تجربتى بعد استلام النيو صنى 2014 واشياء مهمة جدا اكتشفتها
اولا بشركم كلكم لانى استفدت من كلامكم جدا وحابب انى افيدكم وافيد اى حد تانى جيشترى اوى اشترى ومحتاج مشورة او مساعدة انا من زمان مشترك فى نايل موتورز بس كنت عضو فى بروتون وكنت بكتب هناك لاكن دى اول مرة اكتب فى قسم نيسان المهم حقولكم كل حاجة بالتفصيل علشان تعرفو كل حاجة مريت بيها من الاول للاخر.
بعد لفت كتير لقيت اقل سعرة للعربية كان 113500 كان عند سمير ريان فبصراحة كنت خلاص ناوى اروح واخلص وبعدين فى يوم وانا راجع من شغلى لقيت توكيل مودرن موتورز اللى فى الصحراوى قولت ادخل اسأل قالى برضو نفس الكلام تسليم فورى 113500 وحجز حتستنى حوالى شهر
فبصراحة كل معرض كنت اروحة كان يقولى حتستنى من شهرين ونص ل 3 شهور فكان كتير اوى بصراحة فقولتلة شهر بالظبط قالى انشاء الله قولتلة طيب احجز بكام قالى 5 الاف جنية مكدبتش خبر تانى يوم روحت حجزت ودفعت وبعدين بالظبط 25 يوم لقيتهم بيكلمونى امبارح تعالى استلم العربية كنت مديلهم كذا لون هما وفرولى لونين اختار بيهم بصراحة ناس محترمة جدا جدا المهم رحت فعلا امبارح واتفرجت على العربيتين واخترت وكلو تمام واستلمت العربية المهم قالولى على حاجات ممكن اركبها زيادة لو احب دخلت اتفرجت ادونى ورقتين كدة فيهم اضافات كتير اوى للعربية منها سينسور بارك ووحدات رفع وانذار وكاسيت تاتش وزينون وحاجات كتير اوى بصراحة المهم اللى عجبنى اوى كافر مرايات كدة بيكرب مكان الكافر القديم وفيها ليدات شكلو تحفة بصراحة بس طبعا اضربو سعر اى حاجة فى اتنين توكيل بقى بس المشكلة انك مضطر تركب هناك علشان الضمان والقصة اللى كلكو عارفينها وركبت سنيسور بارك ووحدات رفع ورشو الكافر بتاع المرايات لون العربية والسينسور بارك برضو بلون العربية وكلو تمام واستلمت العربية تمام ومشيت المهم سميت بالله وشغلت قرأن ومشيت .
تجربتى مع العربية وانطباعى عنها بقى بكل صراحة .
اول مامشيت العفشة ناعمة بصراحة وصوت الماتور هادى وكلو تمام بس حاسس بكل حاجة تحت العربية وحاسس العربية عالية اوى اوى المهم دخلت اول بنزينة حطيت بنزين وظبط الكاوتش زى ما مكتوب قدام 33 وورا 30 وانا ماشى العربية حاسس بصوت الكاوتش عالى اوى اوى وجيت بقى ادوس فرامل لقيت العربية بتروح كلها ناحية اليمين يصورة غريبة قولت يمكن الطريق ولا حاجة مشيت شوية واجى افرمل تانى الاقى برضو الدركسيون بيلم ناحية اليمين والعربية بتروح ناحية اليمين جامد اوى فقولت يمكن الكاوتش مش مظبوط مقاسة دخلت على محل كاوتش تانى وقولت انقص شوية من العجلة اللى قدام خليتها 32 قدام و 30 ورا ومشيت وادوس فرامل الاقى العربية برضو بتحدف يمين بدرجة رهيبة لدرجة انى قولت اكيد فى ماستر بيمسك اكتر من ماستر وحقولهم عليها فى صيانة الالف مش مشكلة المهم مشيت فى حتة فى طوب وتكسير على الصحراوى ومش عايز اوصفلكو بقى على الصوت اللى سمعتة بعدها حسيت انى لميت طوب وزلط الشارع كلو فى الكاوتش مشيت حوالى 4 كيلو ولا حاجة مزيكا حصبالة ماشية معايا وصوت دوشة جدا بالرعم من انى قافل الزجاج قولت بص بقى بجملت المصاريف مبدهاش انا حغير الكاوتش وخصوصا انى كنت قريت من مشاركات اعضاء محترمين هنا ان نوعية الكاوتش مش حلوة اوى المهم دخلت على اول محل كاوتش قابلنى قالى اخدو ب 500 جنية دة صينى يابية قلتلة دنا ارمية قى الشارع احسنلى دى العريية ماشية 30 كيلو حرام عليك يعنى المهم روحت لواحد تانى وثالث واخيرا اخر سعر وصلتلو كان 800 جنية فى الاربع فرد قولت المهم اخلص قولت بقى اجيب الكاوتش اللى على مزاجى وكنت عايز بريدج ستون بصراحة لانى دايما بركبة فى عربياتى بس ملقتش بصراحة عند الراجل لقيت عندو بيرلى وكونتننتال بس عجبنى نقشة الكونتنتال اكتر قولت بقى اغير المقاس اللى كان راكب 15 185 65 قولتلة ممكن اركب 15 190 60 قالى اشوف ابعاد الجنط واقولك المهم قالى ينفع تمام قولتلة طيب فرقة اية بينة وبين الكاوتش القديم قالى حيزود العرض 1 سم والارتفاع حيقل 9 ملل تقريبا
قولتلة تمام اوى اتكل على الله وركبتة فعلا وحاسبنى الفردة على 600 جنية ودفعت الفرق وتمام واتكلت على الله وكانت المفجأة الكبرى ياجماعة انا حسيت انى كنت راكب توكتوك والراجل ادانى عربية اروح بيها والمصحف مابهرج لدرجة انى مكنتش مصدق ان دى العربية اللى كنت سايقها من شوية العفشة بقت ناعمة جدا جدا جدا جدا جدا مش حاسس باى حاجة ولا اى صوت المطبات احسن بكتييييير اقولكو بقى على المفجأة اللى برضة مصدقتهاش العربية فى الفرامل مبقتش تحدف خالص وجربتها والله اكتر من 30 مرة ولا مرة حدفت فيها ناحية اليمين خالص وحسيت بقى كمان بحاجة برضو الثبات بتاع العربية اختلف جدا مش حقول يعنى بقى خرافى بس بقى احسن فعلا لدرجة محسوسة طبعا انا مجرتش بالعربية علشان بلين بس بصراحة قولت اجيب ال 100 كدة علشان الفضول كان حيموتنى لقيتها بجد ثبات احسن كتير اوى من ماكنت جايب 80 بيها لا فرقت فعلا انا مش عارف بقى لية بيسرتخصو وينزلو كاوتش منيل زى دة فى العربية يعنى متهيألى عيب اوى التوفير يوصل لحد كدة يعنى ان حاجة بسيطة اوى ممكن ييجو على نفسهم ويزودوها بس حتخلى العربية احسن وافضل لينا وليهم كمان متهيألى المهم انا عارف انى طولت عليكم جدا بس حبيت انقلكم الصورة كاملة وشكرا تانى لكل اعضاء نيسان واى سؤأل تحبو تسألوة انا تحت امركم وحاجوبكم علية على طول انشاء الله وشكرا .