الموضوع: خطوات وشرح كيفية اختيار كاسيت مناسب لعربيتك

ازيكو يا شباب ,,

رجالة قسم الصوتيات ,, يعني الصبات والبوازيك وسمعني احلى سلام لحبايبنا رجالة نايل موتورز

النهارده حابب ادردش معاكم شوية في حاجة مهمة جدا !! وكل الناس بتسال عليها سواء الناس السميعة او حتى اللى مجرد عايز يسمع صوت نقي وكويس في عربيته !! ؟؟

ببساطة شديدة موضوعنا النهارده عن ال Head Units

وهي بصراحة اسم على مسمى !! الكاسيت او ال Head Unit دي اهم وحدة في عدة الصوت

مهما كان الواحد هيركب جي امات تدي الخرج للسماعات !! برضوا الكاسيت يعتبر هو الاساس

عشان كدة ضروري جدا ان كل واحد فينا يكون مركب كاسيت محترم

هنتكلم على خطوات اختيار الكاسيت وايه اللى يخليني اختار كاسيت عن كاسيت وطبعا اللى عنده اضافات ينورنا

بس قبل ماتكلم عن ازاي تختار كاسيت مناسب لعربيتك حابب اشرح شوية معلومات عن ال Head units والامكانيات اللى فيها

انا هستبعد الامكانيات الترفيهيه " اللى هي زي ان الكاسيت يكون فيه كارت ميموري او حتى Hard disk , بلوتوث , GPS , Navigation , DVD , شاشة تاتش سكرين .. وغيره من الامكانيات اللى انا بعتبرها ترفيهيه ومش هتفرق كتير مع واحد سميع يهمه الاوبشنز اللى من خلالها يقدر يتحكم في عدة الصوت عنده كتنغيم وخرج وقوة

1- الخرج : ودي اول حاجة لازم الواحد يبص عليها لما يجي يشتري الكاسيت والخرج في الكاسيت بيتقسم لنوعين

النوع الاول : هو الخرج اللى بيروح من الكاسيت للسماعات

وده غالبا بيبقى في حدود مابين 50 / 55 وات لكن فعليا الكاسيت بيخرج مابين 18 ل 22 RMS خرج فعلي وبيختلف الرقم على حسب نوع الكاسيت وموديله

النوع التاني : وهو الخرج اللى يبروح من الكاسيت للجي ام من خلال ال RCA

وده بيتسمى Preamp output ,, الغريب اني اكتشفت ان اكتر من 95% من محلات الصوتيات او حتى اللى مركبين عدد صوت ماعندهمش اي خلفية عن موضوع ال Preamp !! ؟ مع انه بيفرق فرق شاااسع في القوة اللى بيخرجها الجي ام

بإختصار ال Preamp output هي القوة بالفولت اللى بتروح من الكاسيت للجي ام من خلال وصلة ال RCA بتتراوح مابين 2 فولت ل 5 فولت على حسب نوع الكاسيت وموديله

ومتسمية بال Preamp output اختصار لكلمة Pre amplifier output

طب دي هتفرق في ايه ؟؟

ببساطة الجي ام بيبقى فيه زرار كلنا عارفينه اسمه Gain طبعا كل مابترفع ال Gain كل مابيزيد قوة الجي ام !!!! ؟؟ كل مابتزود ال Gain level بيقلل الفولت وفي بعض الموديلات الجديدة اتشالت كلمة Gain وتم استبدالها ب Input level

وعشان توصل لل optimum confirgration لاي جي ام فانت محتاج انك ت Match الفولت اللى رايح من الكاسيت للفولت اللى موجود في الجي ام !!

طب خلينا نوضح بالصورة عشان المعلومة توصل اكتر




زي مانتو شايفين في الصورة ان الجي ام موجود Input level

وزي مانا قلت انك محتاج انك ت Match الخرج بالفولت من الكاسيت بتاعك للي موجود في الجي ام

يعني لو الكاسيت بتاعك ال Preamp volt بتاعته 2 فولت ,, هنقول هيحصل هدر بسيط في الطاقة يعني هيروح للجي ام بتاعك 1.5 فولت تقريبا

يبقى انت محتاج انك ترفع ال Input level / Gain للجي ام بتاعك لحد 1.5 عشان تقدر تاخد قوة الجي ام

اما لو الكاسيت بتاعك خرجه 5 فولت يبقى هترفع الجي ام لحد 4.5 فولت تقريبا وهتاخد قوة الجي ام !!

