تقييم صنى 2013 سوبر صالون الشكل الجديد بعد 40.000كم

بسم الله الذى لا يضر مع اسمه شىء فى الأرض و لا السماء و هو الغفور الرحيم
ملخص التجربة بعد 40.000كم و 16 شهر باستعمال نضيف جدا و حفاظ على السيارة
عربيات مملوكة حاليا و سابقا
(لانسر 1300سوبر سبورت 2004,اوبل كورسا2006 1600,اوبل فكترا1600 سى 2008 ,ياريس 2008 1300,سكودا رومستر 1600 2009)

التقييم 10 من 10 بالنسبة للسيارات من نفس الفئة فقط
1- الموتور (7/10) اداء افضل من اليارس بفارق ضئيل و أقل بكثير من الكورسا و فارق بعيد عن الرومستر
2- العفشة 6/10 افضل من اليارس و الكورسا و بعيدة جدا عن اللانسر و الرومستر
3-الثبات 6/10 فى نفس مستوى اليارس و4/10 خفيفة جدا جدا فى حالة الرياح و الهواء
4- استهلاك البنزين6/10 متساوى مع الرومستر و اللانسر و اقل من الكورسا و اكثر من اليارس
5- المساحة الداخلية 9/10 مساوى للرومستر و افضل بكثير من الأخرين حتى الفكترا سى
6- الكماليات 7/10 مساوية للانسر و الرومستر و افضل من الأخرين
7- مصاريف الصيانة 6/10 مساوى للانسر و اليارس و اكثر من الرومستر و الكورسا بكتيييييييير
8- اسعار قطع الغيار 4/10 مبالغ فيها جدا جدا فى نفس اسعار اليارس و اللانسر علما بأنهم يابانى لكن الصنى صينى و هندى و اندونيسى و مصرى و لا يوجد قطعة واحدة يابانى
9- التكييف 9/10 مساوى لليارس و اللانسر و لكن افضل فى التأثير على السحب منهم
10- التوكيل 9/10 عارف غلطته و واقف ورا عربيته حتى نهاية الضمان فقط واقفة راجل
11- الأعطال 3/10 لايمكن ان تقارن بأى سيارة اخرى مثال (لانسر و يارس و رومستر 10/10 و كورسا و فكترا 8/10)
12- الصاج و الدهان و الفيبر 4/10 رديىء جدا لا يقارن حتى بالكورسا تقفيل مصرى 2004

و عشان اكون عادل و حيادى هكتب كل الأعطال اللى حصلت و انتو احكموا علما بأن جميع السيارات الأخرى بدون اعطال حتى 120.000كم باستثناء الكورسا شجرة مياه عند 80.000كم و تم تغيرها ب80ج و خرم فى الريدياتير عند 100.000 و تم لحامه و بهتان فى السقف بعد استعمال 5 سنوات
ما تم تغييره فى الضمان حتى اليوم

1- فبر شنطة 1000كم
2-مشكلة فى الفرامل الخلفية 1000كم
3- مشكلتين اخرتين و استدعاء 1000كم
4- تيل و طنابيير 1500كم و تم تغيرهم فى 5000كم
4- اجزاء من العفشة 10000كم
5- تيل و طنابيير 12000كم
6-صاجة تيل خلفى 15000كم و بلى عجل خلفى (غير موجود )
7-بلى عجل خلفى 20000كم
8- تيل و طنابير 30000كم
9-ماستر فرامل 30000كم
10- كاليبرز الفرامل 30000كم
11- باقى اجزاء نظام الفرامل و لوازمه 30000كم
12- مقصات امامية 40000كم
13- بلى عجل امامى 40000كم
14- كابلات فرامل اليد 40000كم
15- فيوزات خاصة بالولاعة (لاتعمل منذ استلام السيارة و لم اجربها كى اعرف)40000كم
16- فبر خاص بسنتر الشنطة 40000كم
17- السى دى 40000 كم به مشكلة حتى الأن
جميع ما سبق لا يشمل القطع الأستهلاكية مثل فلاتر الهواء و التكيييف ×2 و خلافه
خلاصة الحكاية
1- التوكيل محترم
2- عربية رديئة جدا جدا مستحيل تكون مكونات يابانى او هندى حتى
3- شراء الصنى كان غلطة بالنسبة لى علما بأن الشارك1600 mivc كانت ازيد ب 7000ج بس انا فضلت الشكل الجديد و لكن الحمد لله.
اتمنى انى اكون افادتكم بتجربتى و اذا افادتكم اتمنى منكم تدعولى بالهداية و المغفرة

تقرير حيادى من انسان محترم ، مجاملتش العربية و قلت اللى على العربية و اللى ليها مش تدافع عنها و تهاجم كل اللى بينتقدوها زى ما بعض الناس - ربنا يهديهم - بيعملوا ، ربنا يكرمك و يرحمك من أعطالها و تهدى سر معاك و تريحك ان كنت ناوى تحتفظ بيها و يمشيلك سوقها ان كنت ناوى تبيعها....

ملحوظة على الماشى: توكيل نيسان فعلاً واقف فى ضهر العربية دى بمنتهى القوة ، لو كان أى توكيل تانى كان زمانها ماباعتش 1000 عربية على بعض ، و ده يثبت مدى كفاءة العربيات اللى تحت رعاية وكيل أى كلام و مع ذلك فى ناس بشتريها و بينزل منها موديلات كل سنة....تخيل بقى لو العربيات دى بقت مع توكيل زى نيسان كانت عملت ايه فى السوق...

شكرا جزيلا علي التقرير المتميز
كنت مستمع فعلا وانا بقرأه

تقرير اكثر من رائع تسلم ايدك وبالتوفيق :b4_388:

أشكركم يا جماعة انا حابب انى اوضح كل تجربتى بالكامل عسى انها تنفع حد سواء هيشترى او اشترى و قابلته مشاكل فى الأول زى و خايف من التوكيل

أحييك على حيادتك .تقرير مميز

الف شكر على التقرير الحيادى

انسان محترم بكل ما تحمله الكلمه من معان
حياديه و أمانه فوق الوصف، جزاك الله كل خير ع توضيحك و أعطاك خير ما فيه و كفاك شرها
"هداكم الله وإيانا ، وغفر لكم و لنا"

اللهم ابدله خيرا منها

وطبعا يكون الوضع حنين عليك
والحمد لله على كل حال

شكرا على التقرير الرائع

شكرا لنقل التجربه

شكرا على التقرير

كل ده فى 40 الف كيلو
يعنى لو حد استعماله للعربيه كبير ممكن يخلصهم فى اقل من سنه هيبقى زبون دائم عند التوكيل

أشكركم يا رجال
بس برضه عايزين نأكد على حاجة لو اللى راكب الصنى الجديدة مركبش عربيات كويسة قبل كده هيشوفها احسن عربية فى العالم لكن لو جرب عربية عادية حتى هيبقى عنده مشكلة كبيرة دلوقتى .
المشكلة انى سألت احد المهندسين فى التوكيل عن ماذا بعد ال 3 سنوات ضمان هعمل ايه ؟؟؟لأنى اعتقد ان اقل عمر ممكن تعيشه عربية هو 5 سنوات قالى دورنا بينتهى عند 3 سنوات و بس غير كده كله بتمنه قلتله بس قطع الغيار اللى بتتغير لازم يكون ليها ضمان يعنى مجيش اغير نظام الفرامل كله و المقصات و كذا و كذا عند ال 50000كم و تيجى بعد 6 شهور تقولى ال3 سنوات ضمان خلصه قالى طالما اتغير فى الضما يبقى عمرها من عمر الضمان حتى لو متغيرة قبلها بشهر

ده المستعمل ارحم منها
هو الواحد بيشتري جديد علشان يفضل يغير ويصلح؟؟

تقرير رائع وحيادى وربنا يكون فى عونك
وشكرا على نقل تجربتك :))

جزاك الله كل خير .... انا معى نيسان صنى 2008 وسمعت من اكثر من مهندس بحكم ذهابى الى التوكيل ان الشكل القديم افضل من الجديد ؛ وقمت بقيادة النيو صنى لانها مع والدة زوجتى ( حماتى ) وحسيت بفرق السحب والاداء لصالح الشكل القديم .
..... على فكرة انا معايا الاكصدام الامامى للنيو صنى بحالة ممتازة جدا للبيع لو حد احتاجه ؛ تم تغيره بالتوكيل بواحد جديد

واخيراا بارك الله فيك وعلى تقريرك الممتاز ده .

