حملة الله يبارك فيك خدهم معاك في طريقك

اخواني واحبتي في الله
الموضوع ده في بالي من فترة وافعله بفضل الله وتوفيقه واعلم ان كثير من حضراتكم بتعملوه ولكن احببت ان نجعله واجب وفرض عين علينا جميعا ونبتغي من الله وحده الجزاء

الموضوع بأختصار هو مساعدة الناس التي تقف تنتظر في الطريق اي مواصلة

كثير منا بينتقل بسيارته كل يوم علي نفس الطرق رايح جاي وﻻ يأتي علي بالنا احيانا ان نأخذ في طريقنا احدا معنا

طبعا انا عارف كويس اوي اول شئ بيجي علي بالنا وهو العامل اﻻمني وما وصلنا له اﻻن بكل اسف من تدهور امني

ولكن انا ﻻ اريد ان ازيل منك هذا الحذر بل اني مثلك احاذر جدا
ولكن احيانا كثيرة بتري اسرة واقفة علي الطريق رجل وزوجته وابناء وانت في طريقك وﻻ تحمل معك اشياء ثمينة تخاف ان يأخذها احد في الكنبة الخلفية هل فكرت يوما ان تقف لهم تقلهم معك

هل فكرت يوما ان تقف بجانب موقف ميكروباص او ميني باص علي الكورنيش او في وسط البلد او اي مكان مأهول بالسكان وفتحت زجاجك وقلت لبعض الناس اللي تحس انهم محترمين انا طريقي كذا اللي حابب يركب يتفضل

اخي الحبيب

انا فقط انبهك والفت نظرك وانت عليك ان تدرس الموقف جيدا وتري ما هو مناسب وما هو غير مناسب

ولكن الفكرة نفسها تحتاج منا ﻻن نفكر فيها
ممكن واحد فينا يقول خلاص انا ان شاء الله لو معايا واحد كمان في العربية هعمل الحكاية دي بحيث نبقي اتنين مع بعض

واخر سيقول لنفسه انا هختار اﻻسرة يعني رجل وزوجة وابناء

واخر يقول انا هعمل الموضوع ده في طريق كذا وكذا فقط

اعلم اخي الحبيب اننا نفعل هذه الفكرة صدقة علي ما وهبنا الله عز وجل
فهم ليسو في حاجة لنا ﻻنهم بيبحثو عن وسيلة سيدفعو فيها نقود اي انهم ﻻ يرفعون ايديهم لنا
ولكن نحن من في حاجة لهم فسعينا نحوهم لمساعدتهم في العودة لبيوتهم او الذهاب ﻻعمالهم او لقضاء حوائجهم ونحن في طريقنا لهو خير عظيم لنا وللدابة التي تحملنا

وﻻ تنسو اذكار الصباح و المساء

بالله عليكم اللي بيخاف انه ياخد حد من علي الطريق ﻻ تثبط الهمم اخي وحبيبي في الله
هو مجرد اقتراح لمن رأي ان الظروف تسمح له بذلك وهو علي اقصي درجات الحيطة والحذر

هل نبدأ في جعلها حملة ومش بعيد نفتح لها صفحة علي الفيس بوك

ارحب بأرائكم وحواركم البناء بعيدا عن العامل اﻻمني الله يسعدكم ﻻن كل واحد هينوي يشترك في هذه الحملة سيقدر بنفسه المكان والزمان واﻻشخاص وعددهم وما الي ذلك

