تجربتى في عمرة محرك الفيرنا
السلام عليكم،
حابب انقل تجربتى والمشكله الى كانت فى سيارتى لاعضاء المنتدى الكرام
مواصفات السياره:-هيونداى فيرنا -1600 -مانيوال -مو 2007
وصف المشكله:-
نقصان لزيت المحرك بمعدل كيلو كل شهر بمعدل 500 كم
مع الرغم من ان اداء المحرك فى السرعات والتسارع ماكنت حاسس انه وحش علشان جايبها مستعمله وكنت سايق قبلها عربيه اقل منها فى cc، الموضوع ده كان مضايقنى جداا علشان الغلطه فيه بماتوررررز
التشخيص:-
طبعا انا بحب قبل ما اروح لاى احد اعمل الى عليا، غسلت الماتور 3 مرات وكشفت عليه علشان اتاكد من التسريب وكل مره عمال المحطات وكان بيجبولى ميكانيكى مابيلاقوش اى تسريب.(كنت هتجنن)
روحت لميكانيكى العائله قالى نوع الزيت بيطيررررر،قولت ماشى مع انى كنت بحط فيسكو وعن تجربه حلو اوى ،فغير لتوتال ورحتله قالى يبقى الى حطيته مضروب قولتله انا مغيره فى توتال نفسها قالى يبقى متخزن. المهم قولت مابدهاااش بقا ....
روحت طبعا لبشمهندس هانى فى مركز speed service وده علشان كان ليا تجربه معاه فى الماتركيس والحمد لله كنت مبسوط من الشغل عنده.
كشف على العربيه بكل بساطه فى دقيقه واحده وقالى لازم يتفك الماتور ونشوف علشان اعتقد انى فاكر (كبس المحرك فى مشكله).
وبعد يمكن شهرين وديتله العربيه وقالى هنفك ونشوف وانا سبتهالوا فى امانته، بعد يومين كانت المفأجاه(كنت بعيط)، العربيه محتاجه عمره كامله علشان بالفعل العربيه كانت عمله جوان قبل كده، وكل حاجه فيها كانت مستنفزه بالفعل ،فتوكلت على الله وقولتله اشتغل،حددلى ايه المطلوب فى قطع الغيار وترشيح منه قالى تجبهم منين .
وانا الحمد لله بعد المقارنه بالمحلات لقيته ارخص منهم الى كنت بتعامل معاهم قبل كده وطلع الراجل صاحب المحل معرفه كمان وادانى هديه من عنده...
أسعار قطع الغيار:-
1- طقم بستم اصلى 020 ب 300
2- طقم شنبر ب 200
3- طقم سبيكه 010 ب 185
4-طقم جوان وش سلندر ب140
5-كوعه مياه كامله اصليه ب 300
6-طلمبه مياه كورى ب 125
7- طلمبه زيت اصلى ب 375
8- 3 كاوتشه مياه تبريد اصلى ب 80
9- سيور اصلى وبلى ب 520
الخراطه:-
خراطه وش سلندر -فريزه ورديه ب 180
خراطه شميز+شحط 4 بساتم +كرنك ب 450
هديه منه طبعاااا زيت شل 1000 كيلو وفلتر:tumb:
المصنعيه 1000 وتم عمل خصم 25% لتصبح 750 ج
وضمان 3 شهور او 5000 كم ايهما اقرب طبعااا.
تقيم المكان:_
اهم حاجه انا مش عاوز اكون مبالغ فى التقيم او متحيز للبشمهندس
بس انا اتعاملت معاهم قبل كده وبالفعل بثق فى شغلهم وفى ادائهم واحترامهم كمان.
بجد ممتازين فى شغلهم وفى اسلوبهم وامانتهم وديه حاجه الواحد بيفتقدها كتير فى الورش والتوكيلات.
ربنا يفتح ويوسع عليهم كمان وكمان ومع كل الناس الى بتراعى ضميرها وبتخاف من ربنا فى شغلهم وتعاملتهم.
الاداء بعد العمره:-
حاليا انا كنت فى فتره التلين وكنت ملتزم جداا لدرجه تخنق علشان مش عاوز فلوسى تضيع هدر وشليت ناس كتير ورايا:mahf(5):بس مع الميكروباصات بس.هههه
حاليا انا عامل 800 كيلو وهغير الزيت وهحط مياه خضراء واظبط وان شاء الله ادى تقرير تانى.......
وشكرااا جزيلا للبشمهندس ورجالته وربنا يدومها خير علينا يارب.
أخوكم الفقير،أنور محمد
:bye2: