بسمع صوت مياه في المواسير لما بدوس علي دواسه البنزين اول ما ادور العربيه

**abo3mmar2005** · 23-03-2014 03:08 PM

السلام عليكم و رحمه الله و بركاته

ديه اول موضوع ليا في المنتدي و ياريت الاقي اجابه

بسمع صوت زي صوت مياه ماشيه في المواسير لما بدوس علي دواسه البنزين و انا بسخن العربيه اول ما ادور العربيه
و الصوت ده بيختفي بعد اول دقيقتين

حد عنده حل للصوت ده ؟؟؟؟؟

**hateeem** · 23-03-2014 03:25 PM

اعتقد الصوت ده لما بتبقى العربية باردة وبتيجى تسخنها

بس لما توصل للحرارة الطبيعية بتاعتها بتبقى مظبوطة

بس انت بتدوس بنزين ليه يا باشا ماهى تسخن مع نفسها

**abo3mmar2005** · 23-03-2014 03:43 PM

ببقي ساعات مستعجل و عايز اطلع بيها علي طول
فبدوس بنزين علشان تسخن بسرعه

هو ده يأثر علي الموتور و لا عادي يعني

**hateeem** · 23-03-2014 04:14 PM

المشاركة الأصلية كتبت بواسطة abo3mmar2005

ببقي ساعات مستعجل و عايز اطلع بيها علي طول
فبدوس بنزين علشان تسخن بسرعه

هو ده يأثر علي الموتور و لا عادي يعني

انت عموما ممكن تدور وتمشى لأن الغرض من التسخين قبل التحرك

ان طرمبة الزيت تضخ الزيت للمكنة وتزيت اجزاء المكنة مش ان العربية تسخن

فا انا عموما بسخن 3 دقايق بس و ده كلام الميكانيكى ليا

خصوصا ان العربية بتسخن اسرع مع المشى غير ما بتسخن وتدوس بنزين وانت واقف

**a7medsh3rawi** · 23-03-2014 04:32 PM

-- بخصوص صوت الميه داخل المواسير دا لان فى فراغات هوائيه فى دورة التبريد فلما تدور الموتور طرمبة الميه بتسحب من الريداتير لان مستوى الميه منخفض عن الموتور والهواء بيطلع من عند بلف الحراره والميه بتصطدم بيه وبتكون حركته بطيئه فلما بتدوس بنزين مره واحده بيزيد عدد لفات الطرمبه فبيحصل اندفاع للميه داخل مواسير التبريد لغاية ما تصطدم جامد ببلف الحراره ..
ولازم تخرج كل الهوا اللى موجود داخل دورة التبريد علشان الموتور ما يسخنش منك وممكن الميه توصل للغليان

-- فى الظروف العاديه لما تدور الموتور لازم تسيبها لغاية ما الار بى ام ينزل لمؤشره الطبيعى او لما صوت الموتور يهدى

-- انما لو مستعجل دور الموتور وامشى علطول بدون ما تضغط على دواسة البنزين لان الايدل ليرن بيعلى السلانسيه عن المستوى الطبيعى علشان تقدر تمشى بيها وهى بارده وما تطفيش منك

والله أعلى وأعلم

**احمدشلبى** · 23-03-2014 09:45 PM

مشكلة جوان وش السلندر او الوش نفسه .فهذه اشاره على بداية مرحله نقص المياه نهائيا فخلى بالك كويس من مؤشر الحراره لان زى ما قلت لك جوان او وش سلندر

**abo3mmar2005** · 24-03-2014 08:56 AM

اعتقد ده رد استاذ engonear هو الاقرب للصحه
لان الصوت فعلا بيروح بعد اول دقيقه
ربنا يجازيك خير يا رب
و الي استفاده اخري قريبا ان شاء الله

**abo3mmar2005** · 24-03-2014 08:59 AM

المشاركة الأصلية كتبت بواسطة احمدشلبى

مشكلة جوان وش السلندر او الوش نفسه .فهذه اشاره على بداية مرحله نقص المياه نهائيا فخلى بالك كويس من مؤشر الحراره لان زى ما قلت لك جوان او وش سلندر

يا باشا كتر خيرك يا رب
علي العموم انا حبقي اكشف علي العربيه
زياده في الاطمئنان

**a_mohamedsamir** · 24-03-2014 09:10 AM

وعلى فكره الكتالوج بتاع اللانوس مكتوب فيه
انك ممكن تتحرك بالعربيه بعد ٣٠ ثانيه فقط من التدوير والعربيه بارده تماما بس بشرط انك متقرصش على الغيارات لغاية مؤشر الحراره ما يوصل لمعدله الطبيعى
إنما نصيحه بلاش تزود بنزين والعربيه بارده خصوصا وهى واقفه

**abo3mmar2005** · 24-03-2014 09:17 AM

المشاركة الأصلية كتبت بواسطة a_mohamedsamir

وعلى فكره الكتالوج بتاع اللانوس مكتوب فيه
انك ممكن تتحرك بالعربيه بعد ٣٠ ثانيه فقط من التدوير والعربيه بارده تماما بس بشرط انك متقرصش على الغيارات لغاية مؤشر الحراره ما يوصل لمعدله الطبيعى
إنما نصيحه بلاش تزود بنزين والعربيه بارده خصوصا وهى واقفه

جزاك الله خير
و حعمل بالنصيحه ان شاء الله
الف شكر