فكرت اعمل الفكرة ده قبل كده لكن لقيت ناس يتئلئ

اعتقد الموضوع صعب تنفيذه حاليا لانعدام الامان والثقة بين الناس

فكرة حضرتك رائعة و ممتازة و الواحد نفسه ياخذ معه ناس كثير لكن في ايامنا الحالية و مع انعدام الامن و الضمير للأسف غير قابلة للتنفيذ مع الاغراب . للاسف المجرمين بيبدعوا ابداع عالي و يتفننوا في تمثيل مواقف لاستدراج اصحاب القلوب الرحيمة يعني سمعت ناس بتحكي اكثر من مشهد : زوج (المفترض يعني) يضرب زوجته بشده و يقف الضحية بالسيارة لتهدئة الموقف و يطلبوا يركبوا ثم يطلعوا مجرمين و يسرقوا الشخص او السيارة. مشهد اخر: واحده شكلها حامل و معها شخص و تستنجد بالسيارات للذهاب للمستشفي و لما تركب هي و من معها ...نفس السيناريو. و كثييييير من ده .
لكن ممكن تنفيذ الفكرة بشكل مختلف
انا والدي رحمة الله عليه كان يتنظر في سيارته و يطمئن الي ان اركب باص شغلي ثم ينصرف الي عمله لكن لو الباص اتأخر و عرفت انه مش جي. يوصلني انا اولا الي عملي و في الطريق انا اعرف ان بعض زملائي منتظرين الباص فناخذهم في طريقنا . بالمثل ممكن كل واحد عنده جار او زميل في عمله يعرف انه في نفس طريقه ممكن يوصله او لو حد من نفس الشارع و يعرفه معرفة سطحيه بس علي الاقل يكون عارف انه كويس ممكن يوصله. او اولاد الجيران لو مع اولاده في نفس المدرسه يعمل نبطتشيه كل واحد يوصل اولاد الاخر يوم .طبعا مش اي عدد يعني حسب السيارة. و ده احسن من مفيش لكن المشكلة في مصر و المصيبة ان حتي لو الواحد شاف حادث تخاف تاخد المصاب المستشفي عشان المسئولية او لو مات تلاقي نفسك متهم. يعني كانك بتمنع نفسك من الخير لان وراه مشاكل. طبعا لو شعب محترم و عنده ضمير سهل تعمل الفكرة و لو فيه قانون و نظام محدش هيدبسك في حادثة لم ترتكبها. عارف لو حضرتك عملتها حملة علي الفيس بوك و اتعرفت هتلاقي المجرمين ابتدوا يفكروا يستغلوا الموقف. افتكر حضرتك الناس من زمن كانت بتدي صدقات للكناسين في الشارع و لحم في العيد لكن بعد بضع سنوات اتعرفت الحكاية و بدأ النصابين يلبسوا زي الزبال و مقشة في رمضان و الاعياد حتي يستفيدوا و يضيعوا حق الزبال بس دي حلها ان كل واحد يشوف الزبال المتواجد طول السنة مش الاشكال اللي بتظهر فجأة و قت الاعياد. ربنا يصلح الحال

طبعا لو ناس جيران او مغرقة مفيش مشكلة ولكن اغراب لالالالالالالالا

اوقات بعمله واوقات في منطقة المصانع اكتوبر ناس بتعملها معايا وانا معيش العربية

فى يوم كنت بجيب شغل ليا من مطبعة ( بانر ) و ماشى رايح للموقف علشان اركب و اروح
انا على اول الكوبرى و ماشى عليه علشان اعدى الناحية التانية منه (الموقف تحت الكوبرى من الناحية التانية )

لقيت واحد راكب فيسبا وقف جنبى و عرض عليا اركب معاه ،، ركبت معاه و شكرته .
و فضلت باقى اليوم كله سعيد و فرحان بالموقف ده ، جزاه الله خيرا هذا الرجل .
.
.
.
شكــرا لحرصك على نشر الفكرة دى ، و اتمنى اننا نعمل بيها قدر المستطاع .

اعتقد الموضوع ده لو اتنفذ وانتشر وكل الناس بتعمل كده يبقى فى ناس كتير هاتتثبت ..
انا رأيي الموضوع ده لو حد تعرفه مش حد غريب .

اعتقد ان القرار بتوصيل او عدم توصيل الناس ده يعتمد علي درجه المعرفه بهم، يعني لو اعرف شخصيتهم او ناس تعرفهم حتي يبقي ساعتها ممكن اوصلهم و في الحاله دي هيبقي الطرفين عارفين بعض و في نوع من الثقه اما في حاله لو كان حد غريب فالموضوع خطر سواء علي قائد السياره او حتي اللي هيركب معاه لان احدهم ممكن يخطف الثاني و طبعا لا يمكن الاعتماد علي المظهر الخارجي لان اللي هيخطف حد مش لازم يبقي لابس هدوم مقطعه و لا في ندبات في وجهه زي الافلام القديمه. أومال لو حد معرفوش يبقي اسيبه؟ لأ طبعا ممكن اساعده بس بطريقه آمنه شويه و هي مثلا أني ادفع بدلا منه اجره المواصله للسائق أو ان ناس تانيه تعرفهم هي اللي تركبهم معاها و ده كمان يبقي تطبيق عملي للأقربون أولي بالمعروف

