الحمد لله اخيرا استلمت العربية من فرع (صلاح سالم) بعد انتظار طويل و احب اقولكوا تقرير عن الأستلام عشان الي عايز يستفيد في المستقبل

1- العربية هايلاين لونها بترولي و ده كان اختياري التاني في اللون بس بصراحة اكتشفت انه احسن من الموكا بكتير
2- انا استلمت بعد 3 شهور بالظبط من الحجز من غير اي تأخير بس انا انصح اي حد حاجز انه يغتت على التوكيل و يكلمهم عشان انا لو مكنتش عملت كدة كنت غالبا هستنى للمركب الجاية
3- الأستلام كان سلس جدا من غير اي مشاكل و الناس كلها محترمة هناك
4- العربية سهلة جدا في الأستخدام و اتعودت عليها خلال دقيقة فقط رغم اني بسوق مانويال طول عمري
5- انصح اي حد يجيب العربية هايلاين لأنها هتبقى مملة جدا من غير شوية الحركات الي جوة بالذات في البلوتوث و سنسور الركن
6- التكييف محترم جدا بس هو مش تاتش مع اني قرأت اكتر من مرة انه تاتش!!
7- موضوع خرطوم الماية الي بيتحشر في المروحة طلع فعلا حقيقي بعد معاينتي للكبوت و فعلا ده عيب تصميم كبير انه حاطين المروحة لازقة في الخرطوم من غير اي غطاء للحماية و لذلك انصح اي حد يعاين الخرطوم بعد ما اي حد يشتغل في العربية حتى لو بيحط زيت
8- فيه عربية جميلة جدا نزلت جديد اسمها 2008 نزلت في المعرض و سعرها مش بطال و فيه برده الشكل الجديد ل5008 و ال3008 و هما عربيات فخيمة جدا
9- ان شاء الله هبقى اعمل تقرير بعد أول 2500 كيلو عشان اقولكوا على تجربة السواقة و حالة العربية