الموضوع: تحذير من طريق شبين القناطر .. للاسف اتثبت

قدر الله وماشاء فعل

اللهم اجرني في مصيبتي واخلفني خيرا منها

امبارح رايح شبين بوصل خطيبتي لاختها عشان تعبانة اتفاجئ بواحد بيقلبلي نور وعايز يعدي طبعا فتحتله الطريق عشان انا بمشي على مهلي والدنيا ضلمة وياريتني ماعملت كدة

لقيت شيفروليه الدبابة الشكل الجديد لونها احمر من غير نمر عرضت قدامي فجأة ونزل منها مسلحين

طبعاً محستش بنفسي غير وانا جايب ال r ودايس بنزين على الاخر ولولا رابط الحزام كنت عرفت اتفادا الاوتوبيس اللي راكن لاني مش عارف ابص ورايا

كان كل همي محدش يأذي خطيبتي

وبكل سرعتي دخلت في الاوتوبيس كانت حوالي 50 كيلو

طبعاً جريوا عليا ونزلونا من العربية قولتله خدو كل اللي انتو عايزينو ومتعملوش اي حاجة
خدو الموبيل مني والفلوس وكل حاجة ومن خطيبتي خدو الشنطة كلها واقعدة يضربوا نار عالاهالي هناك وعالبيوت عشان محدش يخرج

جم طبعاً ياخدو العربية لقو انها مبتتحركش ومش نافعة وانا كل ده بردو واقف قدام خطيبتي عشان محدش يأذيها او ممكن كانوا ياخدوها كمان بس ربنا ستر

بعد ماجريوا لقيت بوكسين شرطة ومدرعة جيش جايين بعد حوالي دقيقتين من نفس الاتجاه اللي جم منه .. جم بصوا ومشيو طبعاً محدش اتكلم

انا في اللحظة دي مكنتش مصدق الموقف وحاسس انه كابوس فظيع .. ولحد دلوقتي حاسس ان الكابوس مستمر

اللي صعبان عليا في الليلة دي هيا خطيبتي جالها انهيار واغمن عليها

الحمد لله انا مش زعلان على اي حاجة وقدر الله وماشاء فعل بس اللي زعلان عليه هو الموقف واني ورطت خطيبتي معايا اللي ملهاش ذنب

تحذير وياريتنا نخلي بالنا منه بجد محدش يمشي عالطريق ده بعد الساعة 10 واللي مضطر يمشي ياخدها طيران

الخساير عندي في العربية تقريباً محتاجة نص خلفي لان الرفرف والشنطة والاكصادم متدمرين تماما بس الحمد لله بعيدة عن فردة الشاسيه لاني دخلت في اوتوبيس بس عندي سؤال هل ممكن اعمل المحضر عشان التأمين والعربية في مكان تاني ؟؟ لاني اخدتها على ونش خد 500 جنيه حسبي الله ونعم الوكيل في الاستغلال ....

وبجد انا حاسس ان زي مافي ناس ولاد @#$ في البلد دي في ناس جدعان بجد ومش ممكن انسي وقفة الناس معايا هناك بجد ناس محترمين وطيبين اوي مسابونيش غير والعربية متشالة عالكساحة وكانوا بيتحايلو اني ابات معاهم والصباح رباح خصوصا اني داخل بيتي الساعة 4 الفجر