ياريت حد يفيدني عشان انا قربت ابيع العربية من كتر الدوخة

**dody_jaja** · 22-03-2014 12:17 AM

انا عندي مشكلة في العربية مطلعة عيني ومدوخاني ومغلبة الميكانيكي بتاعي
انا لسة شارية العربية مستعملة هي اوبترا اتوماتيك 2006، لما اشتريتها قلت احسب معدل الاستهلاك للبنزين، لقيتها بتعمل 120 كم في الصفيحة، ودة معدل ضايع طبعا، الميكانيكي بتاعي شغال في توكيل دايو، شاف العطل على الكمبيوتر طلع ان حساس الشكمان قرايته ضعيفة جدا، غيرناه بواحد تاني القراية بتاعته مظبوطة جدا ع الكمبيوتر، العربية منعت الدخان الاسود من الشكمان وظبطت الحرق بس المشكلة انها بقت مخنوقة جدا جدا، يعني اول مابدوس فرامل تقريبا بتبطل، ولازم ادوس بنزين ع الاخر عشان تفك، ووتعمل فرقعة من الشكمان وتفك،
المهم الميكانيكي جرب يغير طرمبة البنزين وحساس الكرنك ومسطرة الرشاشات وغيرنا البوجيهات واتاكدنا من الاسلاك بتاعتها، وكل دة مظبطش العربية برضو وقالي كدة انا غيرت كل حاجة واول مرة اشوف العطل دة.
حد عنده فكرة ممكن يكون ايه العطل دة؟؟

**ali_kabir** · 22-03-2014 12:28 AM

خليه يراجع على حساس الماب ويجرب واحد تانى مكانه

**eng wael** · 22-03-2014 12:31 AM

حل المشكله مع الاسف مع المالك الاول للعربيه اكيد عارف عيبها وباعها على كده

**dody_jaja** · 22-03-2014 12:42 AM

معلش بس ايه حساس الماب دة؟؟

**abofandy** · 22-03-2014 01:51 AM

االلينك دة هيوضح لحضرتك ما هو حساس الماب وما هى وظيفته وازاى بيشتغل هندسيا
http://www.nilemotors.net/Nile/61890-a.html

**saddam** · 22-03-2014 07:01 AM

صديقتنا المواطنة
قولا واحدا حضرتك لو عجزتي عن إيجاد أي حل وملقيتيش نهاية سعيدة وتسرك في قصة عربيتك فكلميني حضرتك وأنا أخلصك من العطل ده ومش حاخد منك أي أتعاب دي خدمات جماهيرية بقدمها لبعض أعضاء المنتدى الكرام ولما تتحل مشكلتك وتجربي عربيتك وترجع زي الزيرو إبقي إتفضلي حاسبي الناس بنفسك أنا دوري بس أقضي على حيرتك وأمنع أي أسطة درجة خامسة قاعد يجرب في عربية حضرتكم الكريمة
نرجع ونقول خدمتي لحضرتكم مجانا مجانا مجانا وهي خاصة بأصحاب المشاكل العويصة والمتداخل فيها كذا عنصر ومن ألمس أنه فعلا محتار وملهوف ويطلب المساعدة فأنا جعلت من أهدافي إغاثة الملهوف
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**HeMa_LanCeR** · 24-03-2014 09:38 AM

اولا : الاوبترا لايوجد بها حساس ماب (حساس الماب مرتبط بببوابة الهواء)
ثانيا : العطل اللي عند حضرتك ده من حساس الشكمان :)
انتي لما غيرتية جبتية بكام وجديد ولا مستعمل؟؟؟