طب انا كدة استفدت ايه ؟ مانا في جميع الاحوال هظبط الجي ام زي الكاسيت وخلاص ؟؟ يبقى ايه لزمته لما يكون الكاسيت بتاعي ال preamp فولت بتاعته عالية ؟؟

هنا الاقاويل على حسب المواقع الاجنبية وكل ال Reviews اللى قرتها في النقطة دي اختلفت ,, فيه ناس قالت ان بعض الجي امات مش بتشتغل بكامل كفائتها الا لو واخدة فولت عالي من الكاسيت !!؟

فيه ناس قالت عادي مش هتفرق كتير وهتظبط على حسب الكاسيت بتاعك وخلاص ؟؟

لكن اللى الكل اتفق عليه !! ان كل ماكان الفولت بتاع الكاسيت بتاعك عالي كل ماهتبقى مش محتاج انك تعلي الجي ام فبالتالي هتاخد خرج الجي ام بكامل قوته وهو لسه عند النص او الربع !! بالتالي هتاخد نقاء اعلى وهتحافظ على العمر الافتراضي للجي ام بتاعك

ودي معروفة !! انك لما تبقى جايب اخر الجي ام او معليه على الاخر نقاء خرج الجي ام بيقل وطبعا الاحسن اننا كلنا نبقى موطين الجي ام

ودي بتبقى مضروبة في عدد ال RCA output بتاعة كل كاسيت !! فيه كاسيت بيديلك امكانية انك توصل RCA واحد فقط !! وفيه 2 وفيه 3

Single RCA
Double RCA
Triple RCA

طيب كدة اتكلمنا على خرج الكاسيت وعرفنا انه بيخرج قوة بالوات للسماعات (قوة فعلية بال RMS ) وفي نفس الوقت بيخرج قوة بالفولت للجي ام

نيجي ندخل على الاوبشنز الخاصة بتنغيم الصوت :

1- Equalizer : وده اهم حاجة في الكاسيت !! وكلنا عارفينه وعارفين انه مسؤل عن تنغيم الصوت وموجود في كل الكاسيتات بس بيختلف من كاسيت للتاني لانه انواع :::

وال Equalizer معروف ومشهور انه بيخيلك تتحكم في تلت حجات (بيز / ميد رينج / تربلات ) وده يسمى بال 3 Band Equalizer

فيه كاسيت بيديلك تحكمات اكتر وبيقسمهالك ل 5 بدل من 3 وبكدة هتتحكم في ( بيز / ميد رينج Low / ميد رينج High / وتحكمين للتربلات )

نفس الكلام بالنسبة للكاسيت ال 7 Band وال 8 Band

طبعا كل مالكاسيت مابيكون فيه تحكمات اكتر كل مابيديلك Flexibility عالية في تنغيم الصوت زي مابتحب تسمعه

2- Subwoofer Control : ودي معروفة ومشهورة والكلمة بتتدل على معناها انك تقدر تتحكم في الصب بتاعك من خلال الكاسيت

3 - Low Pass Filter : وده فلتر بيخليك تقدر تتحكم في ترددات البيز اللى انت حابب تسمعها ,, تأثيره مش بيبقى واضح الا مع الصبات وفي جميع الاحوال اي حد بيبقى مركب صب بيبقى مركبه على جي ام وكل الجي امات بيبقى فيها الفلتر ده فتقدر تتحكم من الجي ام فضل من الكاسيت

4 - High Pass Filter : وده من خلاله بتقدر تتحكم في الترددات اللى السماعات هتطلع عندها بيز !! كل ماتعلى بالفلتر معناها انك بتقطع البيز قبله

بمعنى اني لو خليت ال HPF على 120Hz معناها ان اي بيز تردده اقل من كدة السماعة مش هتجيبه !! يعني لو عليت ال HPF على الاخر يبقى السماعات مش هتجيب بيز نهائيا !! وده مفيد جدا جدا للي بيركب صب او بازوكا وبيبقى محتاج انه يفصل بيز السماعات من الكاسيت

لو عندك HPF في الكاسيت بتاعك هتقدر بسهولة تفصل بيز السماعات تماما من غير ماتبقى محتاج انك توصلها على جي ام عشان تفصل البيز بتاعها !!

5 - Dynamic sound organizations : وده اوبشنز بيديلك اضافة Combined بيز مع تربلات وبيبقى تلت مستويات level 1 , 2 , 3

كل ماتعلى بال DSO كل مابيزيد طبقات التربلات وفي نفس الوقت بيحصل زيادة بيسطة للبيز

برضوا بيبقى مفيد مع الناس اللى عندها صبات لانه بيدي تضخيم للصوت واضافة تربلات فالصوت مش بيبقى مكتوم , بس بيبقى محتاج معاه سماعات نقائها عالي وتكون على الاقل 4 ways فما فوق عشان لما تعلي مايحصلش خروشة

6- Direct Sub drive : ودي حاجة بتبقى في الموديلات العالية اوي !! ودي من خلالها بتديلك امكانية انك توصل صب Direct للكاسيت 2 ohm من غير ماتحتاج جي ام بس طبعا مهما كان خرجها بيبقى على القد فحاجة مالهاش لازمة من وجهة نظري

7 - Sonic Center control : وده بيديلك امكانية انك تتحكم في المكان اللى انت قاعد فيه في العربية عشان تقدر تظبط الصوت وتحس ب Surrounding

دي الاوبشنز ال Most common بالنسبة لتنغيم الصوت والتحكم فيه واتمنى اني ماكنش نسيت حاجة

طبعا فيه اوبشنز تانية كتير موجودة بس بتختلف اسمها من ماركة للتانية زي ال Bass Boost في الكينود وده بيزود البيز في المقابل في السوني فيه ال Loud وده برضوا بيعمل تضخيم للصوت وفي البايونير اسمه على حسب مافتكر SPT وهكذا ....

