الموضوع: Manor House International Schools

تجربتى معاهم للسنه الثالثه على التوالى
بدات معاهم لإبنى فى مرحله الKG سنتين
والسنه دى فى مرحله الإبتدائى سنه اولى
وده كان بترشيح من أحد أصدقائى لأنه عنده أولاده فى نفس المدرسه .

اول سنتين مشوفتش مشكله يمكن علشان المرحله
دى بيهتموا بالأطفال قوى وبيدلعوهم وبتقدر تتابع معاهم كويس
من خلال مدرسه الفصل وتعاملك بيبقى مع غالبا مدرستين
فقط ولو فى اى مشكله بتتحل تقريبا بسرعه .

لكن السنه دى شوفت حاجات منهم بصراحه خلتنى اخد قرار
انى لازم احول لأبنى من عندهم زى مثلا كثافه الفصول زادت
ووصلنا لعدد 30 ولد وبنت فى الفصل مع انهم كانوا متفقين معانا
ان العدد لن يتخطى 20 لكن فوجئنا ان ده كلام فى الهوا .

الأهتمام فى المرحله دى قليل جدا وعندهم سوء تنظيم
ولخبطه مش عارف سببها إيه خاصه إن فى السنتين
اللى فاتوا الدنيا كانت أفضل كتير .

بتتعامل طبعا مع مدرسه لكل ماده والموضوع
تايه بينهم على الرغم من ان فى مدرسه للفصل
يعنى المفترض يكون عنده إلمام بموقف الطفل من باقى المدرسات .
لكن للأسف ده مش موجود اخرها موقف الماده بتاعتها فقط .

الهم الأكبر عندهم الفلوس طبعا زى معظم المدارس
وحسيت إن الخدمه مقابل المدفوع مش على نفس المستوى

سرعه الإستجابه لحل المشاكل بطيئه جدا

يمكن بشكل عام المدرسه مقبوله لكنها
دلوقتى مش مميزه بدرس دلوقتى أكتر من مدرسه
لإختيار أنسبهم للتحويل من المدرسه الحاليه

ونصيحتى لحضرتك انزل روح المدرسه وخد جوله
فيها شوف المرافق والفصول وحاول تسأل اولياء الأمور
عن ارائهم لأنك هتلاقى طبعا تفاوت فى الاراء
ناس هتشكر فى المدرسه وناس مش عاجبها المدرسه
الرأى نسبى وكل واحد فينا بيحسبها حسب متطلباته
شوف انت عاوز ايه من المدرسه لأبنك أو بنتك
وهل المدرسه دى هتلبيلك المتطلبات دى ولا لأ ؟
وبنسبه كام ممكن تقبل بده او ترفض
يعنى اوعى يكون رأي الغير هو معيار
قبولك أو رفضك المدرسه
لازم تقيس على نفسك بشكل شخصى .

مع العلم إن حضرتك وزوجتك هتبذلوا مجهود
كبير جدا جدا لمتابعه طفلكم فى البيت ومع المدرسه
بالأخص مع Manor House

أرجو أكون قد أفدتك ولو فى أى إستفسار تحت أمرك .