احسيبها صح... تعيشها صح!!!

**Dr.A.Nabil** · 03-10-2008 02:16 AM

فلان الفلاني
بدل ما بيطلب دلفري
بيعمل عجه في البيت

والشباب بدل ما تركب كل واحد عربيه
ركبوا مع بعض ووفروا بنزين

والهانم بدل ما اشترت علبه دواء... اشترت شريط واحد
اصل الدواء بتاخد منه قرصين وبيتركن لغاية ما الصلاحيه تنتهي

_ _ _ _ _ _ _ _ _ _ _ _ _ _ _ _ _ _ _ _ _ _

يعني بدل ما يحاربوا الاحتكار وغلو الاسعار وارتفاع تكلفة المعيشه وانتشار الجريمه وانتشار السرقه والرشوه و تدني الدخول
أصبحت المشكله فينا احنا
احنا اللي مسرفين

**waled369** · 03-10-2008 02:21 AM

ابتسم ( انت في مصر يا دكتور )
للأسف احنا اللي شعب مش بيعرف( يعيش )

**Dr_Smart** · 03-10-2008 02:52 AM

ولا الاعلان بتاع العزومة اللي رموها في الزبالة اللي بييجي عالقناة الاولى

حاجه تضحك

**Nour_Peugeot** · 03-10-2008 03:17 AM

اه يا احنا الجهله مش فاهمين حاجة خالص و المفروض منعيش ههههههههههههه

**Dr Ahmed** · 03-10-2008 03:23 AM

أنا ماشفتهمش كلهم
بس بتاع الست اللى بتجيب العلاج بالشريط دا فضيحة
يعنى لما يبقى كورس العلاج 14 يوم مثلا وإلا المرض يرتجع أو يبقى مزمن حتى لو المريض إتحسن تانى يوم يبقى وقف العلاج من أجل البخل والتقييح خطأ طبى فادح عدّى إزاى على أى حد؟؟؟؟

**MomoMedo** · 03-10-2008 03:40 AM

يبأى انت اكيد اكيد في مصر

**egyptianmafia** · 03-10-2008 04:01 AM

it is so funny and sad at the same time....they assume that the egyptian people are retarded....lol....

**Dr_Mido** · 03-10-2008 04:07 AM

المشاركة الأصلية كتبت بواسطة Dr Ahmed

أنا ماشفتهمش كلهم
بس بتاع الست اللى بتجيب العلاج بالشريط دا فضيحة
يعنى لما يبقى كورس العلاج 14 يوم مثلا وإلا المرض يرتجع أو يبقى مزمن حتى لو المريض إتحسن تانى يوم يبقى وقف العلاج من أجل البخل والتقييح خطأ طبى فادح عدّى إزاى على أى حد؟؟؟؟

ايه يادكتور انت متعرفوش

هو هو اللى عدى اعلانات المنشطات والمقويات اللى تخليك تخلف فى شهر واللى تخسسك فى 10 ايام واللى تعالج الصلع حتى الوراثى

حزر فزر هو مين

**amir** · 03-10-2008 08:43 AM

كالعاده
اثبت الحزن الوثني انه قادر علي معالجه كافه مشاكلنا
في مرور مدينه نصر بجوار الخزنه لوحه بتفسر ان المشكله مش في المرور المشكله فينا احنا كشعب!!
و الاسقاط ده اسلوب من الاساليب اللي بيلجأ اليها المريض النفسي في محاوله منه لتلافي كونه سبب المشكله
بمعني ان حاليا عدم توافر الغذاء و الدواء و كافه السلع بقت مشكله تسببنا احنا كشعب فيها, و مطلوب مننا معالجتها
في نفس الوقت اللي الاراضي الزراعيه بتجرف و تباع بأسعار بخسه قبل ان تتحول بقدره قادر الي اراضي بناء و تباع الشقق فيها بأعلي الاسعار
و مش بس الاراضي الزراعيه
لاء دول اكتشفو كمان ان الشعب يدفع دم قلبه في شقق في الصحراء و بأسعار مماثله لأسعار داخل المدينه
في نفس الوقت اللي كانو بيجهو الشباب للمدن الجديده كحل للازمه السكانيه و الخروج من عنق الزجاجه (اللي بقالنا سنين طويله مزنوقين فيها, ده لو كان عنق زرافه كنا عديناها من زمان)
المشكله متمثله في غباء الاسلوب و الرساله كمان
فعلا دي دعوه صريحه لأخذ الدواء بطريقه خاطئه و مميته
اعلان فاشل و تفكير غبي
زي اعلان الراجل الممل اللي بيحلق دقنو مع ابنه في الحمام
اظن (و بقول اظن لأن مضمون الرساله مشوه) ان الهدف هو توفير المياه
طيب كان ممكن يجيب طبق يملاه ميه و ينضف المكنه فيه او يملا الحوض شويه
ده غير لما بيدو ابنه المدرسه او الحضانه و يقولوو العب كويس!!!!!
قال يعني الذكي اللي حط الاعلان مش لاقي كلام مقنع يكتبو في نص الاعلان
عمرك شفت حد بيقول لابنه العب كويس؟
هو في طفل بيلعب وحش؟؟
ولا كان قصده الترجمه الحرفيه ل play fair ?????
يبقي ساعتها الكلام هيختلف لأن الاعلان ده هيبقي كده منقول و مترجم و الاعلانات دي بالذات مينفعش نقلها و ترجمتها ( زي اغاني كتير و افلام و مسلسلات اكتر) لانها محمله برساله توجيهيه للشعب, ولازم تكون مناسبه و ذكيه في اسلوب توصيل الرساله
مش شويه هطل يصرفو فيه فلوسنا ( اه فلوسنا ولا هي فلوسنا بيتعمل بيها كباري و بس؟!!)
طيب
انا عندي اقتراح مادام الشعب المصري هو سبب المشاكل كلها و الدوله معندهاش حل غير انها تحاول تغير تصرفاتنا
الصين تعدادها مليار تقريبا
يجيبولنا تأشيرات و نعمل بدل مع الشعب الصيني
ياخدو منهم العدد اللي عايزينه بس احنا نهاجر هناك
و مش هنحس بغربه او حنين الي الوطن اطلاقا لأن كل شيء هناك صيني زي هنا بالظبط لكن هيبقي صيني نضيف و بيلمع مش زي الصيني المضروب هنا!!!!