بصراحه ربنا يكون ف عونك
كل دى حاجات اتغيرت
ده انا الاكسنت المعفنه اللى معايا من سنتين
بيتهيالى مغيرتش كل اللى انت عملته ده ف 14 سنه اللى عاشتهم

تقرير حيادي جدا ووصف ممتاز شكرا على التقرير وعلى مشاركتك في توضيح مميزات وعيوب العربية

تسلم أيدك ، تقرير هايل والله

شكرا على نقل التجربة و التقرير المتيز الحيادي ..... ربنا يجزيك خيرا.
انا معايا نفس العربية و من نفس المدة تقريبا و غيرت اجزاء كتير في الفرامل في الضمان اخرهم التيل و الطنابير و البلي الخلفي.
التوكيل خصوصا اوتوايجيبت محترمين جدا و بغيروا اللي محتاج يتغير بدون نقاش حتى لو ما اشتكتش من حاجة.

لي استفسار لوحضرتك عندك علم به : بما ان كل العيوب تقريبا طلعت في العفشة و الفرامل فهل في الدفعات الجديدة صلحوا الكلام ده خصوصا ان لو فضل الحال كدة ما اظنش ان ده هيكون في صالح نيسان من ناحية السمعة و الربح و كمان في كذا حد اشترى العربية بعد ما جبتها بفترة بس ما ظهرش عنده العيوب ده لحد دلوقت رغم انهم ماشيين عدد كيلومترات اكتر مني.

معلش أنا عايز أقول حاجة مهمة جدا الغريبة أنها بتتباع رغم كل اللى فيها ده أنا سألت أبن خالتى اللى أشتراها ,أنا اللى بقيت بأسوقها أشتريتها ليه قاللى نيسان صنى ياباني قلت له لأ دى صيني سكت شوية كده و قاللى (كأنه بيدور على مخرج من المطب اللى هو وقع نفسه فيه )أه وماله الصينى زى الفل هو في حاجة في بلدك مش صيني أنا بقى برخامة لأ صحيح أشترتها ليه سكت شوية كده وقاللى قططع غيارها رخيصة قلت له رخيصة معروف ان أي عربية ياباني (ده على أفتراض أنها ياباني ) قطع غيارها غالية سكت شوية كده و قاللى (كأنه بيدور على مخرج من المطب اللى هو وقع نفسه فيه )أه أمال كنت حأشترى أيه ريو 1400 و قطع غيارها غلية نار و عربية ضعيفة ياريس قطع غيارها غالية و ضيقة جدا من جوه و لانسر شارك العربية دى بالذات لو أتعرضت على ببلاش مش حأركبها أكسنت ار بى أنسى خالص ما بقيتش عارف أقوله أيه و الله المشكلة أنها في نفس الفئة السعرية بتاعتها في بدائل كتير جدا أزيد منها نسبة بسيطة لكن بصراحة العربية توكيلها موقفها على رجلها و الله العظيم لو تو كيلها كان واخد توكيل زى العربية بروتون كانت بروتون كسرت الدنيا في مصر بصراحة التوكيل مش مخلى على جهده جهد بيعمل أقصى مافى وسعه توكيل محترم مافيش مرة الواحد سمع أنهم قلوا أصلهم مع أي عميل حتى النيسان القديمة المشكلة أن الفرامل التيل والطنابير حيبقوا مشكلة المشاكل للعربية دى بعد أنتهاء فترة الضمان وعلى فكرة كل شيء قسمة ونصيب و البيع والشراء بالذات أمور قدرية و الله أعلم

اولا اشكركم على الردود
ثانيا معنديش اى فكرة عن الدفعات الجديدة لكن اللى متأكد منه ان المشاكل فى العفشة و الفرامل و بلى العجل امامى و خلفى و فى الخامات المستخدمة فى السيارة ككل اعتقد الحاجة الوحيدة اللى ممكن تكون اتحلت هى الفرامل بما انى بقالى 10.000كم مغيرتش تيل او طنابير
ثالثا السيارة لا يمكن مقارنتها بأى حال من الأحوال باللانسر الشارك ال mivc
كمقارنة سيارة صينى بسيارة يابانى مع ارتفاع اسعار قطع غيار الصينى كمان
صيانة ال 40.000كم ب 2350 ج طبعا ارقام خيالية لعربية يابانى حتى

أحيي حضرتك على حياديتك واتمنى ان الكلام ده لا يستغله بعضنا في بدء هجوم كاسح على عربية المفترض انها اقتصادية في المقام الأول ومش منتظر منها تبقى احسن عربية في العالم... وكون اننا استفدنا من توضيحات حضرتك لعيوبها فده يخليني احييك تاني على حياديتك وعدم تعصبك لعربيتك...
عموما ربنا يكفيك شرها ويرزقك بالأحسن دايما...

