نقر فى دواسة الدبرياج

**michohat** · 01-10-2008 04:31 PM

السلام عليكم ورحمه الله وبركاته
عيد فطر سعيد و ان شاء الله ربنا يتقبل صيامنا وصالح اعمالنا ان شاء الله

معرفش العربية ليها مزاج تعملها فى كل مرة يكون فيها مناسبة والصنايعيه قافلين

المهم لاحظت فى طلعه العربية ان دواسة الدبرياج زى ما يكون فيها نقر من تحت وش رجلى
والنقر ده مش بيظهر على طول ساعات وساعات
واغلب المرات اللىبلاحظها فيه لما بكون بلف بالعربية ولسه هطلع بيها
ده عادى ينفع اسافر بيها ولا فى مشاكل وخصوصا ان العيد الصنايعيه كلهم قافلين

**ahmedsrs** · 01-10-2008 05:56 PM

ينفع بس شيل معاك سلك دبرياش احتياطى

**michohat** · 01-10-2008 06:28 PM

شكرا على سرعه الرد بس عاوز اعرف النقر ده من ايه

**ahmedsrs** · 02-10-2008 03:20 AM

النقر ده غالبا ولآن السلوك الدبرياش فى السوق مضروبة نتيجة وجود حلقة زنق او شفة فى السلك من عند الفرش مع الضغط المتكرر نتبتدى طقطم او تتحرك من مكانها

**michohat** · 02-10-2008 03:32 PM

شكرا ومنعا للمشاكل ركنتها وقضيتها فى العيد مواصلات كده احسن من وجع الدماغ وانها تعملها والاسرة معايا
الا ان شاء الله بعد العيد لما اروح للميكانيكى ازاى اظهر له العيب علشان يصلحه وخصوصا ان الصوت اللى بيحصل ده مش دايما بيظهر وله اوقات اوقات

**MohabSaeed** · 13-10-2008 10:54 PM

العيب ده كان بيحصل معايا و حل المشكله ان السلك مكانش متثبت كويس و بيتأثر بحركه الموتور . و الميكانيكى ثبته .

**michohat** · 15-10-2008 11:20 PM

رحت للميكانيكى وبيقول لى مفيش حاجه وركب العربية وجرب بس انا بحس بيها معرفش بقى بيتهيأ لى ولا ايه
معلومه تانيه رحت اظبط الزوايا لقيت الراجل بيقول لى اسكترا الدركسيون بتتحرك من مكانها وروح للعفشجى يثبتها لك رحت للعفشجى غير كاوتشات ف الاكسترا و كان عامود الدركسيون عالى ومأثر على الكلاكس فرجعت تانى للعفشجى ونزله والكلاكس اشتغل بس لما بلف الدركسيون مش بيشتغل فقال لى دى شغله الكهربائى يعلى الريش
المهم بعد ما غير كاوتشات الاكسترا لاحظت ان عمود الدركسيون زى ما يكون فيه حركه لفوق ولتحت مع انى مثبت البكرة اللى تحت الطارة كويس بس لو هزيت الطارة لفوق ولتحت بتلاقيها بتتحرك معاك وتحس ان العمود بيتحرك فوريتها للعفشجى قالى ده بوش ومفيش فيه مشكله؟
معلش يا جماعه انا عارف انى غلست بس العربية دى بتعاندنى مع انى بحترمها ومش ناوى استغنى عنها

**MohabSaeed** · 16-10-2008 12:09 AM

ماهو للاسف معظم الميكانيكيه لما بيركبو العربيه يقولولك مافيش حاجه , لازم ميكانيكى شاطر جدا و فاهم فى العربيه و يكون اشتغل فيها علاشان يعرف يحدد العيب " انا بعانى من المشكله ديه برده "

بالنسبه للنقر الى فى الدبرياج ده زى ماقت لحضرتك السلك بيبقى مريح على الموتور من تحت او مريح على قاعده الموتور و علاشان كده بيتهز و ده انتا بتحس بيه فى صوره نقر فى الدواسه , ده الى كان بيحصل معايا .

بس لو النقر ده خفيف اوى و مش ملحوظ يبقى مافيش مشكله

موضوع الدركسيون الى مش ثابت و بيتحرك من مكانه عندى برده فى عربيتى بس مش مؤثر على حاجه لغايه دلوقتى , و مش باين اوى , بس العفشجى قالى من الاخر غير علبه الدركسيون . بس فعلا الموضوع بالنسبالى مش محسوس اوى .

عاوز اقولك نصيحه اخويه بجد حاول انك تقلل زياراتك للميكانيكيه او للصنايعيه بقدر الامكان ...... لانهم كل مايصلحو حاجه بيبوظو حاجه , طلاما العربيه ماشيه كويس بلاش حد يلعب فيها . لانه لازم يخرب حاجه جمب الحاجه الى بيشتغل فيها .

**michohat** · 16-10-2008 12:48 AM

ممكن فعلا النقرة تكون من السب ده لانى كنت بحس انها ناتجه عن حاجه بتدور لان ليها تتابع زمنى ثابت
تعرف يا استاذ MohabSaeed نفسى اضبط العربية زى الضبطه اللى كانت عليها قبل ما اقل بعقلى واجددها من ساعه ما رجعت و العيوب بتظهر قدامى زى الرز وده بيرجع لقله خبرتى اللى بحاول ازودها عن طريق المعلومات اللى بعرفها من الاصدقاء فى المنتدى

**MohabSaeed** · 16-10-2008 02:11 PM

للاسف يا استاذ مجدى .انعدام الخبره و قله الضمير من الصنايعيه هما الى عملو كده .
بس ماتقلقش كل حاجه بتتصلح و الحاجات الى باظت فى عربيتك ممكن تجيبها من عزبة شلبى زى ماقتلتك قبل كده او بورسعيد .
بس المشكله انك لما تيجى تعيد تصليح اخطاء الغير بتتكلف فلوس ازيد من انك تصلح العيب نفسه .

امشى بالعربيه شويه لغايه ماتجمع مبلغ و اشتغل فى العربيه جزء جزء

عفشه , ميكانيكه , كهرباء , سمكره و دهان , القطع و البلاستيكات الى ناقصه جوه العربيه .

اهم ما فى الموضوع انك تكون واثق 100 % من الصنايعيه الى بترحلوهم ... حتى لو بعيد عنك او اغلى فى المصنعيه .
حاول تعرف من الخوانا فى المنتدى احسن الورش فين و مين الصنايعيه الثقه الى فاهمين فى شغلهم كويس .

نصيحه ماتسيبش العربيه لحد و هو يمسكلهالك مقاوله من اولها لاخرها . اقف بنفسك على كل حاجه .

اعمل خطه اصلاح للعربيه و شوف كل حاجه فى العربيه و قيمها و هل محتاجه تتغير ولا نص نص او سليمه من اقل حاجه لاكبر حاجه .
" كاوتش , مساعدين , عفشه , فرامل , فوانيس , اكصدامات و شبكه و بكيتات الاجناب و البادجات ,,, الميكانيكه , الكربراتير , الدربياج ,,,,,,, الرفايع و الكماليات , زى القايم البلاستك الى مكسور عندك و البلاستيكات الى ناقصه فى التبلوه او الابواب ,,,,,, و انزل شوف ورش الدهان الكويسه و شوف شغلهم الاول كويس ولاوحش , و ماتسترخش لان لو الدهان ردئ بيدى للعربيه شكل سئ غير انه بيبوظ بسرعه " اسأل مجرب " .

بس زى مقولت لحضرتك الموضوع للاسف مُكلف و متعب , لو عاوز تعمل شغل صح .