فكرة رائعه لا تصدر الا من فاعلين الخير في كل زمان ومكان
وما زال اهل الفضل موجود رغم ان القيم بدأت تتلاشى شيئا فشيئا في المجتمع المصري
اذكر موقف حدث لي ايام الجامعه فقد رأيت سيارة تاكسي وقفت بجواري وسمعت صوت السائق يناديني بان اركب معه كي يوصلني للمكان الذي ارغب به
شكرته على ذالك واخبرته ان يسير ولا يشغل باله بي فألح عليا بأن اركب فركبت واوصلني حتى باب كليتي
ورفض ان يأخذ الاجرة
جزاه الله خيرا
ادركت حينها ان اهل الخير ما زال موجود وان كان في ظاهر الامر الاغلبيه العظمى بلا قيم

جزاك الله كل خير على الفكرة

انا اوقات كتير بفكر فيها ، وفعلا ده واجب علينا

وبخصوص السرقة والأمان و و و ، فأنا شايف اننا مينفعشي ابدا نخلي الشر يخوفنا من فعل الخير ، نتوكل على الله ونحاول نختار ناس كويسة ، خصوصا انك اللى بتختار مش هم اللى بيختاروك

عن أبي سعيد الخدري قال بينما نحن في سفر مع النبي صلى الله عليه وسلم إذ جاء رجل على راحلة له قال فجعل يصرف بصره يمينا وشمالا فقال رسول الله صلى الله عليه وسلم من كان معه فضل ظهر فليعد به على من لا ظهر له ومن كان له فضل من زاد فليعد به على من لا زاد له قال فذكر من أصناف المال ما ذكر حتى رأينا أنه لا حق لأحد منا في فضل. رواه مسلم

اﻻخوة اﻻفاضل رأيت ان اغلب التعليقات بها خوف من الموضوع وحرص وحذر شديد بسبب الحالة اﻻمنية التي نمر بها في بلدنا الغالية

ولكن احبائي في الله انا نوهت في اول الموضوع انه يجب ان نتوخي الحذر وان الموضوع نسبي ويترك لتقدير من سيقوم بفعله وﻻ يجب ابدا علينا المبالغة في التحذير لدرجة المنع واﻻ
لامتنعنا عن اغلب افعال الخير التي يشوبها مشاكل وهي كثيرة
وعلي سبيل المثال ﻻ الحصر
شقة ولعت لو خفنا علي انفسنا فلن ندخل لنخرج من فيها
اصيب شخص علي الطريق لو ظللت بجانبه ممكن يفتكروني انا من اصبته فأتركه وافر وادعه للمجهول
فتاه تتعرض للاختطاف لو فكرت لحظة فيما يمكن ان يحدث لي ممن يحاول خطفها لتركتها لهم وفررت


اخواني واحبتي في الله
هدف الموضوع بأختصار اننا جميعا نملك سيارات بفضل الله وغيرنا ﻻ يملك
واحيانا بل ودائما هناك ازمة مواصلات جرب كده تسيب عربيتك وتاخد المدام واﻻولاد وتنزل وسط البلد وتحاول مثلا تركب ميكروباص او ميني باص او تاكسي الساعة 3 ظهرا
جرب كده في رمضان وكل سنة وانتم بخير باقي حوالي ثلاثة اشهر حاول تترك عربيتك وتتحرك مواصلات

الموضوع كبير يا اخوانا بالله عليكم ضعو انفسكم مكان هؤﻻء اﻻخوة و اﻻخوات في عز الحر او في عز المطر وهم ينتظرون اي شئ يقلهم وﻻ يجدون واحيانا كثيرة بنكون ماشيين من امامهم والزحمة تجعلنا احيانا نتفحصهم علي جانبي الطريق هذا وحده وهذا بزوجته وهذا مسن وهذه مسنة ومعها ابناء وهذه عائلة

كل هؤﻻء يظلون احيانا فترات طويلة الي ان يجدو ما يركبوه واحيانا اخري تجدهم اضطرتهم الظروف ﻻن يركبو مواصلتين او اكثر حتي يصلو الي اعمالهم او الي بيوتهم

