الموضوع: عاجل .بخصوص شاليهات موسي كوست مصر ايطاليا

السلام عليكم
تسمحلى حضرتك أوضح بعض الأمور باعتبار أن عندا بعض الخبرة فى راس سدر و امتلك أكثر من عقار هناك
أولا راس سدر مكان رائع باعتباره من أجمل الأماكن فى مصر المشكلة انه مش وأخد حقه علشان إجراءات نفق الشهيد احمد حمدي و بعد المسافة قليلا مقارنة بالسخنة
ثانيا راس سدر اربع قطاعات بداية عيون موسى ثم راس سدر ثم راس مطارمة ثم حمام فرعون
ثالثا. الشركات الجادة فى راس سدر قليلة جداً و هناك مشاريع تم الإعلان عنها من ١٠ سنوات و لم تكتمل حتى الآن و معظمها هياكل خرا سانية
رابعا افضل القطاعات من ناحية الشاطئ هى راس سدر و حمام فرعون و جنوب راس مطارمة و هناك المد و الجزر غير قوى زى قطاعات عيون موسى و راس مطارمة الى صعب تستمع بالبحر لو القرية مش عاملة بحيرة داخل البحر
خامسا قرية موسى كوست من أجمل القرى و ليس أجملها و لكن البحر هناك مش حلو و لكن سعرها مبالغ فيه جداً و يستغل قربها من القاهرة
فيه قرى كتير جادة و أجمل من موسى كوست و بأقل من نصف السعر خاصة فى قطاعات راس سدر و حمام فرعون
و اى تساؤل أنا فى الخدمة

المشاركة الأصلية كتبت بواسطة shiko85

ممكن اعرف من حضرتك اسماء القرى اللى حضرتك بتتكلم عليها ؟؟؟
و لو امكن متوسط الأسعار كام و من خبره حضرتك ايه افضلهم
فأنتظار الرد ان شاء الله

ماشى ياباشا نبدا بقرى المستوى الاول
القرى دى من اجمل القرى فى مصر بجد هتستمتع فيها بس هى غالية حبيتين
اولها بردايس راس سدر و هى اجمل القرى فى راس سدر و الى عمل القرية دى مصريين من اصل ارمنى محافظين على كل حاجة فيها و ملحق بها فندق طبعا هى استيل جدا كانك خارج مصر. بس هى غالية شوية بس نجوم المجتمع هتلاقيهم هناك مفيش فيها تهريج. و لا حد ممكن يخالف قواعد القرية و بيختاروا الناس الى بتشترى عندهم كويس علشان كده عمرهم م بيعملوا اعلانات طبعا الوضع ده منعكس على السعر الشاليه سادس صف من البحر يعمل حوالى ٦٥٠ الى ٧٠٠ الف و يمكن اكتر. اخر معلوماتى انهم فاتحين باب الحجز لمرحلة جديدة يمكن خلصت و يمكن لا ملحوظة اقل شاليه ١٢٥ متر متشطب
تانى القرى هى هاسيندا. قرية هايلة فيها كل الى نفسك فيه على الطراز الاسبانى بس برضع سعرها غالى زى براديس
قرى المستوى الثانى
قرى رائعة ايضا و لكن اقل قليلا فى المستوى من براديس و هاسيندا
طبعا اولهم موسى كوست بس غالية جدا
اميرة سدر و فيها فندق الباتروس معرفش ان كانوا بيبيعوا و لا لسة
ريفيرا سدر و دى اسعارها فى حدود ٤٠٠٠ المتر بس بتشوف البحر من كل شاليه فى القرية القرية على شكل w
هوليداى فانتازيا قرية جميلة و الشاليهات تتراوح بين ٣٥٠٠ و ٥٠٠٠ المتر
جولدن بيتش ١ برضه اعتقد انها خلصت و متوسط السعر فيها ٤٠٠٠ المتر
لابلايا سدر اخر قرى راس سدر بالقرب من حمام فرعون الاسعار من ٣٠٠٠ الى ٥٠٠٠ النتر
قرى المستوى الثالث
قرى قد تكون جيدة و لكن الخدمات قيها محدودة او المستوى فيها مش عالى قوى
مارينا سدر
جولدن بيتش ٢ حلوة بس الشاطئ فيها سئ
بالم بيتش بتاعة المخابرات
بلو لاجون و دى ممكن تلاقى فيها باسعار مناسبة جدا لغاية ٣٠٠ الف جنيه شاليه كويس جدا و القرية حلوة مش سيئة
بلو باى القرية موقعها حلو و لكن المرافق سيئة و اسعارها رخيصة
الحياه مش بطالة بس المساحات الفعلية غير المكتوبة فى العقد خالص
القرية الهولندية ممكن تلقط شالية بسعر كويس و القرية مش بطالة
المستوى الرابع
تكره نفسك و اليوم الى حد قالك تشترى فى راس سدر
و هى على االاخص
كوين بيتش
فرجينيا
بنت السلطان
مسلة بيتش
بنانا بيتش
االباقى كله نصابين و على الاخص
غادة سدر بقالها ١٠ سنين تحت الانشاء
وايت ويف شرحه
يارا كوين ١٣ سنة تحت الانشاء بتبيع و تستثمر الفلوس و بعد ٣ سنين ترجعها و هكذا
مينا بيتش ٣ سنوت اعلانات و لسة مفيش حجر واحد و بتبيع دلوقتى فى المرحلة الثانية
بورسالينو ٧ سنوات تحت الانشاء
اوليمبيا ريسورت ٦ سنوات تحت الانشاء
نيجى بقى لنصيحتى الشخصية
السعر مقابل القيمة
لابلايا ممكن تشترى شاليه ٧٠ متر فى حدود ٢٠٠ الف القرية قائمة بالفعل و جميلة جدا و لكن هى ابعد قرى راس سدر
بلو لاجون ممكن تشترى شاليه ٤٠ متر فى حدود ١٥٠ الف قرية معقولة جدا مش وحشة و موقعها ممتاز وسط راس سدر
و اى سؤال تانى انا فى الخدمة
ملحوظة اذا انشا مطار راس سدر لن ترى هذه الاسعار تانى بس بقالنا ٦ سنين بنسمع على
المطار و على مشروع المارينا. الى هيخده ساوير س