وفي نفس الوقت فيه اوبشنز تانية برضوا موجودة في الكاسيتات العالية التاتش سكرين اللى طبعا سعرها بيبقى معدي ال 3 و 4 بواكي فبلاش نعقد نفسنا وخلينا في المتاح واللى سعره معقول

كدة عرفنا خرج الكاسيت واتكلمنا عن ال Most common اوبشنز اللى بتخلينا نتحكم في تنغيم الصوت

وكدة كل واحد بقى عنده معلومات خفيفة عن الكاسيت والاوبشنز بتاعتها

طيب نيجي بقى للاهم وهي خطوات اختيار كاسيت !! ؟ ازاي اختار كاسيت كويس ؟؟

خطوات اختيار كاسيت لعربيتي :

الاول لازم نبقى متفقين ان الفروقات مابين المركات سواء كان (بايونير / سوني / كينود / Alpine / باناسونيك) مش الفروقات الجامدة الاهم اني ابعد عن الماركات الصيني التعبانة زي ال ( Roadstar) على سبيل المثال لانها مش قد كدة وبعد كدة همشي على الخطوات دي :

1- لازم احدد رنج السعر اللى هتحرك فيه

2 - ابقى محدد هل انا مستقبلا ناوي اركب عدة صوت ؟؟ صب وجي ام او بازوكا ؟ ولا هكتفي بكاسيت على سماعتين قدام وسماعتين ورا وخلاص على كدة ؟

رقم واحد طبعا دي هتختلف من شخص للتاني على حسب ماهو ناوي يدفع كام في الكاسيت

اما رقم 2 فدي اللى هتخليك ترجح كاسيت على حساب كاسيت تاني

لو انت مش دماغك موضوع ال Sound system وعايز تسمع صوت نضيف على سماعات وخلاص على كدة

في الحالة دي انت مش هيهمك كل الاوبشنز والهري اللى احنا اتكلمنا فيه ده خاالص !!

كل اللى يفرق معاك ان الكاسيت يكون فيه Aux / USB وحتى ال EQ لو كان 3 Band فهو كفاية اوي !! وفي الحالة دي انا ارشحلك اي موديل بايونير Single Din هيفي بالغرض

اما لو انت ناوي مستقبلا انك تركب عدة صوت يبقى كل اللى اتكلمنا فيه ده يهمك انه يكون موجود في الكاسيت بس ليها اولويات

والاولويات دي هتبقى على حسب نوع عدة الصوت اللى انت هتجبها لكن مبدئيا كدة اول حاجة تبص عليها هي تحكم الصب بعد كدة نشوف بقى انت ناوي تعمل ايه

يعني لو هتكتفي بجي ام عليه صب او بازوكا يهمك اوي الكاسيت يكون فيه HFP عشان تقدر تفصل بيز السماعات , لانك لو ماقدرتش تفصل بيز السماعات الصوت مش هيبقى مظبوط معاك !!!

اما لو هتركب السماعات على جي ام فمش مهم اوي الاوبشنز ده يكون موجود لانك كدة كدة هتفصلها وتتحكم فيها من الجي ام !!

لو انت ناوي تركب اكتر من جي ام يبقى يهمك اوي يكون الكاسيت فيه اكتر من مخرج RCA عشان ماتجيش تحتاس بعد كدة !!!

موضوع ال Preamp output هيفرق كتيير جدا فحاول تجيب حاجة ماتقلش عن 4 فولت

كمان مهم جدا انك تبص على ال EQ Bands !! انت واحد هتركب عدة صوت كاملة فلازم يبقى عندك امكانية انك تتحكم في كل Band بمزاجك

وزي مانا قلت في الاول - ودي وجهة نظري الشخصية - ان كل معظم الماركات قريبة من بعض فحاول انك تختار كاسيت يديلك اكتر اوبشنز هتحتاج ليه في عدة الصوت بتاعتك

كدة انا خلصت كلامي واتمنى الموضوع يكون مفيد

ولكن الكلام عن ال Head units عمره مابيخلص اللى عنده اضافة ياريت يفيدنا واللى محتاج حاجة تحت امركم في اي وقت