الموضوع: تحويل الانترا 2006 من مانوال لاوتوماتيك

صديقي المواطن
كل كلام اﻹخوة الزملاء اﻷعضاء اﻷفاضل ألكرام أعلاه كله سليما وعين العقل
ولكن مفتاح السر في هذا الموضوع هو مين اللي حيقوم بمسؤولية قلب عربية من مانوال ﻷوتوماتيك مفتاح السر هو الصنايعي المفكر النظيف الشاطر وبما إنه موجود في مصر ولكن ﻷن مصر كبيرة فبيبقه نادر وبيضيع وسط الزحمة والتجارب السلبية التي تخلي اﻷعضاء أعلاه ياخدوها من آصرها ويوفروا عليك ويدوك نصيحة بلاش منها تعملها عشان كل ظنهم أكيد حتتكعبل في صنايعي درجة سابعة
ولكن التعديل من مانوال إلى أوتوماتيك موجود وبكثرة ومئات العربيات بتتقلب كل يوم على مستوى الجمهورية والقلب له طريقان
الطريقة اﻷولى
هي بتاعت عامة الشعب ببروح يسأل عن الفتيس اﻷصلي بتاعت نفس موديل عربيتك وبيجيب الكماليات من عصاية وعدادات وفيبرات وسربنتينة تبريد زيت الفتيس ويحط ألف جنيه أو ألف ونص تركيب والسلام بقت أوتوماماتيك والصنايعي الشاطر حيعرف يخليها تبان إنها نازلة كده من بلادها

الطريقة الثانية
وهي طريقة الخبراء والمعدلين والمحترفين ودي بتكون مثلا صاحب العربية خبير بالفتايس وقدراتها وعارف إن الفتيس اﻷصلي بتاع عربيته مثلا 4 نمر ميكانيكي وهناك 4 نمر ميكانيكي والخامسة كهربا وهناك ثلاثة ميكانيكي والرابعة كهربا فهو عايز يقلل آر بي إم ويزود سرعة العربية ويقلل صرف البنزين فيحاول يدور على فتيس قريب ويحورله قواعد ومداخل ويفضل يكون 4 ميكانيكي والخامس كهربا بزرار منفصل أوفر درايف ودي اللي بيعمل الموضوع ده صح هو بتاع فتايس راقي وليس ميكانيكي

تكاليف تغيير من مانوال ﻷوتوماتيك هي تتراوح من 4 آلاف إلى 25 ألف و 80% من العربيات تكاليف النقل هي أقل من 10 آلاف جنيه بحدود 7 أو 8 آلاف حسب الفنش والنفاصيل
والفيرنات مثلا بيركيولها ب 5 آلاف جنيه
وهذا ما لزم بيانه ودمتم
وبالتوفيق وإلى اﻷمام
ومن نصر إلى نصر
ودمتم للنضال

سيدى الفاضل المحترم.
احنا فى المركز عندى عملنا القصه ديه فى عربيات انواع مختلفه حوالى 5 مرات والحمد لله . الموضوع بسيط مش صعب بس مكلف جدا .
نصيحه لو عاوز تعملها باقل التكاليف . اولا تشترى حاجتك من بورسعيد. هى بعيده شويتين بس والله هاتفرق معاك فى حوالى 2000 جم فى المشتريات .
فاعتقد انى المبلغ يستاهل .
ثانيا . مش اى حد يشتغل فى العربيه . خلى اولا مركز محترف يشوف العربيه . ويكتبلك الطلبات كلها. واسال عليها فى الحرفيين . وتوكل على الله .اطلع على بورسعيد. انا ممكن اجى معاك لو تحب. اساعدك بدون مصنعيات . والله ماقصدى اجيب شغل ولا حاجه. انا عارف اصلى انك ممكن حد يفهمك انوا كويس فى الموضوع ده . وتلاقى نفسك العربيه مهيسه معاك فاهمنى .
احسبها وتوكل .