اشترى قريب ودعواتكم معانا
فقررت انى اطلع رخصه وكان اسهل حل انى اطلعها من مدرسة المرور بس طبعا لسه هتعلم تانى

نبدأ خطوة خطوة

اولا رحت مستشفى قلتلهم انا عايز اطلع شهادة باطنة ونظر للرخصه قالولى الشهاده ب 10 جنيه وعايزين صورتين اديتهم الفلوس والصور ادونى ورقتين فاضين قالولى ودى واحده فى الباطنه وواحده فى العيون ووقفت حوالى 10 دقايق واخدت الشهادتين مختومين طبعا من غير كشف ولا اى حاجه

ثانيا روحت تانى يوم من الصبح على المرور كنت هناك الساعه 9 كده سالت عايز اقدم مدرسة لحد ما وصلت للشباك لقيت الشباك فاضى والحمد لله قولت للراجل عايز اقدم مدرسة قالى هات 300 جنيه وصورة وصورة البطاقة اخدهم قالى عايز تتدرب الشهر ده ولا الشهر اللى جاى عشان احنا كنا يوم 17 فى الشهر قولتله لو ينفع الشهر ده ماشى قالى اه ينفع وطلعلى وصل ب 300 جنيه ووصل كده مكتوب فيه مواعيد التدريب واسم المدرب وقالى تروح مكان التدريب سبت واتنين واربع الساعه 9 الصبح قولت ماشى

ثالثا روحت مكان التدريب يوم الاتنين من بدرى واستنيت المدرب لحد ما جه بالسلامه كنا 3 افراد قال لواحد اركب على الدركسيون والاتنين التانين ورا ماشى ياعم ركبنا انا كنت ورا لحد ما جه دورى وكنت اخر واحد هسوق المهم ركبت جنبه قالى بتعرف تسوق قولتله على قدى قالى طب اطلع كده طبعا المكان عباره عن ارض مستطيله فاضيه بنلف حواليها لفيت حوالى 5 او 6 مرات وهو قاعد يدردش معايا اسمك ايه ومنين وبتشتغل ايه وحاجات زى كده وطبعا فى وسط الدردشة ظبطتو كده ب 20 جميلة.
قالى انت تنزل من العربيه تصور الوصل بتاع المدرسة صورتين و تطلع على المرور تحجز اختبار الكمبيوتر قولتله ياعم ديه اول حصه ليا قالى منا عارف قولتله انا مش بعرف اسوق اوى ومش هعرف انجح قالى مالكش دعوه انا هكون معاك فى الامتحان وهتنجح ان شاء الله يلا انزل بسرعه عشان تلحق المرور

رابعا رحت المرور كانت الساعه 10 تقريبا سألت على الشباك ووصلت الراجل قالى انزل اشترى نموذج امتحان نظرى وعملى من تحت نزلت اشتريتهم من المرور من شباك مكتوب عليه النماذج وكانوا ب 9.5 جنيه وبعدها عرفت من الناس اللى بتقدم وراقها عشان تمتحن ان هشترى ملف من الراجل اللى بره قدام المرور وحط فيه الورق اللى راجل هيقولى عليه

خامسا طلعت للراجل بره ياعم عايز ملف رخصه خاصه طلعلى ملف ابيض مكتوب عليه ادارة المرور وقالى هات نموذج الامتحانات وصورتين وصورتين بطاقه والشهادات الصحيه والمؤهل وكمان صورة وصل المدرسة الابيض اللى مكتوب فيه المواعيد واسم المدرب فى نقطه هنا فى المؤهل انا كان معايا شهادة المؤهل بس بطاقتى مثبوت فيها المؤهل مكتوب فيها حاصل على بكالوريوس ....... فالراجل رجعلى شهادة المؤهل تانى وقالى متديهاش لحد لان مؤهلك مكتوب فى البطاقه ودبسلى الاوراق ديه فى بعض وحط صور البطاقه فى الاول وصورة وصل المدرسه على طول علشان يعرفوا انى مدرسة وحطلى كام طابع بريد واخد 5 جنيه وقالى تروح تمضى صورة البطاقه من ظابط التراخيص وتروح تانى على شباك مراجعة الرخص الخاصه طبعا وقفت فى طابور قدام الظابط ومضالى على صورة البطاقه ملحوظه هو بيمضى على شهادة المؤهل بس انا برده عشان مؤهلى مثبوت فى البطاقه فمضا على صورة البطاقه
طلعت للشباك تانى لقيته فاضى قولت ياسلام ايه الجمال ده ويافرحه ما تمت
الراجل قالى روح وتعالا يوم السبت الصبح يعنى مش هتاخد الورق قالى يوم السبت الصبح

