الموضوع: اشتريت فورد ايكو سبورت الجديدة

يا ريت حضرتك تبلغنا لو نزلت مصر لأنى عايز اشتريها وخايف

المشاركة الأصلية كتبت بواسطة ashraf adel

العربية تصنيع الهند التابلوه تقفيلها مش قوى بس ماشى حالها اللى قهرنى انى لما استلمت العربية مالقتش فرشة الارضية اللى فى الكرسى الخلفى وافتركت ان فيه حاجة غلط اتصلت بالوكالة قالوا مش بتيجى معاها بقيت اضرب كف على كف قولت معقول وقفت معاهم على دى يعنى دى اللى حتقلل الكوست عندهم سألت على سعرها فى الوكالة طقم الفرش ب 290 درهم قولت على ايه روحت اشتريته من بره ب 20 درهم والسلام
العربية اللى معايا اول فئة هى بيتهيأ لى الفرق بينها وبين الفئة الاعلى هى سينسور خلفى ومثبت سرعة انا بالنسبة لى مثبت السرعة مش مهم بالنسبة لى انا السيارة الكورولا اللى معايا فيها مثبت سرعة ولا مرة استخدمته لانى سمعت عن حادثتين هنا فى الامارات بسبب مثبت السرعة بالنسبة للسينسور تركيبه فى الوكالة ب 600 درهم انا كنت عاوز اركب ليها كاميرا خلفية سألت عليها فى الوكالة قالوا ملهاش وخايف اركبها بره التوكيل ياثر على الضمان
انا الحاجة الحلوة اللى لقيتها فى العربية دى واللى اول مرة اشوفها فى عربية هنا هو قفل الابواب من بره مع السواقة هى حلوة فى مصر كأمان
عموما العربية فيها اوبشنز كويس بالنسبة لسعرها انا حتى لسه ما شوفتش الكاتالوج بتاعها علشان ادرسها يعنى انا شايف فيها زرار للبلوتوث بس مش عارف الخاصية متفعله على الموديل ده ولا لأ

الله يبارك للك فيها و متشكر لحضرتك على الافادة و على فكرة حركة مش كويسة من الوكيل على فرش الارضية اللى فى الكرسى الخلفى كان لازم يطلب من الشركة الام فورد ان العربية مش يكون ناقص فيها اى شئ و يتهيائلى لو العربية تقفيل المانى او اسبانى زى الموديلات القديمة عمرها مايكون ناقص فيها حاجة زى كدا.

[QUOTE=bkmz;3875494638]السلام عليكم ورحمة الله وبركاته لو سمحت انا مقيم ف السعودية وعايز اشترى ايكو سبورت بس ممكن تفيدنى عنها كويسة قويه ثابته وجزاك الله خيرا وهل هتنزل مصر امته[/QUOTE

وعليكم السلام ورحمة الله وبركاته اخى الكريم انا اللى خلانى اشترى العربية دى 3 حاجات اولا ذى ما انت عارف ان اى مصرى بيفكر يشترى عربية وناوى ينزل بيها اخره لحد 1600 سى سى ويقف
ثانيا انا شارى العربية دى لزوجتى تستعملها هنا وناخدها معانا واحنا نازلين
ثالثا انا اشتريتها بسعر لقطة بالنسبة لحالتها لان العربية دى كان واحد كاسبها فى سحب وما كانش استلمها حتى من الوكالة وانا اشتريتها منه بفرق سعر عن الوكالة حوالى 11 الف درهم
بالنسبة لرأيي فى العربية انا كان بقالى فترة بدور على عربية مناسبة لمصر وفى نفس الوقت تكون فى حدود 1600 سى سى علشان الجمارك طبعا اول حاجة كنت بأدور على اساسها هى ارتفاع العربية عن الارض وكمان تكون اقتصادية فى البترول وفى نفس الوقت ما يزيدش ثمنها عن 150 الف جنيه لان مصر حرام الواحد يركب فيها عربية اغلى من كده بصراحة وده اللى لقيته فى العربية دى
انا بصراحة عجبتنى العربية دى جدا اول لما شوفتها بس اللى خلانى اتانى فى شراها انى كنت خايف انها ما تنزلش مصر ثانيا انا كنت سامع عن البيجو 2008 من نفس الفئة وكنت منتظر اشوفها على الطبيعة علشان اقدر اقارن بينهم بس للاسف لسه ما نزلتش لحد الوقتى
عموما انت تقدر تأخد فكرة عن العربية لو عملت درايف تيست مع الوكيل فى السعودية هى اكيد موجودة عندكم وتقدر تشوفها على الطبيعة وتأخد فكرة افضل عنها

لو سمحت ايكو سبورت ممكن تنزل مصر امته ولو فى اى وسيلة اتصال مع وكيل فورد فى مصر ياريت لانى عايز اشتريها وانزلها مصر وشكرا جزيلا

المشاركة الأصلية كتبت بواسطة bkmz

لو سمحت ايكو سبورت ممكن تنزل مصر امته ولو فى اى وسيلة اتصال مع وكيل فورد فى مصر ياريت لانى عايز اشتريها وانزلها مصر وشكرا جزيلا

فى معرض السيارات اللى اتعمل فى مصر من شهر تقريبا عبد اللطيف جميل وكيل فورد فى مصر كان عارضها واعلن انها حتنزل مصر خلال هذه السنة وبسعر مفاجأة

المشاركة الأصلية كتبت بواسطة ashraf adel

الله يبارك فيك اخى الكريم متشكر على زوقك على فكرة العربية لسه نازلة الخليج السنة دى بس هى موجودة فى الهند من 3 سنين تقريبا لانها بتتصنع هناك لو عاوز تعرف اى تفاصيل عن العربية ممكن تدخل على موقع الفورد او على موقع الطاير للسيارات وكيل الفورد فى الامارات حتلاقى كل المعلومات اللى انت عاوزها عن العربية دى وبالصور
بالنسبة للعربية اللى انا اشتريها انا فعلا اول مالك ليها لان الشخص اللى كسبها انا اشتريتها منه ماكانش استلم اوراقها من الوكالة وروحت انا وهو وعمل لى تنازل هناك والوكيل طلع لى ورقة المبايعة بأسمى عمومافى الجمارك فى مصر بيمشوا على رسالة المرور بأنى المالك الاول بناء على الترخيص

السلام عليكم ممكن حضرتك تفيدنا ايه اخبار ايكو سبورت معاك وجزاك الله خيرا