تجربه تغيير طقم دبرياج للايفو خارج التوكيل
الحمد لله معايا بونتو ايفو اوتوماتيك موديل 2011 وعامله دلوقتي 75 الف كيلو :) وطبعا كانت مشكله تهنيج نقلات الفتيس بدأت تظهر من فتره وزادت جدا لحد لما تقريبا مبقتش بتحرك بيها خالص وركنتها.
وبما اني داخل في مشكله كبيره مع التوكيل بسبب الايرباج عندي (ده موضوع تاني محتاج شرح لوحده) وفي نفس الوقت مكنتش عاوز اروح التوكيل تاني فقررت اني ابدأ في البحث عن ميين اللي ممكن يعمله خارج التوكيل وبما ان الموضوع ده اتقتل بحث في المنتدى وكل الناس أجمعت ان لازم لما يتغير في اي مكان لازم لازم لازم ترجع للتوكيل تاني علشان يعمل re calibration للفتيس ومفيش أي حد في مصر بيعمل كده غير التوكيل وكان مش فاكر اسمه في التجمع الخامس بيعمل كده بس للأسف بقوا مركز معتمد لبي ام وبطلوا يشتغلوا في فيات أصلا.
المهم وصلت في الأخر ان فيه واحد اسمه كريم حافظ (كان مدير ورشه في أوماترا) هو اللي عنده الجهاز ده وبعد عذاب وصلت لرقمه الحمد لله وكلمته واتفقنا على معاد بعد لما اكون اشتريت الحاجه واروحله ورشته الجديده في جسر السويس عند سوق القنال.
للاسف معرفتش أروحله اليوم اللي اتفقنا وعليه ولأاني كنت مستعجل فقالي انت ممكن تروح الورشه عادي أنا مش موجود وهما عارفيين هيعملوا ايه.
فعلا روحت وكانت الورشه لسه جديده تحت التوضيب لسه وكنت تاني زبون يروحلهم :)
وبدأو في الشغل فعلا وهنا بقى هحقي باقي اللي حصل على شكل نقط:
1- الصنايعيه (عم محمد ومحمد بدوي) شكلهم فاهميين جدا وعملوا الموضوع ده كذا مره.وكنت مركز معاهم قوي في موضوع اني اشوفهم بعد لما فكوا السلوك والتوصيلات هيرجعوها في مكانها زي مكانت ولا هيشبطوها وخلاص زي اغلب مصنعيه مصر بس بصراحه طلعوا بيهتموا بالتفاصيل ده قوي وخدوا بالهم من غير ما أطلب منهم :)
2-وقت الفك والتركيب كان طويل شويه حوالي 4 ساعات ونص متواصل.
3-مع ان المهندس كريم مكنش موجود بس خرجت شويه ورجعت لقيت أحمد موسكو (شريك كريم في الورشه) شغال بايده في العربيه معاهم وبينضف وحده السلسبيد بنفسه بالجاز.
4-المكان كان تحت التوضيب لسه وبالتالي متتوقعش انك هتلاقي مكان مجهز يفتح النفس أو يخليك مطمن نفسيا لما تروح ليهم.
5-التكلفه كانت طقم فورك داخلي وخارجي من التوكيل (بناء على نصيحه كريم) ب 750 جنيه وطقم الدبرياج نفسه من الكيلاني ب 630 و2 كيلو زيت فتيس ب 50 وكيلو زيت لوحده السلسبيد ب 85 وقاعده فتيس صغيره ب 160 ومصنعيه 500 يعني كله تقريبا 2300 جنيه بكل حاجه.بالمناسبه تغيير الطقم في التوكيل ب 4000 جنيه
6-بعد لما خلصنا استنينا كريم يجي علشان يعمل re calibration بالجهاز وهنا كانت المفاجأه :) كريم جه فعلا واعتذر ان الجهاز مش موجود دلوقتي بس هيكون معاه في خلال يومين.فطبعا سألته ازاي همشي بيها من غير re calibration قالي هتصدقني وتثق في كلامي؟فقولتله طبعا قالي موضوع ان لازم يتعملها re calibration اشاعه ومش حقيقي ولا صح والعربيه اصلا بتعمل re calibration بنفسها وحكايه re calibration اللي منتشره ديه بتكون علشان الصنايعيه اللي مش فاهمين بيفوكوا وحده السلسبيد بطريقه غلط وبالتالي لما بيركبوها تاني الكمبيوتر بيقرا errors كتير وبيبقى محتاج الجهاز ضروري.
بصراحه انا كنت متلخبط للوهل الاولي بس حسيت ان كلامه مقنع جدا وفعلا روحت وقريت شويه على النت ولقيت ان كلامه صح.وفعلا كلمني تاني بعدها بيومين وقالي ان الجهاز جاهز بس انا كسلت بصراحه.
الخلاصه ان العربيه دلوقتي بقالها 4 ايام مشيت بيها 1500 كيلو وبصراحه رجعت زي الأول بالظبط ومفيش اي مشكله في الفتيس خالص والحمد لله.
انا مش هقدر احط الارقام علشان ميبقاش دعايه لكن اللي محتاج الرقم يبعتلي على الخاص.