صديقي المواطن
حضرتك بتتكلم في موضوع متشعب ولازم تاخد بالك إنك بتتكلم في 3 أجيال وأشكال مختلفة من السيارات
يعني ال 190 إختفت سنة 1969 ورجعت ظهرت في 1983 وطبعا إستمر لغاية 1993 ودي عربية الشكل ده يعتبر من كلاسيكيات المرسيدس ودرة المقتنين وجامعي التحف ويقبل تعديلات كثيرة
يعيبه طبعا ضيق في الصالون وخصوصا أرجل الجالسين في الخلف وهذا الموديل في مصر قطع غياره نادرة جدا وأسعاره تبدأ من 50 ألف وتصل إلى 95 ألف وحالات مرفوعة توصل ل 110 ألف ولكن مشكلة هذا الموديل أوائله ليست بجمال أواخره يعني تبص فرق السما للأرض مثلا ما بين 83 أو 93 وهم أصلا عربية وحده بس اﻹضافات والتحديث تلعب دور كبير
نيجي لل 200 وال 230 وده برضو في السبعينات يعني شكل الخنزيرة لغاية سنة 76 وهو برضو محترم وبه شبهة الكلاسيك وأسعاره من 11 ألف ويصل إلى 40 ألف حالات إستثنائية وغالب حالاته الوسط ب 25 ألف وأفشل عربية في الموديل ده أريح في الركوب والمطبات والثبات من عربيات موديل 2014 تعمل 150 أو 160 ألف جنيه والموديل ده قطع غياره موجودة
النوع اﻵخر
المعدل وهو 200 و 230 أيضا وفيه منه 250 وجاء ستة سلندر دبل كاربريتير
أكثر عربية مرسيدس محبوبة في مصر ومش عارف ليه علاقتي العاطفية وحشة بيها ومش بعرف أحبها جايز ﻷن كل ملاكها مثلا معظمهم مرتبط ببناء اﻷبراج المخالفة القبيحة وكله في المخالف فمبحبش ملاكها وهي طبعا من موديل 77 إلى آخر 84 وأيضا المكن ال 4 سلندر اﻷسود واﻷبيض ومانوال وأوتماتيك الفتيس اﻷسود ب 4500 جنيه وما دامت المكنة 4 سلندر فحتى ال 230 في المرور بلعبة بسيطة حتلاقيها متسجلة 200 ثم أسعارها مرتفعة نسبيا جدا ﻷنه عليها طلب جامد لا زال وتبدأ أسعار المكسر فيها من 25 ألف ويصل إلى 76 ألف للحالات الشاذة المرفوعة وأغلب سيارات هذا النوع معدل النظيف بتاعها 47 ألف جنيه مانوال وقطع الغيار متوفرة بشدة في بورسعيد وفاقوس ومحلين في الحرفيين ومحلين في الوكالة
نيجي للزلموكة ودي من 85 وﻷواخر 93 وطبعا أوائل الموديلات من غير باكيتات فكان شكلها مش عاطفي ومحركاتها 300 و 200 و 230 و 260 وآخر الموديلات نزلت بها ماكنة الشبح المغلقة 320 السوداء
وطبعا لا زالت لليوم أكبر ألغاز المرسيدس في مصر فلا زالت وهي في 2014 لو كانت كامل المواصفات ومليانة تعديلات وحداثة فلا زال تصميمها لما توقف في إشارة يغطي على شكل عربيات موديل ألفين ودلوأتي أنا بيزعلني منها بس التصميم السخيف الغريب اللي نفذته مرسيدس في الشكل ده بالذات ومرجعتلوش تاني عشان كان مدايق الناس وهو إن المرايا الجانبية مش شبه بعض وحده مربعة ووحده مستطيلة وأنا لو رجعت إشنريتها تاني حلغي المرايات وأصمم مرايات على مزاجي قطع الغيار موجودة بكثرة وعلى العربية طلب وأرخصها ب 67 ألف وأغلاها ب 120 ألف جنيه حالات شاذة جدا 140 ألف وتكثر في هذا الموديل وفي المعدل حالات النصاص المتلحمة ومعظم أسعار هذا الموديل تقع بين 76 ألف و 88 ألف جنيه
اﻹصلاح لكل المرسيدس القديم معدل وخنزيرة هي فاقوس وفي أماكن أخرى لازم مصلحين عواجيز 60 سنة فما فوق عشان حافظينها الشباب مبيفهمش فيها
الزلموكة ليها ميكانيكية وورش معينة والميكانيكي العادي مبيفهموش فيها
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال
ملحوظة 90% من الموديلات أعلاه بتعدي فيها سرعة ال 220 وإنت مطمن وبسلاسة
المفضلات