مع كامل الاحترام للتقرير 40000 كم فى 16 شهر معدل استهلاك فوق الطبيعى و التيل كما فى الكرولا مصنوع من مواد غير الاسبستوس بيتاكل بسرعه ويبوظ الطنابير ودى مشكله حقيقيه والتوكيل بيغيرهم بدون نقاش ووارد تكون اجزاء من العفشه اتاثرت بالاستهلاك العالى او طريقه قياده معينه اما الشىء الايجابى انه مفيش شكوى من الفتيس او الموتور او سخونه او تكييف ودى نقط قوة عربيات نيسان
انا معايا العربيه عامله 17 الف ومفيش اى شكوى الا تغيير التيل والطنابير عند 10000 كم

استاذ جوز مبدأيا الأسبتوس ممنوع من الأستخدام عالميا من التسعينات لخطورتة الشديدة ف حضرتك تقصد ايه ؟؟؟؟
اللانسر 2004 تم تغيير التيل اول مرة عند 70000كم و الطنابير امامى عند 100000
الرومستر التيل اول مرة عند 80000كم و لم يتم تغيير الطنابير حتى 120.000كم علما بأن الرومستر بها abs-ebd-asr-esp
و سعر التيل الأصلى الأن 450جم صناعة المانية علما بأن سعر تيل الصنى الأصلى و هو هندى 500جم

نقطة القوة الوحيدة اللى المفروض عدم وجود مشاكل بالسيارة و حضرتك بتقول غيرت تيل و طنابير فى اول 10.000 كم احب اوضح لحضرتك انك هتغير على الأقل بلى عجل امامى و خلفى و مقصات و صاجة تيل خلفى و طنابير خلفى فى خلال ال15000كم القادمين و ده مش سوء استخدام لاسمح الله و لكن لردائة خامات و مكونات السيارة
استعمالى لسيارتى استعمال عادى جدا و معظمه سفر و بدون زحام يومى اصلان لأنى فى 6 اكتوبر و معندناش زحمة
و برضه انا كلامى مقارنة ب 5 سيارات من نفس الفئة املك منهم الأن 3 سيارات احدث واحدة فيهم عاملة 150.000كم و موديل 2009
و أشكرك عل المداخلة

اقتباس:

---

المشاركة الأصلية كتبت بواسطة jos

مع كامل الاحترام للتقرير 40000 كم فى 16 شهر معدل استهلاك فوق الطبيعى و التيل كما فى الكرولا مصنوع من مواد غير الاسبستوس بيتاكل بسرعه ويبوظ الطنابير ودى مشكله حقيقيه والتوكيل بيغيرهم بدون نقاش ووارد تكون اجزاء من العفشه اتاثرت بالاستهلاك العالى او طريقه قياده معينه اما الشىء الايجابى انه مفيش شكوى من الفتيس او الموتور او سخونه او تكييف ودى نقط قوة عربيات نيسان
انا معايا العربيه عامله 17 الف ومفيش اى شكوى الا تغيير التيل والطنابير عند 10000 كم

---

مع كامل احترامى لرأى حضرتك طبعاً ، بس معدل الاستهلاك المعتاد للعربيات هو 2000 كم شهرياً و فى ناس بتعمل 2500 من غير سفر ، مجرد مشاوير شغل أو جامعة بس لو بعيد عن البيت شوية ، فا كده 2000 مضروبة فى 16 شهر يعنى 32000 ، الفرق بينها و بين ال 40000 اللى صاحب الموضوع مشيهم هو 8000 كم و ده - المفروض - انه فى عمر العربيات لا شئ ، فا كده مقدرش أقول ان 40000 كم فى 16 شهر استهلاك عالى للعربية ، فى ناس بتسافر بعربياتها و بيعملوا 5000-6000 كم شهرياً و عربيات أرخص من الصنى الجديدة زى اللوجان و الأفيو أو زيها سعراً زى البرسونا اللى جارى عامل بيها 85000 كم فى سنتين بالضبط عشان بيسافر الغردقة كتير ، غير فيهم مساعدين أمامى و مكنة زجاج أمامى و الحاجات بقى بتاعة الصيانات زى التيل و الفلاتر و السيور و كده ، و كان بيروح عصام صفا مش عز العرب خالص ، عامة زى ما أحد الأعضاء الكرام قال القصة كلها بعتمد على اللى الواحد كان راكبه قبل ما يركب الصنى....و ربنا يبارك لكل اللى اشتروها و يبعد عنهم العيوب اللى اتقالت دى سواء قبل الضمان أو بعده.....

