هوا لية المنتدى اصبح مليان الخلافات والمشاحنات دة كلها
هوا لية المنتدى اصبح مليان الخلافات والمشاحنات دة كلها؟
بقالى اسبوع بتابع المنتدى كل موضوع حتى لو يخص العربيات الناس مش مستحملة بعض ,,,,وكل واحد يرد على الموضوع وبطريقة مختلفة تلاقى كتير من الاعضاء يسبوا الموضوع الاساسى اللى بيتكلموا فية ويمسكوا فى بعض ,,,,,
مش عارف هل اصبح ثقافتنا عدم تحمل اى تعليق او حتى نقد ,,,,,انا كنت متصور ان الموضوع دة فى الشارع بس ,,,,,للاسف لقيتة فى البيوت والمنتديات ,,,,,لازم كل شخص يعمل جبهة لوحدة ويبدأ يدافع الاول عن رأية وبعدين يتحول من مدافع الى مهاجم لاراء الاخرين
وكل واحد لازم يطلع منتصر على الباقيين ( دة من وجهة نظرة)
لية اختفى التسامح واللين و التفسير النزول لرأى الاخرين ,,,, انا عارف ان دة موجود عند الناس بس لاسف اللى ظاهر على السطح ,,,,اصحاب الصوت العالى ,,,,و الفهلوية واللى بيحبوا يتفلسفوا واللى يحبوا يتصفصتوا ,,,,,,واللى بيحبوا يستأسدوا وكان الناس كلها بقت اعداء لبعض
نفسى فى دعوة عامة للتسامح والاخوة وان الناس تسمع بعض وتفسر كل حاجة بشكل طبيعى مش لازم الافورررررررة اللى موديانا فى داهية دة
ياريت ندعوا كل واحد فى صلاتة لاصلاح ذات البيــــن بيننا ,,,,,,
ياريت نجتمع على التسامح .......ايه رأيكوا
الكل بيتكلم ...... بس مين بيتكلم صح
اتفق معاك
و أنا بقع في الغلط ده أحيانا (بس بره المنتدى) و غالبا بيكون في محيط العائلة .
المناقشات الجادة و المفيدة و كيفية الحوار الراقي هي أمور 95% من البيوت لم تقم بتنشأة أبنائها و تدريبهم عليها و إعدادهم لمخالطة الناس بكل إختلافاتهم .
اللسان هو أكثر عضو (يعمل إختياريا) في جسم الإنسان يستخدمه صاحبه ، و لو تم عزل الإنسان عن الناس لقتل نفسه من الوحدة ، و رغم أهمية الكلام و التعبير عند الإنسان لهذه الدرجة إلا إنه في نفس الوقت متعلمش و مش عايز يتعلم إزاي يتكلم و إزاي يستقبل كلام الناس و إزاي يعلق على كلامهم بدون تجريح و بدون مجاملة أيضا .
المشكلة ديه موجودة من زمان ، فقط الإحساس بيها هو اللي زاد في الوقت الحالي عند بعض الناس .
الكلام مع الناس له أصول محدش علمهالنا و إحنا صغيرين و اللي بيكبر من حجم المشكلة هو الإحساس بعدم الأهمية عند الطفل و ده جريمة بترتكبها أغلب الأسر المصرية مع أطفالهم اللي كبروا دلوقتي و بقوا رجالة و فيه منهم زملائنا في المنتدى .
إنك تكون و إنت طفل محدش بيسمعلك ديه بتبقى جارحة ليك جدا ، و بتسيب أثر سيئ عميق في نفس الطفل ، و يبتدي ينظر للمجتمع اللي حواليه على إنهم وحوش و لو متعلمش يخربش هيضيع.
و من هنا البداية .....
بداية عدم التسامح و الكلام السليط و الخربشة في المعاملة ، و كل ده بدأ بدافع حماية النفس من إجتياح الآخرين و تسلطهم و تهميشهم للطفل اللي بدأ يكبر و عايز يحس إنه كيان معترف بيه و له عقلية جيدة ممكن توصل لحلول للمشاكل أحسن من اللي بيقترحها الكبار .
و يكبر الطفل و يكبر معاه الوحش اللي جواه .
كلنا متفقين على إننا كلنا لازم نتبع الرسول - صلى الله عليه و سلم - و نقتدي بيه في المواقف المختلفة مع التسليم بإنه شاف في حياته اللي أصعب من اللي بيشوفه الواحد مننا .
و رغم ده محدش (إلا القليل القليل القليل) بيفتح سيرته و يكون مليان رغبة في التعلم من هذا الرجل العظيم .
حياتنا الدنيا واخدانا لدرجة إهمالنا للأصول اللي هتخلي حياتنا أحلى لو مشينا عليها ، بس الأول لازم نعرفها و بعدين نتعلمها و بعدين هنغلط (مفيش مشكلة) و أكيد هنتقن في الآخر كل تلك الأصول و القواعد الذهبية للحوار مع الآخرين و التعامل معهم بلباقة .
مش عيب إني أكون جاهل لمهارات معينة حتى لو سني 40 سنة (مثلا) ، إنما العيب لما أكابر و أقول أنا زي الفل ... أنا مفيش فيا حاجة غلط ... الناس هم اللي مش فاهمني ... يا سلام عليا و على أفكاري اللي مفيش زيها ... أنا عقلي يوزن بلد ........... إلخ
شكرا ليك جدا إنك فتحت الموضوع ده للمناقشة و للعظة و لعلها فرصة لكل واحد فينا يرجع يقرأ مشاركاته و يحكم بكل إنصاف على اللي كتبه هو محدش غيره و يشوف حالته الكلامية صحتها إيه ؟
لو لقى كتاباته لبقة و مفيش فيها تجريح يبقى يحمد الله و يعاهد نفسه على الإستمرار .
لو وجد كتاباته فيها تجريح أو تقليل من شأن أحد أو إستهزاء (حتى لو بالتلميح) أو سخرية مباشرة و غير مباشرة ...... إلخ ، ساعتها لازم يقف مع نفسه وقفة جادة و يفتح الكتب اللي متخصصة في مهارات الكلام اللبق و يستعين بأقرب الناس إليه اللي هيعرفوا يساعدوه في التخلص من أسلوبه الخاطئ في الكلام مع الناس و هيصبروا عليه لحد ما يتقن الأسلوب الجديد و يبقى لبق في الكلام و منصت للآخرين و يختلف في الرأي دون خسارة الود .
الكلام في الموضوع ده مينتهيش أبدا لأن المصيبة في مجتمعنا كبيرة كبيرة كبيرة .
و أخيرا كل خطأ فيما كتبت فهو من عندي ، و أي صواب فهو من توفيق الله .
طولت عليكم و كتبت كلام كتير ، لذلك أعتذر عن الإطالة .
تحياتي للجميع