طيب اقولكم علي فكرة

اللي خايف من الموضوع جرب كده لما يكون معاك صديق او زميل او اتنين معاك في العربية تقف لواحد وتعرض عليه انك تقله في طريقك
يعني بالبلدي جرب اﻻول وانت في اﻻمان

جرب متعة ان تساعد غيرك بشئ اكرمك الله به وميزك بأقتنائه عن غيرك

قال تعالي
لن تنالوا البر حتى تنفقوا مما تحبون

يا ليتكم تجربوها قبل ان ترفضوها

المشكلة فعدم الامان المنتشر

السلام عليكم
الحمد لله انا معايا 127 قديمة مش مطمع اوى " و على الرغم من كده بتتسرق هههه "
المهم انا كنت باعمل كده كتيير و بالذات مع بنات مستنية المواصلات و مع زمايلى . بس افتكر مرة موقف حصل و انا رايحة مدرستى الصبح لقيت واحدة كبيرة في السن شاورت لى وقفتلها و قالت لى وصلينى معاكى قلت لها اتفضلى و اول ما ركبت لاقيت ركب معاها 2 رجالة و كان فيهم واحد مسندينه و انا بقيت ميتة من الرعب و المنطقة كانت فاضية شوية بس من ستر ربنا كان وقت مرواح مدارس و دخلت في حارة كانت زحمة و نزلوا بس ربنا سترها معايا ساعتها و قلت حابطل اركب حد مش اعرفه . بس للاسف مش باقدر و في الاخر ربنا هو اللى بيحفظ .
اللهم تقبل منا صالح الاعمال

يا جماعة الخير

الموضوع يحتاج اوﻻ ﻻستحضار النية انها شئ لوجه الله تعالي

ثانيا محاولة الوقوف بجانب من هم في حاجة للمساعدة عل وعسي تحتاج لمن يساعدك يوما ما

ثالثا خير عظيم وان شاء الله حسنات ودعوات ستثقل بها ميزان حسناتك

واخيرا وانت بتقف انظر بعينك للوجوه التي امامك واذا قلقت بعد ما وقفت وحابب تغير رأيك اسأل فين يودي فين واهو السؤال محرمش واقفل شباكك وامشي

ربنا الحارس

انا كنت بعمل فكره شبيه للفكره دي

كنت كل ما اعدي جنب محطه فيها ناس واقفه كتير اهدي شويه و اشوف فيها حد اعرفه ولا لأ

و لما كنت الاقي حد اعرفه ( جار - صاحب - قريب ) اقف و انادي عليه و اشوفه رايح فين و اوصله

و كنت بتعمد كمان في الاماكن البعيده اللي المواصلات فيها صعبه اني اركز اكتر في الناس

و الحمد لله ياما لاقيت ناس اعرفها و وصلتها

و سبحان الله برضه ياما كنت واقف في اماكن صعبه مستني مواصله و الاقي حد اعرفه وقف بالعربيه و ينادي عليا و يوصلني

جزاك الله خيرا على الفكره

هيه بس محتاجه شويه تركيز و اختيار جيد و ثوابها عند ربنا كبير قوي

اقتباس:

---

المشاركة الأصلية كتبت بواسطة aboelsoud

انا كنت بعمل فكره شبيه للفكره دي

كنت كل ما اعدي جنب محطه فيها ناس واقفه كتير اهدي شويه و اشوف فيها حد اعرفه ولا لأ

و لما كنت الاقي حد اعرفه ( جار - صاحب - قريب ) اقف و انادي عليه و اشوفه رايح فين و اوصله

و كنت بتعمد كمان في الاماكن البعيده اللي المواصلات فيها صعبه اني اركز اكتر في الناس

و الحمد لله ياما لاقيت ناس اعرفها و وصلتها

و سبحان الله برضه ياما كنت واقف في اماكن صعبه مستني مواصله و الاقي حد اعرفه وقف بالعربيه و ينادي عليا و يوصلني

