البريد السريع وجمارك الموبايل
دى مشاركه رد على اخ بيسأل عن الجمارك.....نقلتها لموضوع مستقل لو حد حابب يستفسر عن حاجه..!
الحاجات بتيجى لحضرتك من بره عن طريق البريد السريع على مختلف انواعه (ارامكس-فيدكس- tnt-ups-.....)او البريد المصرى وده حسب اللى شحنهم من بره شحنهم على ايه....
لو الحاجات دى وزنها خفيف ومفيش عليها جهه عرض (هقولك يعنى ايه جهه عرض فى الأخر).زى مستندات او خريطه او هديه صغيره زى تى شيرت او شوز بتوصل لحضرتك على البيت.
طب لو حاجه وزنها او حجمها كبير وليكن شنطه فيها ملابس او برفانات ومكياجات او اكسسوارات عربيات او ماشابه..بتتحجز فى الجمارك.....وتاخد حاجه اسمها رقم محجوزه.....والجمارك بتطلب استيفاء المستندات من جهه الاستيراد اللى هى فى حالتنا هنا بطاقه او جواز سفر حضرتك. بيتدبس فى ورقه المحجوزات اللى بيتقدر عليها الرسوم وبتدفع الارضيات إن وجدت وتستلم حاجتك من الجمارك...وتحديدا من قريه البضائع...مطار القاهره..!
طب جايب حاجه عليها عرض.....زى موبايل او تابلت او اى باد او ريسيفر أو باودر او مكملات غذائيه او ادويه او لبن صناعى...أو ما شابه..
فى جهات عرض بتستوفيها حضرتك او بيقوم مندوب شركه الشحن بالعرض بالنيابه عنك....يعنى فى حالتنا دى ممكن بصوره بطاقتك يقدم على موافقه من الجهاز القومى لتنظيم مرفق الإتصالات (النترا) وبيتدفع رسوم 20 جنيه مقابل موافقه الجهاز على استيراد حضرتك للموبايل او الاى باد او التابلت.
الموافقه بتبقى فى نفس اليوم او تانى يوم وهما اجازه جمعه وسبت.
بعد موافقه جهه العرض حاجه حضرتك بتخرج فى نفس اليوم...ولو جى من مسافه بعيده ممكن تنسق مع مندوب البريد المصرى او مندوب شركه الشحن انه يخلص الإجراءات ويقف على الصرف وتروح بدرى تدفع رسومك وتصرف...
الرسوم كام؟
الموبايل والتابلت والاى باد واللاب توب و وماشابه اجهزه الاتصالات او الكمبيوتر يحاسب رسوم الجمارك بفئه صفر المئه يعنى معفاه من الجمارك لكن تخضع لضريبه المبيعات بواقع 10 % من القيمه المقبوله جمركيا......يعنى لو تليفون حضرتك قيمته 1000 جنيه هتدفع حوالى 105 جنيه بالدمغه....!
الجرابات والكفرات والهاوسينج أو اى ما كان المسمى 30 % وارد و 10 % مبيعات يعنى لو الجراب يعمل 100 جنيه مثلا يتدفع عليه 35 جنيه وارد ومبيعات 13.5 بإجمالى 48.5 جنيه تقريبا
مفيش حاجه اسمها ما عليهاش جمارك او حاجه اسمها معفاه من الجمارك...او ان الاستخدام الشخصى معفى من الجمارك..كل دى اشاعات...
لكن فى حاجتين....
الحاله الأولى ان حضرتك حاجتك ما اتحجزتش نتيجه ان مامور الجمرك بتاع الورديه دى مكنش منتبه او مزاجه رايق او ابن حلال ومش عاوز يحجز حاجه متستاهلش وانت ونصيبك..انا بيتحجزللى حاجات دون الفتح اصلا لمجرد الوصف على بوليصه الشحن.
الحاله التانيه صحبه راكب...يعنى حضرتك الحاجات جايبها معاك وانت جى من السفر.....ليك لحد 3 موبايل رسمى ....وطبعا الملابس والهدايا والرفايع كلها ...مبتدفعش جمرك غير لو جايب معاك اجهزه زى ال سى دى او بروجيكتور او ما شابه..
لو فى حاجه فاتتنى فكرنى..!!
أتمنى حد يستفيد من المشاركه..!