الموضوع: <<< اللهم اجرنا في مصيبتنا واخلف لنا خيرا منها - إنا لله وإنا إليه راجعون >>>

المشاركة الأصلية كتبت بواسطة lena jo

الف مبروك لحضرتك يا شيخ خالد و ربنا يعوض عليك الفلوس . طبعا حضرتك شفت ان الفلوس اسهل حاجة في الموضوع . في بلد زي بلدنا الحبيب إستخراج اتفه و أسهل ورقه بيكون بطلوع الروح و لازم أجازة و حاجة تقرف. انا صورت البطاقة و كارنيه النقابة و ماشيه بالصور . لو احتجت الاصل باشيله فقط وقت الاحتياج اليه . اما الرخصه فباخذها فقط لو خرجت بالسيارة و مش بسيبها ابدا في السيارة . معي فقط كارنيه النادي الاصلي لانه الوحيد السهل استخراجة و طبعا اي كارنيه او ورق مهم مش في المحفظة لانها لو اتسرقت تبقي مشكله. دي نصيحة مهمه.
أما الشرطة فمش عارفه اقول فيهم ايه كنت بادعي ربنا ينفخ في صورتهم و يرجعهم اقوياء بعد مأستهم في 25 يناير لكن للاسف بئس الرجوع. خلاص محاربة الارهاب الوهمي هو شغلهم الشاغل و الارهاب الحقيقي سايبينه. هي مش السرقه بالاكراه دي ارهاب؟ و سرقة السيارات اللي الناس دفعه فيها دم قلبها دي ارهاب و سرقة الشنط و تثبيت الناس ده ارهاب. انا جارتي كانت في جيم في منطقة زحمه و عارفينها و خرجت ملقتش السيارة و طبعا لما بلغت قالولها في القسم اتفاهموا مع السارق لو اتصل. طبعا هي كانت سايبه الرخصة في السيارة. ففعلا اتصلوا لكن طلبوا مبلغ كبير و لم يصلوا لتفاهم الا ان اغلقوا الموبيل و انقطع الاتصال و بالصدفه مسكوهم في الاسكندريه و هما رايحين يفكوا العربية. يعني لما الناس خلاص عرفت ان الشرطه ملهاش دعوة بسرقة السيارات تفتكر فيه حد هيخاف يسرق. ما شاء الله سرقة السيارات بقت مهنه مضمونة العواقب و مش هيتعب في بيع و لا حاجه هي الفديه و خلاص. ربنا ينتقم منهم كلهم.انا الحمد لله باخرج للشغل فقط بباص الشغل و زهقت .حاسه اني في بلد حراميه و حتي لو مخرجتش محدش ضامن ...العربيات بتتسرق من تحت البيت و الناس كمان احيانا بتتثبت قدام بيتها. ربنا يستر . أصبحنا في بلد حراميه و عصابات مش عارفه الشرطة عاجبهم الوضع ده ازاي . شباب الجامعة في السجن عشان شوية مظاهرات او حتي شغب و المجرمين بيرتعوا براحتهم . حاجة تقرف.
اما الجانب المضئ في الموضوع ان ان شاء الله حضرتك تاخذ اجر الصابرين و الاحتساب و ايضا اخذت بالاسباب و طبعا الشخص الطيب الامين اللي كلف نفسه و رجعلك الاوراق تسببت انه ياخذ اجر ان شاء الله هو ايضا و كمان دفعت له صدقة يعني حسنات لك و لغيرك و كمان اجر الصابرين ان شاء الله علي الاحتمال و المعاناه مع البيروقراطية العقيمه لكن ربنا انقذك منها الحمد لله. ربنا يحمينا جميعا و يبعد عنا جميعا كل شر.

الله يبارك في حضرتك أختي الكريمة , وإن شاء الله , يخلف عليّ ربي خيراً مما سُرق مني

وجزاكِ الله خيرا على هذه الفكرة الرائعة - بسم الله ما شاء الله لا قوة إلا بالله - وإن شاء الله أدوام على الإحتفاظ بالأصول الهامة و وأتحرك بالصور

إلا عند الإحتياج لرخص القيادة والتسيير

فالبيروقراطية في بلدنا رهيبة , والمعاملة في المصالح الشرطية أصبحت مهينة وخاصة للملتزمين - قصدي الإرهابيين -

اللهم يا ودود يا ودود , يا ذا العرش المجيد , يا فعال لما يريد , يا من ملأ نوره أركان عرشه

احفظنا من بين أيدينا ومن خلفنا وعن أيماننا وعن شمائلنا ونعوذ بعظمتك أن نغتال من تحتنا

اللهم لا تمكن منا غيرك يا كريم , اللهم لا تحوجنا إلا إليك , اللهم اكفنا بك ولك عن العالمين

اللهم صلّ وسلم وبارك على الحبيب محمد