جزاك الله خيرا على الفكره

هيه بس محتاجه شويه تركيز و اختيار جيد و ثوابها عند ربنا كبير قوي

---

بارك الله في حضرتك

و فعلا ممكن تطبيق فكرة حضرتك لمن يخاف ان يقل معه اغراب بأن يركز علي المعارف لو وجدهم في طريقه و كما ذكرت حضرتك ان مثل هذه الافعال بيكون ردها في الدنيا سريعا

وفي الحديث الشريف

( مَنْ سَتَرَ أَخَاهُ الْمُسْلِمَ ، سَتَرَهُ اللَّهُ يَوْمَ الْقِيَامَةِ ، وَمَنْ نَفَّسَ عَنْ أَخِيهِ كُرْبَةً مِنْ كُرَبِ الدُّنْيَا ، نَفَّسَ اللَّهُ عَنْهُ كُرْبَةً مِنْ كُرَبِ يَوْمِ الْقِيَامَةِ ، وَإِنَّ اللَّهَ فِي عَوْنِ الْعَبْدِ مَادَامَ الْعَبْدُ فِي عَوْنِ أَخِيهِ )

تحياتي اليك

عملت الموضوع دا أكتر من مرة لأسرة أو سيدة بطفلها أو معارف
وكل مرة بكون مبسوطة لمحاولة فعل الخير
لكن لما بحكي لحد من الزملاء أو الأقارب بيخوفوني
فمازلت أعمل كدة لكل بحذر وكنت بضع إيدي على قلبي من الحكاوي الشريرة
بس الحمد لله ربنا بيستر كل مرة
ومرة ورا مرة رجعت لطبيعتي واصبحت مش بخاف
واقول لنفسي :( هو أنا أقصد أيه غير الخير !! - فأكيد ربنا هيقف معايا )
والله .. الله على الدعوات اللي بسمعها
وأعتقد إن الدعوات دي هتفتح لي باب من أبواب الستر في مواقف تانية
( بس أنا بعمل حاجة مش عارفة غلط ولا صح وتضرري الوحيد من موضوع التوصيل دا -الحاجة اللي بعملها دي !!!) ، أني لما أكون مشغلة التكييف بأغلقه - "صبراً جميل" : مش بخل ولا إستخسار في اللي هيركب معايا ، ولا خايفة من الحسد - لكن مساهمة في أحاسيسهم - مش يبقى هما في الحر والتراب وغيرهم مش معرض للأتربة والدخان والعوادم وكمان مرتحين في التوصيل ، ومش عارفة كدة صح ولا غلط !!
ربنا يستر طريقك يا باشمهندس حاتم ويستر طريقنا جميعاً .

اخى الكريم بارك الله فيك ولكن انا ايضا ما زلت ارى انه ما ينفعش يتعمل الا مع المعارف وزملاء العمل

ع الطريق ما تضمنش اي حاجة ولا تقوللى اسرة ولا كلام من ده
يا ما بيحصل تمثيليات اصلا عشان يتم توقيف الناس وتثبيتهم ، والموضوع لا يتوقف عند سرقة محتويات من العربية ، لو على قد كدة امرها سهل ..


طبعا اللى عايز يعمل الموضوع ده هو حر ولكن في نقاط لازم مراعاتها


حذار تبقى لوحدك وتركب معاك واحدة ست ما تعرفهاش مهما كان الزمان والمكان و سنها او شكلها ، لان اولا هيبقى خلوة بأجنبية وحرام ، ثانيا ممكن يحصللك مشاكل كتير لا حصر لها انت في غنى عنها وممكن الست دى يجيلك من وراها مصايب كتير وتطلع مش كويسة وتتبلى عليك وتجيبلك مصيبة ... ابعد عن الشر وغنيله وطبعا مش محتاج اقول الموضوع ده للسيدات ، طبعا مفيش واحدة هتركب راجل غريب معاها وتقوللى انا بعمل خير :d



في الاخر زي ما حضرتك قلت المواصلات موجودة والناس بتدفع مش محتاجين لحد وانا عن نفسى لو واقف على الطريق او حتى جوة البلد وانا شاب بمفردى 26 سنة ، لو حد شاورلى وقاللى انا طريقى كذا اخاف اركب معاه

يعنى الخوف والعامل الامنى متبادل مش من ناحية صاحب العربية بس ، ده سواقين التاكسى بيخافوا هاجى انا يا بتاع الملاكى و اقف للناس

وبعدين خلى بالك برضه ده عمل كويس وجميل وخير ولله وثواب وكل حاجة ولكن ان زاد عن حده وانتشر مش ده هيقطع ارزاق التاكسى والميكروباص خصوصا لو مع الوقت بعض اصحاب الملاكى عملوها سبوبة وبقى ياخدوا اجرة من اللى يركبوه ويوقفوا حال التاكسى اللى بيدفع مصاريف زيادة من اجل استغلال السيارة للنقل بأجر وفاتح بيت بالموضوع ده ..

