الموضوع: تقرير مبدئي عن اسبيرانزا انفي 2014 كاملة

السلام عليكم ورحمة الله وبركاته

إزيكم يا جماعة

معلش اتأخرت في عمل التقرير لظروف العمل

أنا كنت حاجز العربية من معرض الطارق في مول العرب - 6 أكتوبر يوم 26/2/2014، واخترت إني أجيبها تقسيط تبع شركة "مباشر" - العالمية المتحدة / عبد اللطيف جميل - عشان مش عاوز أتعامل مع البنوك عشان أبعد عن أي شبهات

والحمد لله خلصت الإجراءات بسرعة وجاتلي الموافقة يوم 6/3/2014 ورحت يوم الأحد 9/3/2014 فتحت حساب في البنك العربي الإفريقي الدولي أنا والضامن عشان نطلع دفاتر الشيكات - بياخدوا شيكات شهرية من المشتري، وشيكات سنوية مجمعة من الضامن -

والحمد لله خلصوا موضوع فتح الحساب واستخراج دفتر الشيكات في نفس اليوم

وتاني يوم رحت خلصت الأوراق في فرع الشركة في المهندسين ورحت علطول على مول العرب، كانوا مجهزين العربية ومغسولة ومتظبطة :)

شيكت على كل حاجة فيها والحمد لله كان كله تمام، وكانت ماشية 29 كم بس الحمد لله

والعربية بيجي معاها كوريك ومفتاح للكوريك فقط

رحت اشتريت لها غطاء وقفل عجل وقفل دريكسيون من سبينيس قبل ما أروح بيها

وأخدت العربية ورحت فولتها أخدت 50 لتر بالظبط


أنا حالياً عامل بيها 237 كم وانطباعي العام عنها كالتالي - مع العلم إن دي أول عربية ليا -


أولاً المميزات:

- تقفيل العربية والخامات اللي فيها ممتازة جداً ما شاء الله

- العربية عالية عن الأرض، حتى مع التحميل برضو مبتحكش في المطبات

- استهلاكها في البنزين لحد دلوقتي معقول (مشيت بعد التفويل 205 كم بالظبط وربع التانك بس اللي قل)، وعلى عداد العربية معدل الاستهلاك 9 لتر/100كم

- فرامل العربية ما شاء الله عليها ممتازة ولحقتني في كام موقف كده

- في مكان الواحد يريح فيه رجله جنب الدبرياج بدل ما تحطها على الأرضية

- العفشة بتاعت العربية جميلة جداً والواحد مش بيحس بدبدبة الحاجات اللي في الشارع

- الكراسي مريحة ومش ناشفة - كنت قبل كده جربت أقعد في الإمجراند والإنفي في المعرض، في فرق كبير في الكراسي -


ثانياً العيوب:

- تقريباً مقابلنيش أي مشاكل غير إن في حدفة يمين كده وأنا ماشي في الطرق الطوالي، ومش عارف دي من إيه، وكنت حتى ظبطت ضغط العجل زي ما هو موصى به في الكاتلوج ولسه برضو موجودة الحدفة دي

- العربية مفيهاش مقياس حرارة (في لمبة بتنور لو الحرارة عليت)، وأنا استغربت الموضوع ده في على عربية جديدة

- الإنذار أنا لحد دلوقتي مش فاهم هو بيشتغل إزاي، وهبقى أسألهم في التوكيل أول مرة أروح هناك إن شاء الله


التقييم العام، أنا الحمد لله راضي جداً عن العربية وأدائها

وبالنسبة للمعرض فتعاملهم كان ممتاز الحقيقة - مفيش أي مشكلة غير إنهم لسه مجابوش ورق العربية لحد دلوقتي، واللي المفروض هيروح لشركة "مباشر" وبعد أكده أستلمه من هناك، وبسبب ده أنا مش عارف أرخص لحد دلوقتي -، وأنا كنت مقلق منهم عشان قرأت موضوعين كده إنهم مكانوش كويسين، بس أنا الحقيقة ملمستش ده في تعاملي معاهم إطلاقاً

وبالنسبة لشركة "مباشر"، فهم ناس محترمين جداً، وأنا ارتحتلهم نفسياً، وعقدهم لقيته كويس وإن شاء الله مش فيه مخالفات شرعية


ودعواتكم ربنا يبارك فيها ويحفظها وميحصلهاش حاجة تاني غير الحكة اللي كنت حكيت عليها قبل كده

وأي استفسار فيما يخص العربية أو إجراءات التقسيط أنا تحت أمركم :)