-
مروحه اللاب لا تفصل
الاخوه الكرام
كنت اشتكى زمان من الحراره الشديده لجهازى
و فكيته كذا مره (لاب توب ديل انسبيرون i5 )
و نظفت المروحه و الحراره تروح شويه و ترجع
المهم بعد لف عرفت اجيب المعجون الرصاصى فى الحقنه
و فتحت و نضفت المعجون القديم من على البروسيسور و لقيته ناشف اوى
المهم حطيت المعجون و زى الفل , الحراره قلت كتير
بس المشكله دلوقتى ان المروحه بقت شغاله على طول , اى نعم ما بتطلعش هوا سخن بس صوتها مضايقنى
و لا يمكن من كتر النضافه (شيلت من عليها تراب بالهبل) بقيت احس بأقل شغل لها
هل اللى انا فيه ده طبيعى و لا حصل حاجه اثناء الفك و التركيب
افيدونا افادكم الله
-
اظن ان مروحه لاتفصل من الاساس
شغاله طالما الجهاز شغال
الا اذا كان غير كده
-
طب عدم الفصل ده مقترن مع فك وتركيب الجهاز لتغيير المعجون؟ الجو لسه مش حر والمروحه المفروض مش بتشتغل كتير اليومين دول بسرعه عاليه.
-
-
اللى محسسنى ان في مشكله
ان المروحه مابتطلعش هوا ساخن , يبقى معنى كده ان الجهاز حرارته عاديه
بس للامانه سرعتها مش الكبيره ,
اللى مضايقنى انى بقيت اسمع صوتها مع انى المفروض نضفتها من التراب اللى كان عليها
-
انا معايا نفس اللاب ده ونفس المشكه عندى وصوتها بالنسبالى مزعج برضوا
-
مش عارف ليه حسيت بالذنب لما شوفت موضوعك
ايوة انا صاحب موضوع فك وتركيب اللاب توب السنة اللي فاتت
واتذكر انك فكيته ونظفته
عموماَ
واضح انك مركز مع المروحة اكتر من اللازم
الطبيعي ان التكنولوجيا الجديدة دلوقتي وصلت مروحة البروسيسور انها تفصل تماماً وتشتغل حسب الحاجة
ولما بتشتغل بقت بتشتغل بسرعات متفاوتة وليس بصفة مستمرة كما في الأجيال السابقة
الفيصل في الموضوع دة قارن مدة البطارية وبقت تقعد قد ايه
لو بقت تقعد وقت أقل من الأول يبقي المروحة بقت تشتغل عمال علي بطال (وان كنت اشك في ذلك)
لو بقت تقعد اكتر من الأول يبقي بالفعل انت نظفت المروحة ومخارج الهوا كويس ودة قلل وقت وسرعة تشغيل المروحة وبالتالي البطارية بقت تقعد اكتر
تحياتي ومتابع معاك
-
نفس المشكله عندي لو شغلت الجهاز علي نظام اوبنتو . لكن لما اشغله علي نظام ويندوز 8.1 المروحه تبطل .
-
تنظيف المروحه بيعمل حاجه من 2
1- يشيل طبقه التشحيم (طبقه صغيره جدا شبه الشحم او زيت) و ده بيخلى صوت المروحه يعلى
2- محور المروحه بيتهز فادورة المروحه مش بتكون متماثله و ده بيخلى صوت المروحه يعلى
و تنظيف المروحه بالأسبراى بتاع تنظيف البورده بيلم تراب على محور دوران المروحه و الصوت بيعلى و بعد كده ممكن تفصل خالص
-
اشكركم يا جماعه على الردود و الحمد لله الوضع تم حله و احب ان اوضح عده نقاط
1- اللاب كان بيسخن لدرجه كبيره و المروحه شغاله , كا بيسخن لدرجه انى مبقيتش استعمل التاتش باد من كتر سخونيه سطحها
2- نفخت فى المروحه و اكتر من مره (كنت خايف افتح اللاب و برضه مش عاوز اوديه لحد بره)
3- اتفرجت على فيديو لكيفيه فتح الموديل بالضبط و فك المسامير كلها و اتشجعت
و شخص كريم من المنتدى قالى لازم تغير معجون الحراره لانه نشف بالشكل ده و بعد بحث لقيت الناس بتتكلم على معجون لونه رصاصى
بس لما نزلت ادور عليه الكل اجمع على عدم وجوده و بديله معجون ابيض بييجى فى كيس حوالى 2 جرام (التانى كان فى حقنه كبيره)
و لقيت الكيس بجنيه على ما اذكر
المهم اشتريت 3 اكياس و فتحت اللاب و فعلا لقيت المعجون الموجود محجر , شيلته و نضفت المروحه و زى الفل
و حطيت المعجون
الحراره خفت بصفه ملحوظه بس مقعدتش كتير و رجعت السخونيه تانى , اقل من الاول بس برضه حاسس ان فى مشلكه بس كنت متعايش
و انا فى محل كمبيوتر بالصدفه سألته عن المعجون الرصاصى قالى ما بنبيعوش علشان بنشتغل به و هاتلى اللاب
تنحت انى عاوز اشتريه فقعد يقولى الانبوبه كتير اوى عليك و انت عاوز نقطه منها , قولتله انا عاوز اشترى
باعها لى بـ 25 جنيه و بصراحه كنت حاسس انه بيدفعنى تمن لو كنت جيتله بس قولت مش مشكله
انا احب الحاجه تبقى تحت يدى و كمان محبش حد يلعب فى حاجتى لانه اكيد هايقولى سيبهولى و تعالى بع ساعه على احسن تقدير
فتحت بكل سهوله (بقيت خبره بقى ) و المعجون الابيض لقيته شبه مش موجود
المهم حطيت المعجون الجديد و كان عامل زى العسل الاسود التقيل
موضوع المروحه ده قلقنى لانه كان بعد الفك و التركيب على طول خاصه ان المروحه بتطلع هوا ساقع يعنى مفيش داعى تشتغل بكل القوه دى ,
بس بعد يومين تقريبا الدنيا رجعت زى الاول , و احسن , مفيش حراره تقريبا و المروحه صوتها غير مسموع
ملحوظه , انا تقريبا بشغل اللاب على الاقل 12 ساعه فى اليوم
ملحوظه تانيه , البطاريه مشيعه من زمان (قعدت سنتين بالضبط , مش سنتين و يوم ) و اللاب اللى قبله برضه كان ديل و البطاريه برضه قعدت سنتين مع انى وقتها كنت شايلها معظم الوقت و مشغله على الكهربا مباشره
ان شاء الله الخطوه الجايه اللى بفكر فيها هى تغيير الوحدات اللى داخل البطاريه
دعواتكم
-
هناك شىء مثبت على البورده اسمه ثروموستات المروحه
هذا الشىء معطل واعتقد 99 % العطل منه
وتحتاج الى مكان امين للصيانه
Content Relevant URLs by
vBSEO 3.6.0 PL2