حادثة سانديرو وقطع الغيار
السلام عليكم
انا حابب اشاركم تجربتي مع السانديرو وقطع الغيار
الاسبوع اللي فات عربية بنتي سانديرو 2013 نزلت لقيتها مخبوطة خبطة شديدة وهي مركونة وطبعا لا حس ولا خبر وماحدش شاف حاجة وواضح ان الخبطة من عربية فيها حديد يعني نقل او كارو
الخبطة في البابين من الجنب اليمين الباب الامامي اتكسرت الاكرة والكالون اتشال من مكانه والباب الخلفي متطبق وجزء منه حوالي 3سم الصاج مقطوع بس الحمد لله القايم السليم
العربية اتسمكرت وان شاء الله بكرة يخلص الدوكو المهم قلت اجيب الاكرة بتاعت الباب فكلمت التركيل قالولي الاكرة موجودة في ابو رواش والعبور وسعرها 230 جنيه غير الضريبة ونظرا لان النهاردة الجمعة فقلت اشوفها في شارع دمشق في مصر الجديدة وللاسف ما لقيتهاش في اي محل هناك وكلهم اجمعوا غلى ان معندهمش قطع سانديرو
المهم وانا راجع على بيتي في المعادي قلت اشوف منطقة صقر قريش اللي قبل المعادي وكان اول مرة ادخل هناك والحقيقة اتفاجئت بكمية كبيرة جدا من ورش تصليح الرينو ومحلات كتير لقطع غيار الرينو والبيجو ومحلات استيراد خاصة بالرينو والحمد لله لقيت الاكرة وسعرها 75 جنيه (جديدة مش مستعملة) ولقيت عندهم قطع غيار كتير للسانديرو واللوجان فحبيت اشارككم المعلومة علشان لو حد محتاج قطع لعربيته الرينو ان شاء الله يلاقيها هناك