مشروع جميل .... وكتير ربنا بيوقف لنا اولاد الحلال وكتير ربنا بيوقفنا كمان. لولاد الحلال

اقتباس:

---

المشاركة الأصلية كتبت بواسطة friendship7897

عملت الموضوع دا أكتر من مرة لأسرة أو سيدة بطفلها أو معارف
وكل مرة بكون مبسوطة لمحاولة فعل الخير
لكن لما بحكي لحد من الزملاء أو الأقارب بيخوفوني
فمازلت أعمل كدة لكل بحذر وكنت بضع إيدي على قلبي من الحكاوي الشريرة
بس الحمد لله ربنا بيستر كل مرة
ومرة ورا مرة رجعت لطبيعتي واصبحت مش بخاف
واقول لنفسي :( هو أنا أقصد أيه غير الخير !! - فأكيد ربنا هيقف معايا )
والله .. الله على الدعوات اللي بسمعها
وأعتقد إن الدعوات دي هتفتح لي باب من أبواب الستر في مواقف تانية
( بس أنا بعمل حاجة مش عارفة غلط ولا صح وتضرري الوحيد من موضوع التوصيل دا -الحاجة اللي بعملها دي !!!) ، أني لما أكون مشغلة التكييف بأغلقه - "صبراً جميل" : مش بخل ولا إستخسار في اللي هيركب معايا ، ولا خايفة من الحسد - لكن مساهمة في أحاسيسهم - مش يبقى هما في الحر والتراب وغيرهم مش معرض للأتربة والدخان والعوادم وكمان مرتحين في التوصيل ، ومش عارفة كدة صح ولا غلط !!
ربنا يستر طريقك يا باشمهندس حاتم ويستر طريقنا جميعاً .

---

الاخت الكريمة friendship

بارك الله لك سعيك في الخير وحرصك عليه

و بالنسبة للنقطة بتاعة التكييف انا كنت دائما اقوم بأغلاقة لانه كان بينتابني احساس الخوف من ان يظن من اقله معي انني متعاليا عليه حاشا لله فكنت اقوم بأغلاقه وفتح الشبابيك قبل صعوده للسيارة

و مرة من فترة كنت راجع من الاسماعيلية و رأيت احد العساكر علي الطريق و معه شنط كثيرة و بعد ان توقفت و ركب معايا هو قال لي بنفسه ايه يا حاج هو العربية مفهاش تكييف ولا ايه فقمت علي الفور بتشغيله واغلاق الشبابيك و كنت سعيدا جدا انه طلبه بنفسه

و من يومها قررت ان من سأقف له يجب ان اشغل التكييف له حتي لو انني غير راغب فيه من باب تقديم افضل ما لدي للضيف

عموما اللهم اجعلها خالصة لوجهك الكريم و اللهم تقبل صالح العمل

و بارك الله لك اختنا الكريمة

اقتباس:

---

المشاركة الأصلية كتبت بواسطة amrelsaqqa

اخى الكريم بارك الله فيك ولكن انا ايضا ما زلت ارى انه ما ينفعش يتعمل الا مع المعارف وزملاء العمل

ع الطريق ما تضمنش اي حاجة ولا تقوللى اسرة ولا كلام من ده
يا ما بيحصل تمثيليات اصلا عشان يتم توقيف الناس وتثبيتهم ، والموضوع لا يتوقف عند سرقة محتويات من العربية ، لو على قد كدة امرها سهل ..


