حجزت السوبارو xv و محتاج نصيحة فنية

السلام عليكم

انا حجزت يا جماعة السوبارو ( اكس فى ) الهاى لاين و ان شاء الله حستلمها فى شهر 5.... و دا طبعا بعد بحث و دراسة و مقارنات بين العربيات المختلفة فى المواقع المختلفة.... كل المعلومات عنها انا عرفتها لكن فى حاجة معرفتش اوصلها و عايز اعرفها من حد اشتراها قبل كدة فعلا:

التوكيل قاللى انه مش بيركب جهاز انذار لانه ممكن يأثر على كمبيوتر العربية..... انا عارف ان فيها اصلا ايموبيليزر..... السؤال هل الكلام دا صحيح؟ طب و لو مركبتش جهاز انذار.... و الباب لو اتفتح من غير المفتاح.... هل حتدى كلاكس مثلا متقطع كانذار داخلى فيها ولا لازم نركب جهاز انذار؟

سؤال تانى معلش لاهل الخبرة.... هل ينفع نظبط العربية بحيث لما نفتح بالريموت اول ضغطة يفتح باب السواق بس و تانى ضغطه يفتح باقى الابواب؟ و يقفل السنتر لوحده لما العربية تمشي ؟ ولا الموضوع دا مش موجود فيها اصلا؟

الايموبيليزر مبيضربش كلاكس كل الحكاية ده نظام تشفير الموتور
العربية متدورش من غير المفتاح الاصلي

تمام و شكرا لمرور حضرتك ....دى معلومة انا عارفها اكيد.

نصيحة منى متلعبش فى نظام الكهربه نهائى وكنترول الابواب

شكرا كاركتار بس انا مش حلعب فى حاجة..... اللى بقولة دا المفروض انه بيكون اصلا بينزل من المصنع فى كمبيوتر العربية و المهندس بتاع التوكيل المفروض انه بيضبطه على الكمبيوتر بس.... يعنى انا قريت فى منتديات لسوبارو فى امريكا و فى استراليا ان ناس كاتبة العربية بتنزل من المصنع و فيها توصيلات جهاز الانذار جاهزة على التركيب... بس مش عارف الوضع فى مصر ايه و ليه مش راضيين يركبوا انذار حسب الطلب.... عشان كده بحاول اسأل حد بالفعل عنده العربيه

بص انت ان شاء الله مش هتحتاج الأنذار في حاجه و خصوصا ان الأنذار دلوقتي في مصر سهل اوي ينضرب زي الفديو الشهير بتاع الألنترا ان الحرامي دخل من الشباك و الأنذار مضربش ولا حاجه , الأيمبوليزر اهم بكثير و ميخليش العربيه تتحرك من مكانها يعني لا قدر الله لا قدر الله في اسوء الظروف هتكون الخساره خساره ازاز يتغير مثلا ولا حاجه و ربنا يبعد عنا و عنك كل شر , بس نصيحه بعيدا عن السوبارو تحديدا اوعي تسيب في عربيتك اي شئ ملفت للنظر و لا حتى حافظه او نوته تكون بتكتب فيها بيانات العربيه لو معاك حاجه زي كده شلها في درج التابلوه احسن لأن اللي بيجي يسرق بيفكر انه هيلاقي و لو في الورق حاجه مهمه يقايض صاحب السياره عليه و في نصيحه كمان انا شخصيا طبقتها و اظن انها مفيده انك باستمرار تغطي عربيتك الحرامي مش بيبقي عارف المتغطيه دي فيها حاجه مغريه ولا لأ و فيها انذار ولا لأ و مش بتكون عنده الجرأه يقف و يشيل جزء من الغطاء و يبص هو بيتمشى يخطف نظره ع العربيه اللي مش متغطيه لفه في الثانيه في الثالثه لغايه لما يكون شاف العربيه فيها ايه من جوه فالمتغطيه مش هتكون سهله له , ان شاء الله تستلم عربيتك على خير و ربنا يحفظهالك و يباركلك فيها يا رب

السلام عليكم
لو سمحت لما تستلمها ياريت تبعتلنا تقرير عن العربيه والتوكيل
وربنا يباركلك فيها يارب ومنع عنك شرها
سبحانك اللهم وبحمدك استغفرك واتوب اليك

شكرا m_am على النصيح.... بس انا طلبت اركب كاسيت تاتش بالكاميرا الخلفيه و فيه جى بى اس..... هو مندمج فى التابلوه بس برضه ممكن يتفك لو كسر التايبلوه و اخده.... دا وارد طبعا .... المهم دا حيبقى مغرى للى عايز يسرق ...عموما اانا ححاول اخلى التوكيل يركب الانذار ان شاء الله.....

moslim man ان شاء الله لما استلم انا تحت امرك فى اى سؤال عن العربية...ححاول اعمل تقرير

الف مليون مبروك علي العربيه المحترمه أوي أوي أوي دي ..
و أضم صوتي لصوت أخوانا الاعضاء متلعبش فيها حتي لو ينفع .. و العربيه فيها وسائل حمايه محترمه أوي .. و عمري ما سمعت عن عربيه xv إتسرقت ولا عمري هسأل ..

الله يبارك فيك يا باشا... انا خايف بس من اى محاولة لفك السي دى والشاشة من التابلوه بتاعها... حد يكسر الازاز ويحاول يسرق الكاسيت من التابلوه... ربنا يسترها ان شاء الله