مساعده في شقه في اسكندريه

**moody_687** · 15-03-2014 09:56 PM

والله ماعارف اقولك ايه انا شغلي بقى ف البلد وبنزل من العجمى كل يوم الصبح والمشوار بالفعل رخم بس ما دام شغلك ف ام زغيو فاقربلك السكن فالعجمي
ولو مصمم ع سكن البلد يبقى الشاطبي وكامب شيزار عشان تطلع ع الدولي ومنه ع ام زغيو

**mmohamed15** · 15-03-2014 10:11 PM

ما اعتقد يا استاذ moody_687 انت معايا و عارف الطريق عامل ازاي انا تصلا طول عمري عايش في العجمي و مكنش عندي مشكله معاه الا لما بدء الطريق يبقي زفت و زحمه و متعرفش تنزل البلد في اقل من ساعه و نص انا فاكر زمان كان الواحد بيروح محطه الرمل مثلا من طريق وسط البلد مش بياخد نص ساعه يعني كان الواحد لما يحب ينزل يقضي اي مصلحه او يتمشي شويه يلاقي الدنيا متيسره علي عكس دلوقت الواحد بيفضل يحبس نفسه في البيت علي انه ينزل يتبهدل هو و العربيه و بالتالي ممكن تلاقيني قاعد مش بخرج من العجمي بالشهر لأن لو الواحد بيرجع البيت من شغله خمسه لو حب ينزل علي سابعه و نص يبقي هيبقي في وسط البلد علي الساعه 9 يعني خلاص اليوم ضاع اكيد ان برضه بتعاني من نفس الجوار ده و لا ايه رأيك

**mmohamed15** · 16-03-2014 08:47 PM

للرفع

**Trondo** · 17-03-2014 02:45 AM

انا متفق معاك ان الطريق وحش
بس انت برضه احسب موضوع المسافه

مقترحاتى ليك محرم بك ( شارع قناه السويس - الرصافه - امير البحر )
دي يعتبر وسط البلد قريبه جدا لمحطه الرمل و محطه مصر و كل البلد
وفى نفس الوقت قريبه من الطريق الدولى و الموقف
وهتبقي سهله ليك و انت رايح ام زغيو

الاسعار فى المناطق دي ٣٠٠-٧٠٠ الف
انت و مساحتك و تشطيبك

**Khalid_Mostafa** · 17-03-2014 01:08 PM

زيا ما الرجاله بتقلك ...حاول تدور في الإبراهيمية - او سموحه عشان مشوار الشغل.متحلش مشكله و تجيب مشكله تانيه

**Ahmed Eraqy** · 17-03-2014 02:13 PM

طب انا شغلي فى العجمي و ساكن فى البلد و نفسي اسكن فى العجمي :))) بس فعلا محرم بك احسن انسب اختيار ليك

**mmohamed15** · 17-03-2014 09:08 PM

المشاركة الأصلية كتبت بواسطة ahmed eraqy

طب انا شغلي فى العجمي و ساكن فى البلد و نفسي اسكن فى العجمي :))) بس فعلا محرم بك احسن انسب اختيار ليك

شوف يا باشا انا مش هعارضك في انك نفسك تسكن في العجمي علشان تقرب من شغلك بس القضيه في ان حياتك مش شغل وبس انا زمان ايام المدرسه و الكليه و حتي بعد ما اشتغلت لغايه قبل الثوره المباركه كان حياتي زي الفل و الدنيا حلوه و بنزل البلد في نص ساعه و كان مشكله اللي ساكنين في ا لعجمي انك لو مش معاك عربيه حياتك بتبقي صعبه لكن دلوقت الطريق بقي هباب جدا و المينا و العربيات النقل اللي خارجه منها بتعمل حوادث كتير يعني انت بتبقي ماشي و انت بتتشاهد لحد ما تطلع اول الدولي المشكله الاساسيه في العجمي انه في حبسه و بالتالي مش سهل تشم هوا او تغير زائد ان مفيهوش مكان تتفسح فيه لكن لو انت تعرف تاقلم نفسك معاه فانت هتبقي مبسوط فيه يمكن انا زهقان علشان من اول ما اتولدت و انا عايش فيه و زهقت في الاخر ربنا يكرمك و يحقق لك حلمك و تسكن في العجمي

**mmohamed15** · 17-03-2014 09:10 PM

طيب يا جماعه و انت شايفين ان محرم بك مكان يعبتر راقي للسكن ما الواحد برضه مش عايز ينزل البلد و يقعد في مكان بيئه

**Trondo** · 18-03-2014 01:44 AM

محرم بك كبيره و متفرع منها شوارع كتير
وهى انسب سكن للوسط البلد
فيها شوارع شعبي و فيه شوارع الشقه لا تقل عن ٥٠٠ الف
اهم مميزتها
جميع المواصلات لكل اسكندريه موجوده
الشوارع الرئيسه بتسهر للصبح
شوارع سكنيه و هاديه زى المامون و المنشا
جميع الخدمات موجوده من مستشفيات - اسواق - اكل و شرب - فتح الله ماركت - مدارس كل المستويات
حضانات - قريبه كارفور و الداون تاون ...

سموحه اسعارها طايره خالص ... اقل حاجه شارع النصر و تقريبا اقل حاجه ٤٠٠ الف

ممكن تشوف فى مدينه اسيد جنب جرين بلازا و تبقي قريب للطريق السريع و بعدها تمسك دولي على شغلك