مشكلة فى ثرموستات النوبيرا ...

**kabraider** · 17-03-2014 01:09 AM

السلام عليكم أعضاء المنتدى الكرام..
أنا عندى مشكلة بسيطة كده حبيت أعرضها عليكم لعل وعسى تساعدونى فيها.
أنا معايا نوبيرا 2004 أوتوماتيك ومن حوالى 3 سنين كانت المكنة سخنت وجابت جوان وش ولما الميكانيكى حل الوش قاللى ان ثرموستات الكوعة بيعلق وهوه اللى بوظ الدنيا ونصحنى انى اشيله خالص وانا طبعا مكنتش فاهم اى حاجه فى البتنجان فقولتله قشطه شيله..
ومن ساعتها والعربية الحمد لله مسخنتش ولا أى حاجه ..
من حوالى شهر كده قررت انى اركب كوعة جديدة بالثرموستات بتاعها بعد ماكنت قرأت عن أهمية الثرموستات فى ضبط حرارة المكنة وسحبها واستهلاك البنزين الخ الخ..
المهم انا رحت اشتريت كوعة ثرموستات (أنا من المنصورة ) من عادل وديع والمفروض انها gm ب 75 جنيه وروحت اشتريتلها استك على مقاسها وكان عندى أنبوبة سيليكون حرارى وجيت فى يوم جمعة بعد الصلاة واتوكلت على الله وغيرت الكوعة بنفسى وظبطت العمل ودورت العربية وفضلت واقف لما المراوح اشتغلت وفصلت وسمعت صوت تكة الثرموستات والدنيا كلها بيس..
فين بقى المشكلة (ومعلش للإطالة) :
من ساعة ماركبت الكوعة والميه بتقل بغباء فى القربة وانا مش عارف هيا بتقل ليه..
فى الأول قات جايز اكون مربطتش المسمارين بتوع الكوعة كويس بس جيت ابص لقيت الكوعة ناشفة وزى الفل ..
المهم فضلت ماشى كده بزود الميه لحد ماجيت فى يوم بالصدفة لقيت غطا القربة بينفس من تحته ميه كده وعمله لون اصفر على القربة دليل على انه بينفس بقاله حبه حلوين (مع العلم انى مغير الغطا من حوالى سنة ونص وجبت غطا الاوبل)..
المشطلة الاكبر بقا من ده كله انى كنت رايح الشغل النهارده الصبح وماشى والحرارة على النص وزى الفل واذ فجأة لقيت الحرارة بتعلى لحد الشرطة اللى بعد النص او بعدها بشوية وطبعا انا فضلت ماشى لحد ماشوف هتوصل لفين ولقيتها بعد كده نزلت وظبطت تانى..
السؤال هنا بقى :
ايه علاقة تغيير الكوعة بكل اللخبطة اللى حصلت دى وهل ممكن يكون الثرموستات بيعلق (مصيبة طبعا) مع العلم انه المفروض gm وليه الغطا بتاع القربة نفس دلوقتى هل ده له علاقة ان الثرموستات إتأخر فى الفتح فالضغط زاد جوه القربه فالغطا نفس بالشكل ده وفضى مية القربة وهل ده معناه ان الغطا باظ وهل لو غيرته المشكله هتتحل؟؟؟؟؟؟؟
ياريت تفيدونى فى الموضوع ده لأنه مضايقنى جدا وأسف على الإطالة والسلام عليكم..

**MMamdouh** · 17-03-2014 02:09 AM

1- عيب تسريب الغطا مظهرش الا لما ركبت الترموستات لان العربية كانت شغالة على درجة حرارة اقل من الطبيعى بتاعها طول الوقت و دة بيخللى ضغط دورة التبريد قليل و بالتالى مفيش تسريب بيبان

2- راجع على الغطا و القربة نفسها... ممكن يكون قلاووظ القربة هو اللى فيه مشلة

3- طالما بتقول فيه اثار "صفراء" مكان التسريب يبقى انت بتستعمل مية حنفية... صح؟... كدة انت بتتلف كل مكونات دورة التبريد فى عربيتك

MMamdouh

**MMamdouh** · 17-03-2014 05:15 PM

مية من الفلتر = مية فيها املاح + تكون صداء

راجع على بلوف الفلتر و قلاووظ القربة

MMamdouh

**MMamdouh** · 18-03-2014 01:35 AM

الاول بص على بلوف الغطا لو سلام يبقى غالبا العيب فى قلاووظ القربة

الارخص انك تشترى غطا تانى و لو العيب اتكرر يبقى القربة هى المشكلة و الغطا اللى اشتريتة يبقى معاك احتياطى... مش عايز اقولك اعمل العكس عشان القربة اغلى بكتير من الغطا

MMamdouh