سادسا روحت يوم السبت الصبح الساعه 8.45 لقيت طابور طويل عريض واقف على الشباك قولت مش مشكله اخد دورى فى الطابور ووقفت فضلنا وقفين لحد الساعه 10 تقريبا مخرجتش من الطابور غير 5 تقريبا بعدها الراجل اخد 5 ملفات كمان مره واحده وقالنا انا كده خلصت اصحاب الملفات اللى اخدتها يستنوا والباقى يروح ويجى بكره الصبح طبعا انا اتجننت
الناس بدأت تمشى وانا دخلتله على الشباك قولتله ازاى يعنى اللى انت بتقوله ده قالى انا ليا 25 ملف فى اليوم وبس قولتله ازاى وواقف فى الطابور اكتر من 100 واحد وانت مأخدتش غير حوالى 10 ملفات قالى هو ده اللى عندى بصراحه اتعصبت وابتدا صوتى يعلا شويه وخصوصا ان وانا واقف اكلمه جاله اتنين من جوا صباح الخير يا استاذ فلان خد الملفات ديه قاله ده انا خلصت النهارده قالولوا معلش وعشان خطرنا فاخدهم طبعا انا اتجننت اكتر زعقت معاه المهم فى ظابط قالى فى ايه قولتله على اللى حصل قاله خد 10 ملفات كمان وخلاص ومتخدش من حد تانى فالراجل اخد منى الملف ومن 3 او 4 افراد كمان وقالنا استنوا على ما انده على اسمكم نده اسمى واخد ورقى وبص فى البطاقه وقالى تعالا بكره الصبح امتحن كمبيوتر

سابعا رحت تانى يوم الساعه 8.30 عشان امتحن كمبيوتر الراجل بتاع الكمبيوتر قالنا هنبدأ الامتحان الساعه 11 طيب خلينى قاعد بقا المهم هو بدأ الامتحان على الساعه 10.15 دخلت امتحان الكمبيوتر بتقعد قدام شاشة كمببيوتر وفى شاشة تانيه قدام الموظف والسؤال بيتكتب على الشاشة وبيتنطق كمان والراجل قدامه ماوس وانت قدامك 3 زراير 1 و 2 و 3 وبتضغط على رقم الاجابة الصح
طبعا انا مكنتش بلحق اقرا السؤال او اسمعه لان اخونا الموظف راجل متعاون جدا اول لما بيسمع اول كلمتين من السؤال بيشاورلك بالماوس على الاجابة الصح وانت تضغط ولو اتاخرت ثانيه يقولك اخلص
المهم خلصت قالى انزل فى الحوش تحت استنا امتحان السواقه نزلنا كلنا اتجمعنا وحوالى الساعه 12 بدأوا يجهزوا للامتحان حطوا العساكر او الاراطيس اللى هنعدى منها وجابوا الورق بتاعنا كل واحد ياخد ورقه واللى مش تبع المدرسه يروح يدفع 20 جنيه رسوم استخدام عربية المرور

جه المهندس وهو راجل لابس مدنى اخد مننا الورق تانى وبينده واحد واحد بالاسم تروح توريه بطاقتك ووصل المدرسه لو انت مدرسه وبعدين تروح تركب العربيه هما طبعا امتحنوا اللى مش مدرسة الاول
وجه الدور عليا ورحت ركبت العربيه وطبعا كنت مجهز 20 جنيه المتينه للراكب جنبى اول ما ركبت العربيه وقفلت الباب لقيت العربيه طلعت لوحدها بسم الله ماشاء الله الراجل اللى جنبى قالى ركز معايا اكسر الدركسيون شمال للاخر ودوس سنة بنزين صغيره وقد طلعت من اول عسكريين ودخلت بين العسكريين اللى فى النص قالى اعدل كله يمين وسنة بنزين عشان العربيه متقفش وعملت طلعت من بين العسكرين دول ودخلت بين اخر عسكريين ببوذ العربيه قالى اقف وقفت الراجل كتر خيره كمان ام جايب المارش وقالى اكسر الدركسيون كله شمال وسنة بنزين نفذت قالى اعدل واحده واحده يمين وبعدين اكسر يمين للاخر لحد ما رجعت مكانى قالى انزل مع السلامه وتعالا بكره اتصور

ثامنا روحت تانى يوم الصبح بدرى عشان اتصور دخلت على شباك الرخص الخاصه ياعم انا امتحنت امبارح قالى هات بطاقتك وطلع الملف بتاعى وعملى ورقتين كده بالكربون وقالى روح ادفع فى الخزنه وهات ملف ابيض فى 4 صور حافظة ضرايب وصورة شخصيه وصورة بطاقه من قدام المرور قولتله حاضر رحت دفعت 55 جنيه فى الخزنه وادانى وصل ونزلت قولت للراجل اللى قدام المرور عايز ملف عشان اتصور رخصه خاصه ادانى نفس الملف الابيض اللى مكتوب عليه ادارة المرور جواه 4 ورقات اسمهم حافظة ضرايب ودبس الورق مع صورتى مع صورة البطاقه وكام طابع بريد واخد 5 جنيه ورجعت للراجل تانى على الشباك اديته وصل الخزنه والملف قعد هو يعمل شوية حاجات كده وقالى روح عند اوضة التصوير وهيندهوا على اسمك وفعلا رحت استنيت حوالى ساعه ندهوا على اسمى واتصورت وبعدها بنص ساعه اخدت الرخصه وروحت باركولى بقا

اسف جدا للاطاله بس كنت عايز احكيلكم بالتفصيل لانى كنت بدور على التفاصيل ديه قبل ما اروح المرور هنا على المنتدى وعلى النت ولقيت بس ايه الاوراق المطلوبه ونظام الاختبار سواء النظرى او السواقه بس مش لقيت تفاصيل

المشاركة الأصلية كتبت بواسطة ahmedalaahosny

يادين النبي كل ده عشان الرخصه علي كده كنت واخد لها اجازه اسبوع !!!

هو انا فعلا اخدت اجازه حوالى اسبوع وكمان المرور زحمة جدا الايام ديه بسبب موضوع ترخيص الموتسكلات عشان فى حملات عليهم دلوقتى هما طبعا فى شبابيك تانيه بس عاملين زحمه فى المرور كله