الموضوع: أشتريت Accent RB و الاستلام بعد شهر .. عندي شويه استفسارات

المشاركة الأصلية كتبت بواسطة Mohamed.Yousri

السلام عليكم جميعا
وعليكم السلام ورحمه الله وبركلته

النهارده رحت غبور فرع قليوب دفعت تمن Accent RB أول فئه أتوماتيك بـ123500 بدل من 126000 علشان خصم الـ2500 جنيه و الخصم ساري لحد آخر الشهر
1000 مبروك مقدماً وتستلم على خير ان شاء الله

طبعا العربيه مش موجوده و حاليا الدفعه الجديدة في المنطقة الحرة و هتخرج في خلال اسبوعين بس انا مهيأ نفسي ان مش هستلم قبل شهر مثلا ...
غريبه انها مش موجوده ده انا من اسبوع كانوا بيقولولي انها موجوده ومتوفره استلام فوري في فرع التوكيل امام نادي هليوبوليس مصر الجديده (جايز بقى في معرض فورمولا كان في اقبال كبير واتسحبت)

عندي شويه استفسارات اتمني اني الاقي اجابه عليها
أأمر يا باشا واحنا تحت امرك باللي نقدر عليه

1 - شركة التأمين ؟؟!! أأمن علي العربيه مع انهي شركة تأمين , غبور نفسهم عندهم تأمين بـ4% سنويا شامل كل حاجه و جوه القاهره اي حادثة لا قدر الله بيبعت الونش ياخدها و لحد 10000 جنيه بدون محضر و طبعا بما انه التوكيل ف مش مطالب اني ادفع اي مبالغ ,, طبعا ده كلام البائع في الفرع الله اعلي و اعلم مدي صحته ايه .
موضوع التامين ده براحتك بس أنا شخصياً غير مقتنع بالتامين بشكل عام وربنا يغنينا عنه ويحفظنا يارب

2 - الجنوط : هل تنصحوني بتجنيط العربيه اول ما استلمها و ارخصها ؟؟! و ايه هي الحاجات اللي المفروض اراعيها في الجنوط عند شراؤها و فين احسن مكان اجيب منه الجنوط تكون كويسه سعرا و شكلا و كل حاجه ,,, لو حد يقدر يفيدني تقريبا هدفع قد ايه اكون شاكر جدا
أنا بفضل ان الواحد لو هيجنط يا اما يشتري الجنوط الاوريجينال بتاعة العربيه يا بلاش خالص بس دي بتبقى غاليه ممكن تعدي الـ 2000 جنيه للجنط الواحد بس بتبقى انضف من اي جنوط من اللي في السوق وأكيد بتبقى مناسبه للعربيه وملهاش تاثير على العفشه

3 - فوانيس الشبورة : سألته علي فوانيس الشبوره و قاللي انهم هيعملوا في حدود 1500 جنيه بيركبوهم في قسم الهياكل بتاعهم و لو ركبتها جوه التوكيل ف طبعا مفيش مشكله في الضمان لأن محدش لعب في كهرباء العربية
لو ركبت الفوانيس بره التوكيل أو حتى عندهم هتخرج من ضمان الكهربا وهو ده نظام غبور وطالما انت عاوز فوانيس الشبوره ما تشتري الفئه التانيه على طول هي دلوقتي بـ 127.000 يعني زياده 3.500 جنيه عن الفئه اللي حضرتك حاجزها لو شلت منهم 1.500 تمن الفوانيس و قول 500 جنيه تركيب يبقى في فرق 1.500 حضرتك أخدت بيهم فتحة سقف وتارة مالتي ومش هتقابل مشكله خروجك من الضمان لو حبيت تركب فوانيس شبوره (احسبها تاني كده وهتلاقي ان ده أفضل على ما أعتقد)

4 - العربيه بييجي معاها استبن , شنطه العدة , مفتاحين ... يا تري في حاجه تاني ابص عليها ؟!
طبعاً طاسات العجل ده لو ماكنتش راكبه وانت بتستلم والاريال ده لو ماكنش راكب بردوا وطبعاً هتتاكد من ان كل حاجه شغاله التكييف والكاسيت والزجاج الكهرباء والسنترلوك والمساحات والكلاكس وكل اللي تقدر تشيك عليه

