عندي مشكلة رخمة مضايقاني قوي ... ربنا أكرمني بلانسر 1998 من حوالي ثلاثة أسابيع ولما اشتريتها كان المالك السابق بيحط فيها 80 والسلانسيه كان عالي وكان صوت الكهربا بيبان مع دوسة البنزين .. فبدأت احط 92 فراح صوت الكهربا مع دوسة البنزين ... وبعدين لاحظت ان العربية بتاكل بنزين فرحت للميكانيكي حل الكاربراتير وخلاني أجيب أنبوبة اسبراي إبرو بتاعة تنظيف الكربراتير ولما جه يجمع الكربراتير تاني لقى قطعة كده سألته على اسمها بعد كده قالي اسمها الكباس الكاوتش بتاعها متمدد وبايش على حد قوله يعني واسع عن مقاسه ولما يحاول يدخله مكانه تاني يحشر ... فقعد يدور في درج الخرده بتاعه مالقاش زيه فقام داخل المكتب بتاعه وطلع بكاربراتير أخو الكربراتير بتاعها وفك منه الكباس بتاعه وركبه عندي وكانت الكاوتشه بتاعته ناشفه وماسكة على مكانها .. وأخذ البايظ ركبه في الكاربراتير بتاعه ... ووطى السلانسيه ونظف البوجيهات ... استهلاك البنزين اتحسن جدا بقى حوالي 200 في الصفيحة على الطريق --- نيجي بقه للمشكلة ... فيه رعشه رخمة على الأيدل وفي الريفرس وعلى فكرة العربية أوتو - رعشه رخمة كده تنرفز ... رجعت للميكانيكي قالي عادي هو الهيدروماتيك كده لأنك بتكتم الفتيس فبيرعش ... رحت للعفشجي قالي بدايات كراسي وما تعملهاش دلوقت .. فأنا شاكك إن الرعشة دي لأن السلانسيه واطي فالموتور بيرعش مع الأيدل ومع الريفرس علشان البنزين اللي واصله مش كفايه خصوصا إنها بطلت كام مرة كده مع كبسة الفرامل ... إيه رأي حضراتكم؟