يا سلااااام علي شهامة المصريين

**khaloooda** · 17-03-2014 01:34 PM

موعدنا اليوم مع حلقة جديدة من مسلسل جدعنة ولاد البلد

الحكاية وما فيها ان راجل محترم وكباره ساكن قصادي قرر لوجه الله تعالي ليس الا كفالة بعض السوريات
وبالفعل كفل اربع بنات
معرفش كان اختيارهم من جانبه ام فرض عليه
المهم ،، الجمعية اللي كانوا فيها وافقت
ده راجل كبير وعايش هو ومراته بس
وكمان يمتلك عمارة اللي عايش فيها وبها شقة فاضية
اداها للبنات
البنات هم ثلاث بنات والرابعة تزوجت قبل الحرب في سوريا وانجبت طفل عمره سنة تقريبا
الراجل بيرعاهم ويشوف طلباتهم هو وزوجته وينفق عليهم بالرغم من انه غير ميسور الحال
يعني ،، الحمد لله مستور لكن اللي يشوف سعيه في الخير يفتكره علي درجة كبيرة من الثراء

المهم ،، البنات بدأت تحس انها حمل علي الراجل المحترم ده فقررت تنزل تشتغل
وهنا كااااانت الكارثة وظهر المعدن الحقيييير لكثير من المصريين

البنات علي درجة عالية جدا من الجمال ،، ولذلك ولان كتيييييير مننا بيمشي ورا حاجة واحدة بس
لم تسلم البنات من المعاكسات والتحرش سواء في نزولهم الشارع لقضاء طلباتهم او في محاولتهم للشغل
تقدم للراجل كتييييييير اوي عاوزين يتجوزوا البنات
وفيهم اللي كان مستعد يشيل اتنين مرة واحده حسب تعبيره
لكن جاء رد الراجل المحترم لما حس ان كلهم جايين عشان حاجة واحده واغلبهم اما متجوز او معهوش حتي وظيفة
لكن ايه ،، سورية يا معلم

الراجل مبقاش عارف يعمل ايه
مصاريفهم واضح انها عبء عليه ،، لكن بعد اللي تعرضوا ليه قرر يقعدهم في البيت ومفيش شغللللللل نهائي

النتيجة ،، الراجل ده اصبح مكروها من كثيرين بسبب رفضه تزويج البنات لهم او لابنائهم
الراجل المصاريف كترت عليه وركبه المرض من التفكير وخوفه عالبنات
ما اتوقعه ،، استسلام الراجل قريبا وارسال البنات لاي جمعية اهلية ترعاهم ،، خاصة بعد ما ولاد الحرام بقوا يجيبوا سيرته بكلام بطال

شفتوا شهامة المصريين يا ولاد

ده احنا حلال فينا الحرق

**3mr Farrag** · 17-03-2014 01:42 PM

لو حضرتك متاكد ان الراجل محترم
ليه ما تجمعش مبلغ حضرتك و مثلا ناس معارف ليك او في نفس المنطقه و تساعدوا بيه
لومثلا تجمع 10 كل واحد يدفع حتا 100 جنيه كل شهر يبقي 1000 جنيه ممكن يساعدوا بدل المرمطه ديه

**#MAAM#** · 17-03-2014 01:47 PM

المشاركة الأصلية كتبت بواسطة 3mr farrag

لو حضرتك متاكد ان الراجل محترم
ليه ما تجمعش مبلغ حضرتك و مثلا ناس معارف ليك او في نفس المنطقه و تساعدوا بيه
لومثلا تجمع 10 كل واحد يدفع حتا 100 جنيه كل شهر يبقي 1000 جنيه ممكن يساعدوا بدل المرمطه ديه

رأيي مع رأي عمرو لو تساعدوة بمبلغ بسيط هيبقى كويس ......... ولو تعلموا البنات شغلانة زي الخياطة مثلا يبقى خير ليكم طول العمر عند ربنا

**3mr Farrag** · 17-03-2014 01:51 PM

المشاركة الأصلية كتبت بواسطة #maam#

رأيي مع رأي عمرو لو تساعدوة بمبلغ بسيط هيبقى كويس ......... ولو تعلموا البنات شغلانة زي الخياطة مثلا يبقى خير ليكم طول العمر عند ربنا

فكره ممتازه علي موضوع تعليم الخياطه
وفي نفس الوقت يشتغلوا في البيت و مع ستات بس

**amr011111** · 17-03-2014 01:52 PM

طيب المفروض نجمع فلوس من المنتدى هنا ومن اى مكان ونعمل وديعه فى البنك يتصرف ريعها ليهم

وبرضه لو احد الاخوه الاعضاء عنده فرصه عمل فى مكان محترم لتلك الفتيات يبقى شىء كويس

وفعلا اللى انت بتقوله ان اللى بيتقدم ليهم الا من رحم ربى هتلاقيه جاى يقول مش هيبقى عليا مسؤليه اتجوز شهرين تلاته واعيش

**gade2** · 17-03-2014 02:02 PM

المشاركة الأصلية كتبت بواسطة amr011111

طيب المفروض نجمع فلوس من المنتدى هنا ومن اى مكان ونعمل وديعه فى البنك يتصرف ريعها ليهم

وبرضه لو احد الاخوه الاعضاء عنده فرصه عمل فى مكان محترم لتلك الفتيات يبقى شىء كويس

وفعلا اللى انت بتقوله ان اللى بيتقدم ليهم الا من رحم ربى هتلاقيه جاى يقول مش هيبقى عليا مسؤليه اتجوز شهرين تلاته واعيش

الموضوع دا كويس بس لو نضمن ان الفلوس تروحلهم هما مش جمعيه تاكلها
وياريت نعمل حمله وكل واحد يشارك ولو ب 20 جنيه وانا اول المشاركين

**kar!m** · 17-03-2014 02:07 PM

يا باشا الشهامه و الحاجات دي كانت زمان في الأجيال اللي فاتت .. الجيل ده معندوش القيم دي الا من رحم ربي.

و الجيل اللي جاي اللي ماسك موبيلات عليها أغاني بيئة و مشغلها طول ماهو ماشي ولا راكب المترو ولا موتوسيكل صيني ولا توكتوك .. ولا عامل شعره نص في شعر و نص فاضل ولابس بناطيل محزقه .. الجيل اللي جاي هيبقى أسوأ من كده كمان.