اعتقد والله اعلم ان افضل حل للشاليهات انك تشترك مع اخواتك في شاليه
يكون لكل واحد فيكم حق شهر ف الصيف
ودا اضمن وارخص حل
لكن تدفع 700 الف في شاليه - دا انت لو اجرت شهر كل سنه حتي يتوفاك الله مش هتدفع 1/10 من المبلغ دا

المشاركة الأصلية كتبت بواسطة mustafavet

اعتقد والله اعلم ان افضل حل للشاليهات انك تشترك مع اخواتك في شاليه
يكون لكل واحد فيكم حق شهر ف الصيف
ودا اضمن وارخص حل
لكن تدفع 700 الف في شاليه - دا انت لو اجرت شهر كل سنه حتي يتوفاك الله مش هتدفع 1/10 من المبلغ دا

استاذى كلامك صحيح لو الغرض الفسحة بس و لكن فى مصر الوضع مختلف
يعنى الشاليه الى دلوقتى ب ٧٠٠ الف كان من ١٠ سنين بكام
اقولك و انا بشتغل بره عام ٢٠٠٤ اشتريت شاليه دور واحد بجنينة الشالية ١٥٠ متر و الجنينة ٣٠٠ متر كان تمنه بالتقسيط على ٥ سنين ٢٥٠ الف محستش بيهم دلوقتى لو حبيت ابيعه بعد ١٠ سنين بسافر ليه كل اسبوع تقريبا يعنى حوالى ٦٠ يوم بقضيه فى السنة يعنى ٦٠٠ يوم فى العشر سنين لو اليوم ب ٣٠٠ جنيه متوسط يعنى ١٨٠ الف جنيه و فرتهم بالاضافة الى الارتفاع الجنونى فى الاسعار ممكن ابيعه باضعاف تمنه لو حبيت بالاضافة الى احساسك بالخصوصية و انك ممكن تسافر فى الوقت الى تحبه لو زهقان او مضغوط و لو حبيت
اقولك حاجة تانية واحد صديق بنعتبره مجنون اشترى شقة فى اليونان عام ٢٠٠٥ بحوالى ٩٠ الف يورو و بياجرها دلوقتى عن طريق شركة متخصصة اقولك الشقة بتجيب فى السنة حاليا صافى ٢٥ الف يورو و كمان ليه شهر فى السنة يقضيه هناك يعنى جاب تمن الشقة من زمان و الشقة حاليا سعرها ٣٥٠ الف يورو
الى انت شايفه غالى دلوقتى هتقول بعد كام سنة معقولة كان قدامى بالسعر ده و مخدتش و اعتقد ان ده حصل لكل من تعدى الاربعين و كانت ظروفه المادية كويسة و مرضاش ياخد فى الرحاب مثلا ايام ما كان قسط الشقة ٦٠٠ جنيه فى الشهر على ٧ سنين