طبعا اللى عايز يعمل الموضوع ده هو حر ولكن في نقاط لازم مراعاتها


حذار تبقى لوحدك وتركب معاك واحدة ست ما تعرفهاش مهما كان الزمان والمكان و سنها او شكلها ، لان اولا هيبقى خلوة بأجنبية وحرام ، ثانيا ممكن يحصللك مشاكل كتير لا حصر لها انت في غنى عنها وممكن الست دى يجيلك من وراها مصايب كتير وتطلع مش كويسة وتتبلى عليك وتجيبلك مصيبة ... ابعد عن الشر وغنيله وطبعا مش محتاج اقول الموضوع ده للسيدات ، طبعا مفيش واحدة هتركب راجل غريب معاها وتقوللى انا بعمل خير :d



في الاخر زي ما حضرتك قلت المواصلات موجودة والناس بتدفع مش محتاجين لحد وانا عن نفسى لو واقف على الطريق او حتى جوة البلد وانا شاب بمفردى 26 سنة ، لو حد شاورلى وقاللى انا طريقى كذا اخاف اركب معاه

يعنى الخوف والعامل الامنى متبادل مش من ناحية صاحب العربية بس ، ده سواقين التاكسى بيخافوا هاجى انا يا بتاع الملاكى و اقف للناس

وبعدين خلى بالك برضه ده عمل كويس وجميل وخير ولله وثواب وكل حاجة ولكن ان زاد عن حده وانتشر مش ده هيقطع ارزاق التاكسى والميكروباص خصوصا لو مع الوقت بعض اصحاب الملاكى عملوها سبوبة وبقى ياخدوا اجرة من اللى يركبوه ويوقفوا حال التاكسى اللى بيدفع مصاريف زيادة من اجل استغلال السيارة للنقل بأجر وفاتح بيت بالموضوع ده ..

---

الاخ الكريم الفاضل amrelsaqqa

شاكر جدا لحضرتك مشاركتك القيمة و بالفعل بها نصائح غالية يا ليتها كانت تحت بداية موضوعي في اول صفحة حتي تعم الفائد و بالفعل الحذر مطلوب في كل الاوقات
و مينفعش حد يعمل الموضوع ده بدون بعض الضوابط

طبعا اولها موضوع الاختلاط و لانني لا افعله ظننت انني مش محتاج انبه عليه
و هو بالفعل لا يجوز شرعا و لا يصح بس يعني من غير مبالغة يعني شاب و وجد سيدة فوق الستين او السبعين في لحظة معينة اظن الموضوع يحتاج للتفكير و لا يجوز الرفض لمجرد الرفض ان هذه سيدة مع انها في سن جدته و من الممكن انها لم تجد تاكسي او لا تستطيع صعود سلالم المترو الخ الخ وممكن ان يراعي ان يركبها في الخلف

و بالنسبة لباقي النقاط اللي حضرتك ذكرتها هي جميعها تحترم طبعا و يجب الحذر منها

بس لو الموضوع اصبح منتشر للدرجة اللي يؤثر علي دخل اصحاب التاكسي لدرجة انهم لا يجدون احد يقلوه في الشوارع نتيجة ان اصحاب السيارات الملاكي اقلو الناس في الشوارع


ياااااااااااااااااااااااا ااااااااااااااااااااااااا اااااه هل تظن ان يحدث هذا يوم

هل تظن ان ينزل اي انسان من بيته او عمله او تلاميذ المدارس اللي بينزلو احيانا للمدارس الحكومية الفترتين من الخامسة والنصف صباحا في بعض المناطق

فيتمشي الانسان قليلا ذاهبا لعمله او لبيته او لمدرسته فأذا به في منتصف الطريق يجد هذا يفتح له باب سيارته وهذا يقسم عليه ان يركب معه الي اخر الشارع و تجد المودة و التراحم و البسمة انتشرت بين من يركب سيارة و من يمشي في الشارع مترجلا
لا هذا ناقم علي هذا انه معه مكان وانطلق من جانبه كالرصاصة بدون حتي ان يهدئ من سرعته
و لا من يركب السيارة حانق علي المترجل انه يمشي في وسط الطريق لان الرصيف لم تمهده الدولة للسير فهو اما عالي في واطي يحتاج الي رياضيين للسير عليه او متكسر لا يصلح للسير و لو سار عليه كبار السن لوقعو وكسرت عظامهم او هو عليه اشغالات

