الجدوى اﻻقتصادية لتغيير سيارتك المستعملة بأخرى جديدة

**Ahmed_Adham** · 18-03-2014 04:28 PM

بالنسبه للكيلومتر فأنا كنت وصلت لمتوسط 20 الف كيلو للسنه نتيجه مقارنه كيلومتر العربيات المستعمله المعروضه للبيع في موقع كونتاكت كارز في الماركات المنتشره في الشارع زي السيراتو والالنترا واللي عدى على شرائها 3 سنين عشان يكون المعدل اقرب للصح بدرجه كبيره. طبعا فيه ناس بعيده عن المتوسط ده بالسلب او الايجاب لكن ده كان المتوسط السائد بعد الدراسه.

**م.أحمد الدسوقي** · 20-03-2014 10:02 AM

بص يا باشا حضرتك بتتكلم في حسابات معقدة تخضع اصلا لمعايير متغيرة

منها نجاح الموديل في اعين الناس والعرض والطلب عليه

ومنها الحالة الاقتصادية والرواج العام وسعر العملة في مقابل الدولار

ومنها حالة العربية نفسها بعد الوقت ده كله

ومنها التسويق الناجح للعربية والبحث عن الزبون الافضل

وكل المتغيرات دي بتخلي السوق شاذ جدا جدا

لان اغلب العوامل دي في مصر شاذة وبالاخص بعد الثورة 2011 والازمة الاقتصادية 2009

وعلي سبيل المثال لا الحصر

التويوتا عيون كانت زيرو في 1999 الي 2001 بـ حوالي 48 الي 50 الف

ودلوقتي سعرها في السوق بعد استعمال 13 سنه او اكتر 55 الف

وده طبعا بيرجع لعدة متغيرات اولها قرار تعويم الجنيه المصري

سعر الدولار تقريبا اتضاعف

ومثلا الازمات الاقتصادية رفعت الضرايب واخترعت ضرايب جديدة تحت اي غطاء قانوني مستكوفي

وقس علي ذلك اللاف الموديلات

انا حتكلم علي المثال بتاعك انت قولت

المشاركة الأصلية كتبت بواسطة city_ct

طيب فرضا انها عند 150 الف كم.. اى بعد مرور 10 الى 12 سنة على سنة صنع السيارة. فلو مثﻻ كان سعر السيارة 70000 الف جنيه سنة الموديل.. و بفرض ان سعر البيع بعد 10 سنوات هو 45000 جنيه... و ان الموديل الجديد لنفس السيارة بعد عشر سنوات سعره 140000.
طيب القيمة اﻻقتصادية للحالة ده ايه؟

الرقم ده صعب اوي يكون قاعدة

الموضوع اكبر من كدا

نوع العربية ايه اولا

لو يباني حيبقي افضل سعر اعادة بيع

لانه سهل وغير معقد ومعمر

لكن لو الماني حيبقي اقل لانه معقد وصعب الاصلاح رغم انه معمر اكتر من الياباني

ولو كوري اقل لانه غير معقد لكنه غير معمر

ولو صيني يبقي الي التكهين اولي

لذلك حاول تجيب عربية تمنها فيها يباني او اوروبي

وتكون مرغوبة وناجحه

وتحافظ عليها

ومتحاولش تشغل نفسك اوي كدا باعادة البيع

ده ممكن خبطه واحده تضيع نص العربية او كلها

تحياتي

**crazy car** · 05-09-2014 12:36 PM

سؤال جميل جدا ويا جماعة الراجل يقصد أمتى ابيع العربية ومعتبرش خسران فيها

**drcobra** · 05-09-2014 06:53 PM

العربية خسرانة بس صاحب الموضوع يقصد اقل خسارة ممكنة انا شايف بعد 5 سنوات بتكون استمتعت بالعربية والعربية بتمسك سعر

**john55** · 05-09-2014 11:52 PM

المشاركة الأصلية كتبت بواسطة tameraast

150 الف فى 12 سنه ازااااااااااااااااااااااا اى دي عربيه جايه مشوار كل شهر مثلا :d

انا عربيتي جديده بقالها 3 سنين معايا عامل بيها لحد دلوقتي 15000 كيلو فقط لاغير

**pioneerahmed** · 06-09-2014 12:14 AM

عربيتي موديل 2008 سيفيك و عامل بيها 55000

اية الارقام دي 300 الف ازاي
دة انا بفكر ابيعها و بقول كفاية عليها كدة

**م.محمد مختار** · 06-09-2014 05:55 PM

أنا مثلاً عربيتي معايا من 4 سنين وشوية وعاملة أقل من 30 ألف كيلو. لو بعتها هاخسر كتير وعلشان أجيب نفس الموديل تاني هادفع بتاع 40 ألف فوق تمن البيع ..
ايه اللي يخليني ابيع أصلاً ؟؟؟؟
لو العربية بتاعتك من الزيرو ، ومش متهانة. بيعها دايماً هايكون خسارة ليك.
كل ما هنالك ، لو انت لازم تبيع علشان البرستيج أو علشان محتاج فلوس أو عاوز عربية أوسع.. بيعها لحد معرفة علشان تبقى خسارتك ما راحتش لحد غريب.
والكلام ده طبعاً ينطبق على العربيات اللي لسة ما فتحتش بوقها.. لأن العربية أول ما تبدأ تفتح بوقها ارميها وجيب غيرها لو عاوز تريح دماغك.

**amirz** · 06-09-2014 11:42 PM

ايه المكلة انا عربيتى عاملة 140000 وهى موديل 2004

**Mohamed-Saoud** · 07-09-2014 01:29 AM

شوف تمن العربية كام و زود عليه 10% ستويا "متوسط معدل التضخم" .. لو بعت عربيتك بالحسبة دي أو أكتر يبقى كسبان. غير كده انت خسران.
غالبا التاجر هو الوحيد اللي يقدر يحقق المعادلة دي لأنه مش بيصبر عليها و بيبعها بعد فترة وجيزة مش أكتر من سنة بالكتير.

بالنسبة للعربيات الجديدة انت كده كده خسران. الا اذا الدولار زاد مره واحده زي ما حصل في 2012 و ساعتها ممكن تكسب.

الكلام اللي فوق ده يصلح للحسابات الماديه البحته .. لكن لازم تاخد في الاعتبار ان المكسب الحقيقي من العربية هي انها تريحك و توفر عليك مجهود المواصلات العامة و التاكسيات و كمان دي وسيلة مواصلات تحت أمرك تقدر تدور و تسوقها أي وقت تحبه.

**john55** · 08-09-2014 12:43 PM

انا عربيتي كنت جايبها من 3سنين ب100000 ولو بعنها دلوقتي هتجيب نفس المبلغ بس المشكله المبلغ دا دلوقتي هجيب ايه جديد لو عايز حاجه اعلي مش اقل من 150 الف يبقي خليني احسن في عربيتي صيانه دوريه في التوكيل ومحافظ عليها واللي محتاجه منها هي بتعمله لا وش مع ميكانيكي والحمد لله