الموضوع: ساعدوني موبايلي اتسرق و بحاول ارجعه

السلام عليكم و رحمة الله و بركاته

انا عايز احكيلكم علي موقف حصل معايا قريب اتسرق مني فيه موبايل جديد

كنت شاري موبايل جديد من امريكا و حصل معايا مشكلة مادية اضطريت ابيعه
عرضته علي دوبيزيل و كلمني واحد عشان يشتريه
المهم اتفقنا علي المكان و الزمان و رحت اقابله
لاقيته مستنيني بعربيه و معاه واحد
ركبت معاهم ( غبااااااء مني بس ساعة القدر الحمد لله ) واحد منهم طلب مني الموبايل يشوفه اديتهوله
و بعدين جينا عند حته فاضيه وراحوا قالولي انزل و هددوني بمطوه و مسدس
لما نزلت كان معايا علبة الموبايل
و بعد ما نزلت اخدت رقم العربيه بسرعه لما شافوني باسجل رقم العربيه رجعوا لورا بس العربيات اللي جايه من وراه منعته
و انا جريت
المهم طبعا عملت محضر و سجلت فيه رقم العربية و مارضيوش يسجلوا في المحضر رقم الموبايلات اللي كانوا بيكلموني منها
المهم انا عرقت من ظابط مرور ان العربية مش متبلغ انها مسروقة و ارقاها بتقول انها مرور الجيزة ( حرفين و اربع ارقام )

لسه طبعا هاروح النيابة اعمل اذن تتبع للموبايل و ضبط و احضار للعربية و لصاحبها و هاطلب ازود ارقام الموبايلات دي في المحضر تاني بعد ما عرفت الاسم الثلاثي واحد من اصحاب الارقام دي

طمنوني ممكن الجهاز يرجع ان شاء الله
و لو حد يقدر يكون ليه معارف في اي شركة من شركات المحمول يقدر يجيبلي بيانات الخطوط دي او حتي تتبع الخط
او حد يكون ليه معارف في المرور حتي بحيث نعرف المنطقة اللي فيها صاحب العربيه عشان ازودهم في المحضر بدل ما استني التحقيقات

انا نفسيتي تعبانه جدااا بعد الموضوع ده و مضايق من نفسي و الله بطريقة فوق الوصف
اللي يقدر يساعد باي معلومة يا شباب مايبخلش الله يجازيكم خير و شكرا مقدما

المشاركة الأصلية كتبت بواسطة Land_Cruiser

ممكن تجيب اسم الحرامي اللي كلمك علشان يتفق معاك فى اﻷول عن طريق برنامج او موقع و تطابقه مع اسم صاحب العربيه اللى اخدت رقمها و لو طلعوا زي بعض يبقى ده الدليل علي انه الحرامي و ده سهل من شركات المحمول انها تثبته عن طريق سجل مكالماته
truecaller

المشاركة الأصلية كتبت بواسطة eng/ahmed_go

هوا حضرتك متأكد ان النمر صحيحة ؟؟؟ ما يمكن تكون مضروبة لان اللي هيسرق مش عبيط

المشاركة الأصلية كتبت بواسطة KemozTanta

عندك طريقين نمر العربية و علبة الموبايل
نمرة العربية ممكن يكون من غبائهم مغيروهاش ! او مأجرينها ، المهم تخليك فاكر كويس اليوم والساعة بتاعت الحادثة عشان لو كانت متاجرة من مكتب..
الطريقة التانية السريال وتعمل محضر و يروح الشركة و القصة العتيقة دي
السكة السالكة بقي هي ظابط قريبك او معرفة هيخلصلك المشوار دا في يوم وليلة ، مباحث امن الدولة زمان او الامن الوطني حاليا ليهم شبه كونتاكت مباشر مع شركات الاتصالات وفي ساعة زمن بيعرفوا مين اصحاب الخطوط او مين مركب خط جديد في تليفون ايه..

انا جبت اسم صاحب الخط عن طريق truecaller فعلا و كمان جبت اسمه ثلاثي من واحد صاحبي ليه معرفه في شركة اتصالات بس ماقدرش يجيبلي باقي البيانات ( رقم البطاقة و العنوان )

و كمان جبت اسم صاحب العربية من ظابط مرور في الشارع و اتاكدت الحمد لله ان العربيه مش مسروقة
و مواصفاتها متطابقة مع المواصفات اللي قالهالي ظابط المرور :)

انا هحاول اشوف موضوع الظابط اللي يقدر يخلصلي الدنيا

دعواتكم