هل فى حد يقدر يعيش ويموت من غير جواز

**الاستاذ** · 13-03-2014 04:06 PM

زى ماهو واضح فى العنوان كدة هل فى حد يقدر يعيش ويموت من غير جواز عادى كدة

**ahmedteam** · 13-03-2014 04:08 PM

ايه مواضيع الجواز اللى انتشرت فجأه دى يا جماعه

ع العموم اه طبعا ممكن و عادى جدا و هتبقى زى الفل

**abohend** · 13-03-2014 04:40 PM

من غير جواز إزاي يعني
أكيد مش هقدر
إلا لو في حاجة تانية فحياتي مسيطرة على تفكيري و شغلاني عن الجواز
زي اﻹمام النووي مثلا
شغله طلب العلم عن الزواج
فلما سألوه لما لم تتزوج؟؟
قال: نسيت

لكن بالنسبة لغالبية الناس ده موضوع خيوي و أساسي و من غيره لا يستقيم النسل و لا الحياة

ده حتى الحيوانات يا أخي (و ده من باب المثال مش التشبيه)
لو حرمت التزاوج بتتعب نفسيا
فما بابك بالانسان و الموضوع ده بالنسبة له يتعدى الشهوة الحيوانية لعواطف
حب
صحبة
أنس
سكن
أبوة/أمومة
في رأيي دي حاجة مستحيلة
تحياتي

**AHMED12345678** · 13-03-2014 04:44 PM

مشكلة الجواز انك مبتعرفش قرفه غير بعد متجربه
وبعد ما تجربه وتخلف مبيكونش قدامك غير حلين علشان تخلص منه
انك تطلق وده صعب جدا علشان خاطر الاولاد وميتشردوش غير الخسارة المالية الفادحة من مؤخر وقايمة ونفقة والشقة اذا كانت حاضنه
يا اما تقتل مراتك وعيالك وده حل طبعا دموى لا انسانى غير انه هينتهى بيك لحبل المشنقة
كدة مش فاضل غير انك تصبر وتحتسب عند الله
وده الى ببعمله معظم الرجال

لكن جمال حياة العزوبية لا نظير له
لدرجة ان زوجتى وابنتى سافروا عند حمايا المقيم فى دولة خليجية لمدة شهر
مش عاوز اقول أن الشهر ده عدى بسرعه البرق
فعلا الاوقات السعيدة تمر بسرعه لا تتخيلها

**nonalaziza** · 13-03-2014 04:51 PM

معلش الناس اللي بتشتكي من الجواز و قرفة طب ايه رايك لو اقولك تبعد عن بنتك و مراتك لمده سنه مثلا أو اتنين بس من غير اتصالات و لا اي حاجة.
قولي هتقدر تعيش و تستحمل اد ايه؟
كون انك شايف ان الوقت عدي بسرعه دا بطبيعة الحال البني ادم ملول و بيحب التغير و كمان ارتحت من المسؤولية شويه مش اكتر لكن هتشتاق ليهم و هتتمني يرجعولك في أسرع وقت ﻻن الواحد مبيعرفش قيمة اللي معاه إلا لما يضيع
ربنا يحميهوملك و يخليهوملك يارب

**nonalaziza** · 13-03-2014 04:52 PM

منور يا ابو هند سبت قسم بيجو ولا ايه

**eng.salama93** · 13-03-2014 06:29 PM

الجواز زي الحمام .. اللي برا مش قادر يستني .. و اللي جوا مش طايق الريحة :d

**بحار** · 13-03-2014 06:55 PM

المشاركة الأصلية كتبت بواسطة الاستاذ

زى ماهو واضح فى العنوان كدة هل فى حد يقدر يعيش ويموت من غير جواز عادى كدة

واضح ان حضرتك مش متجوز علشان كده مش فاهم .. ماهوه حضرتك لما بيتجوز بيبقى مات اساسا !!

**abohend** · 13-03-2014 07:12 PM

من لم يشكر النعمة ...حرمها (بضم الحاء و كسر الراء)
اللي بيشتكي من الزواج...محدش ضربك على إيدك
محدش إخترلك....إنت اللي إخترت
و لو إخترت غلط..تبقى برضه غلطتك

يقول النبي صلى الله عليه و سلم
خير متاع الدنيا الزوجة الصالحة

طبيعة شغلي بتستوجب السفر بصفة مستمرة من فترة للتانية
مقدرش أوصفلكم اﻷيام بتعدي إزاي بعيد عن زوجتي و بنتي و بيتي

عزوبية ايه يا جدعان..دي كانت جحيم
اللهم لك الحمد على نعمة الزوجة و الولد..اللهم أدمها علي نعمة و أحفظها من الزوال

تحياتي

**ramymechanics** · 13-03-2014 10:32 PM

والله الجواز دة حاجة تحير ... انا اتجوزت بعد ما اتخرجت بسنة بالظبط وبقالى 8 سنين ولله الحمد متجوز وعندى 3 اطفال 7 سنين وسنة ونص و شهر على الترتيب
بتنتابنى حالات متفاوتة .. ساعات المسؤولية بتضايقك وتبقى تعبان من قلة النوم ومش عارف تخرج و و و وتلاقى نفسك عمال تبص لصحابك اللى لسة متجوزوش وبيدوروا على عروسة تقول يا بختهم مع انهم هم نفسهم بيشتكوا من قلة الاهتمام واتعدام الهدف

وساعات اما بسافر بحس ان مراتى وولادى واحشنى جداااااااا وابقى نفسى ارجع البيت عشان اشوفهم خصوصا اما بيبقى حد منهم تعبان او حاجة لا قدر الله .. يمكن عشان ربنا قدر للواحد زوجة صالحة بعد قصة حب فالكلية عشان كدة مش حاسس بالندم والكلام دة خصوصا أنى أشهد الله انها عمرها ما قصرت معايا او مع البيت او الاولاد بأى شئ ممكن افتكره او افتعلت نكد او زعل او جو كئيب فالبيت

فالنهاية بلاقى نفسى بقول الحمد لله على النعمة اللى ادهالى وبسيب صحابى عالقهوة وانا بهشك النونة ههههههههههه