5 - عايز اعمل فرش للعربيه علشان ما ابهدلش الفرش بتاعها ,, هل في مكان معين تنصحوا بيه ؟ هل في خامه معينه بتستحمل و اعتماديه تنصحوني بيها ؟؟ التكلفه تكون في حدود كام تقريبا ؟!
في عندك جينز كار ده ممتاز جداً انا عامل فرش عربيتي عنده من سنه تقريباً كان مكلف حوالي 1300 جنيه بس معملتش فرش جلد للارضيه عشان مبحبهوش
وفي كمان عاليا وده له فروع كتير اللي اعرفها منهم عند السراج مول مدينه نصر وفي شارع جسر السويس خلف حديقه الميريلاند وعموماً هي الاسعار بتختلف على حسب الخامه ونوع الخياطه وانت وشطارتك برضوا
أما الكسوه الجاهزه فمنصحكش بيها عشان بتبوظ تنجيد الفرش الاصلي
بس نصيحه استمتع بفرش الفبيركه في الاول لانك دافع تمنه من تمن العربيه اتبسط بيه واستمتع بيه (انت يعني هتحافظ عليه لمين للي هيشتري منك العربيه بعد كده هو اللي يستمتع بالفرش اللي انت دافع تمنه من تمن العربيه) طبعاً انا مش بقولك اهلكه بس برضوا متع نفسك بيه شويه
لو هتركب فرش جلد متقلقش من موضوع الحراره والصيف والكلام ده طالما هتستخدم نوع نضيف الموضوع مش زي ما انت متخيل أنا مركب فرش جلد وأسود كمان ومحستش باي مشكله في موضوع سخونه الفرش دي خالص
وعموماً ده تقرير كنت عامله عن الفرش اللي انا مركبه في العربيه لو تحب تبص عليه
http://www.nilemotors.net/Nile/360102-a.html

6 - العربيه كوري بالكامل و مفيش اي حاجه فيها نهائي خالص مصري
للاسف السنترلوك والانذار مصري وده انا متاكد منه وفي الغالب بعد فتره هتضطر تغيرهم بحاجه محترمه شويه
واعتقد كمان ان الكاسيت مصري وده بناءً على كلام صديق لينا في المنتدى هو اللي كان قال الكلام ده والله اعلم

7 - الالوان المتوافرة منها في الدفعه الجديدة اللي جاية : فضي ابيض اسود فيراني احمر/نبيتي + لون عجيب جديد كده ما اعتقدش انهم هيبيعوا منه عربيه واحده حتي زي اللي في الصوره كده ,, مفيش اللون السماوي/اللبني الفاتح



الالوان دي طبعاً اذواق وان كان انا اكتر لون بيعجبني فيها هو البرونزي بس انا ملاحظ ان حضرتك مش كاتبه في مجموعة الالوان الموجوده . هو مش نازل فعلا ولا حضرتك نسيت تكتبه؟؟؟؟؟
بس بالنسبه للالوان اللي حضرتك كاتبها من وجهة نظري أفضلهم النبيتي

شكرا جزيلا و في انتظار مساعدتكم و جزاكم الله كل خير ....

المشاركة الأصلية كتبت بواسطة mshmshm3

الفئة الاعلي بكام

129.500 ونازل عليها خصم 2.500 جنيه حتى اخر الشهر يعني تبقى 127.000 جنيه
ودي بتزيد عن الفئه الاولي (فتحة سقف - فوج لايت - تاره مالتي)

المشاركة الأصلية كتبت بواسطة mazeen

1500 جنيه لفوانيس الشبوره غلطان
فى فئه شفتها امبارح فى غبور فتحة سقف - فوجات -طاره مالتى 127000 جنيه وابقى جنط بعد كده براحتك
انا شايف ان الفئه دى افضل من اللى حضرتك حجزتها