اقتباس:

---

المشاركة الأصلية كتبت بواسطة jos

مع كامل الاحترام للتقرير 40000 كم فى 16 شهر معدل استهلاك فوق الطبيعى و التيل كما فى الكرولا مصنوع من مواد غير الاسبستوس بيتاكل بسرعه ويبوظ الطنابير ودى مشكله حقيقيه والتوكيل بيغيرهم بدون نقاش ووارد تكون اجزاء من العفشه اتاثرت بالاستهلاك العالى او طريقه قياده معينه اما الشىء الايجابى انه مفيش شكوى من الفتيس او الموتور او سخونه او تكييف ودى نقط قوة عربيات نيسان
انا معايا العربيه عامله 17 الف ومفيش اى شكوى الا تغيير التيل والطنابير عند 10000 كم

---

أيه علاقة الأستهلاك أذا كان عالى أو قليل عربية بيتعمل بيها 35000 كيلو في السنة أو حتى 50 ألف أو حتى 300 ألف كيلو- 40000 الف كيلو أستهلاك عادى و عادى جدا كمان

التيل من مواد صديقه البيئه وعشان كده سريع التاكل وده بيتكلموا فيه فى الكرولا و في معانا نيسان 2010 مغيرتش تيل حتى الان فالفكره ان التيل هو الىى بياكل الطنابير ومعلش لما عربيه تعمل فوق 2000 كم شهريا يعنى 70 كم يوميا ومفيش حته مفيهاش زحمه ومطبات و علطول رجلينا مريحه على الفرامل وده بيزود الاستهلاك
نقطه تانيه التوكيل لما قالى غيرنا طنابير انا مكنتش بشتكى من اى خلل فا العربيات اللى بتتكلموا عنها الطنابير مبتتغيرش الا لما تبقى خلاص ماتت دول بيغيروها لمجرد ريج بيكتشف باجهزة
ارجع برده وااقول ان حتى الان محدش اشتكى من موتور او فيتيس او تكييف او مشاكل سخونه ونقصان ميه او حساسات دى المشاكل اللى فعلا بتقرف ومبيبقاش ليه حل

هو 40 الف كيلو مش كتير و مش متناسبين مع كل اللي حضرتك غيرتوا
السؤال بقي ...هل باقي الملاك يعانون من نفس المشاكل ولا هي صدفه مع حضرتك ولا بسبب اسلوب القياده؟؟!!!

بسم الله الرحمن الرحيم
الحقيقة معظم الملاك بيشتكوا من نفس المشاكل بالظبط اكتر او اقل شوية و ممكن تراجعوا المناقشات هنا
انا مش بقول كده عشان اكره حد فى العربية او احبب حد فيها ده شىء ميخصنيش فى حاجة
اللى يخصنى هو اللى داخل يدور على المنتدى زى حالتى و بيسأل اجيب بالفلوس اللى شقيان بيها طول عمرى ايه !!!!!
و يمنى نفسه بأجابة صادقة مجربة .مش اجابة حد اول مرة يركبها بدل ال127 او اجابة حد راكب مرسيدس سى كلاس ده طبعا مع احترامى الكامل للأثنين .

((فَأَمَّا الزَّبَدُ فَيَذْهَبُ جُفَاءً وَأَمَّا مَا يَنفَعُ النَّاسَ فَيَمْكُثُ فِي الأَرْضِ)) سورة الرعد

أنا مصدوم الحقيقة ، مشكور على التقرير

والله مقتنع جدا بكلام حضرتك
وتقيم واقعي ووجهة نظر تحترم

ربنا يستر

اشكرك على التقرير الرائع وفعلا انت انسان محترم وجزاك الله خير الجزاء

الحقيقه تقرير جميل بس يصدم
كل الحاجات دى اتغيرت فى عربيه لسه زيرو
دى على كده تلات او اربع سنين هاتبقى كهنه
شكرا ليك على النصيحه