متفق معاك تماماً

المشاركة الأصلية كتبت بواسطة mshmshm3

ماتعرفش فيها ايموبلايزر ولا لا ؟؟؟؟؟؟

أخيراً غبور أستوعب وفهم ان الايموبلايزر مش رفاهيه وانه بقى ضروره وخاصة في ظل الاوضاع الامنيه الحاليه في مصر وتكرم وتعطف وحن علينا ونزل الاكسنت بالايموبلايزر واعتقد دي اول أو تاني دفعه بالكتير يبقى فيها ايموبلايزر
بصراحه انا مكنتش مصدق انه اخيرا عمل كده غير لما شوفت علامه الايموبلايز منوره في التابلوه بنفسي (ورغم كده مش قادر اصدق وعمال اقول يمكن يكون عم غبور لاعب في العربيه وبيخلي لمبه الايموبلايزر تنور بس من غير ميكون فيها ايموبلايزر مش عارف ليه حاسس ان في خدعه في الموضوع ومش قادر اصدق ان غبور هيتخلى عن مبادءه)
طبعاً مفيش حاجه لوجه الله

عاوزين ايموبلايز ....
عنيه ........
مفيش ايرباجز (غبور استايل )

المشاركة الأصلية كتبت بواسطة Mohamed.Yousri

السلام عليكم جميعا
وعليكم السلام ورحمة الله وبركاته

كلمتهم النهارده علشان اسأل علي الفئه العاليه اللي بـ127000 قاللي انها مش موجوده دلوقتي و مش متوافره في الدفعه اللي بتتخلص اجراءتها دلوقتي لو عايزها هستناها و مفيهاش ايرباج , فتحه سقف و تارة مالتي و الفوجات .
انا مش عاوز اشتتك بس لو عاوزها ممكن تسأل عليها في المعارض ممكن تلاقيها بس حتى لو جبت اول فئه فهي حلوه برضوا وربنا يباركلك فيها

اللون البرونزي موجود انا اللي نسيت اكتبه ضمن باقي الالوان , انا اخترت اللون الفضي وقت الحجز
انا برضوا استغربت انك مش كاتبه لانه من الالوان الحلوه فعلا فكان هيبقى غريب منهم انهم مينزلهوش

ايموبلايزر بصراحه مش عارف موجود ولا لأ ,, ما سألتش عنه
ولو سالت مش هتلاقيهم هما نفسهم عارفين حاجه دول ضايعين اخر ضياع
انا سالت على الايموبلايزر في العربيه دي في معرضين مختلفين لغبور والاتنين قالوا انه مفيش وانا اكتشفت انه موجود بالصدفه البحته لما طلبت في تاني معرض انه يشغلي العربيه عشان عاوز اشوف اضاءة العدادات واول ما حطينا المفتاح في الكونتاكت لقيت لمبة الايموبلايزر منوره في التابلوه ولما شفتها قلت له طيب ما لمبه الايموبلايزر منوره اهه قالي ابه ده فعلا دي منوره لا كده يبقى فيها ايموبلايزر (دول في الضياع)
ولما رحت معرض فورمولا اوتوماك قلت اسالهم برضوا من قبيل التاكد قالولي برضوا مفهاش فلما قلتلهم على وجود اللمبه دي قالولي طيب احنا هنسال في الموضوع ده ثانيه واحده وراح سايبني بتاع 5 دقايق مش عارف بقى راح عمل تليفون ولا كلم مين وبعدين رجع قالي لا فعلاً فيها ايموبلايزر
بصراحه انا مش عارف دول مبيعات ازاي ده في ناس كتير ممكن تصرف نظر عن العربيه بسبب معلومه غلط زي دي

علي كلامهم ان مفيش اي حاجه فيها مصري كله كوري بس الله اعلي و اعلم برضه ,, مفيش شفافية خالص في التعامل حاجه مستفزة برضه
متعرفش بقى مفيش شفافيه ولا هما مش عارفين هما بيبيعوا ايه ولا هو استهتار وبيتعامل على ان السنتر والانذار والكاسيت دي حاجات مش مهمه من وجهة نظره ومش اساسيات العربيه فبيريح دماغة ويقولك كله مستورد. بس الخلاصه ان معظم مسؤولي المبيعات في مصر ومش في غبور بس محتاجين اعادة تاهيل وشغل كتير عشان يكونوا ماهلين للعمل ده

عاجبني شغل جينز كار جدا جدا بصراحه من الصور لكن كل ما اسأل حد يقوللي الاسعار دي غاليه اوي .. معنديش خبره اوي في الفرش و الكلام ده بصراحه ف مش قادر احكم الناس صح ولا علشان ما يعرفوش شغل جينز كار ف مستغليين الاسعار و خلاص
هو مش غالي بالنسبه لمستوى الشغل والكوالتي اللي بتاخدها وده من وجهة نظري