هل تظن في هذه اللحظة ان حدثت ان سائقي التاكسي لن يعملو
احب ان ابشرك اخي الحبيب بل سيعملو و سيرزقو و لن يأخذ منهم احد رزق قد كتبه الله له و ربنا ما يكتب علي احد انه يتحط في احراج انه يضطر ان يركب مع احد اخي الكريم ان الامر عظيم فلو كنا نحن ملاك السيارات نخاف من الموقف ( امنيا ) فهم يخافون معنويا فصدقني من معه اجرة التاكسي ويعلم انه من الممكن ان يجده بسهولة لن يركب معنا ببلاش سيستحي و سيظل منتظرا للتاكسي

و لكن امام كل راكب تاكسي هناك 1000 لا يستطيعون تحمل تكاليفه هؤلاء يحتاجون لمن يريح اقدامهم

طبعا انا كتبت الكلام الكتير ده مش رد فقط علي مشاركة حضرتك و لا مجادلا لوجهة نظرك و لكن لان هناك من يتابعنا ومن الممكن ان يأثر فيه كلام حضرتك او كلامي سواء بالسلب او بالايجاب حتي تعم الفائدة تحياتي لك اخي الكريم

ملحوظة مهمة

احيانا اخواني الافاضل اسير في طريق انا نفسي صاحب الدعوة لا اقف فيه لاحد ومن الممكن ان يقف غيري فيه و انا ممكن اقف في مكان يحسبه غيري غير آمن و هكذا لذلك الموضوع نسبي جدا احبتي في الله وبه تباين في الحكم علي المكان و الزمان و الهيئات التي ستقف لها علي الطرقات

اقتباس:

---

المشاركة الأصلية كتبت بواسطة Y a r i s

مشروع جميل .... وكتير ربنا بيوقف لنا اولاد الحلال وكتير ربنا بيوقفنا كمان. لولاد الحلال

---

الاخ الكريم الفاضل الاستاذ Y a r i s

اولا الف حمد و شكر علي سلامتك و نفتقدك بشدة

ثانيا شرفت الموضوع بمشاركتك

ثالثا اوجزت و وفيت هي فعلا رزق من المنان لا فضل لنا فيه

اقتباس:

---

المشاركة الأصلية كتبت بواسطة م. حاتم السباعي

الاخ الكريم الفاضل amrelsaqqa

شاكر جدا لحضرتك مشاركتك القيمة و بالفعل بها نصائح غالية يا ليتها كانت تحت بداية موضوعي في اول صفحة حتي تعم الفائد و بالفعل الحذر مطلوب في كل الاوقات
و مينفعش حد يعمل الموضوع ده بدون بعض الضوابط

طبعا اولها موضوع الاختلاط و لانني لا افعله ظننت انني مش محتاج انبه عليه
و هو بالفعل لا يجوز شرعا و لا يصح بس يعني من غير مبالغة يعني شاب و وجد سيدة فوق الستين او السبعين في لحظة معينة اظن الموضوع يحتاج للتفكير و لا يجوز الرفض لمجرد الرفض ان هذه سيدة مع انها في سن جدته و من الممكن انها لم تجد تاكسي او لا تستطيع صعود سلالم المترو الخ الخ وممكن ان يراعي ان يركبها في الخلف

و بالنسبة لباقي النقاط اللي حضرتك ذكرتها هي جميعها تحترم طبعا و يجب الحذر منها

بس لو الموضوع اصبح منتشر للدرجة اللي يؤثر علي دخل اصحاب التاكسي لدرجة انهم لا يجدون احد يقلوه في الشوارع نتيجة ان اصحاب السيارات الملاكي اقلو الناس في الشوارع


ياااااااااااااااااااااااا ااااااااااااااااااااااااا اااااه هل تظن ان يحدث هذا يوم

هل تظن ان ينزل اي انسان من بيته او عمله او تلاميذ المدارس اللي بينزلو احيانا للمدارس الحكومية الفترتين من الخامسة والنصف صباحا في بعض المناطق

فيتمشي الانسان قليلا ذاهبا لعمله او لبيته او لمدرسته فأذا به في منتصف الطريق يجد هذا يفتح له باب سيارته وهذا يقسم عليه ان يركب معه الي اخر الشارع و تجد المودة و التراحم و البسمة انتشرت بين من يركب سيارة و من يمشي في الشارع مترجلا
لا هذا ناقم علي هذا انه معه مكان وانطلق من جانبه كالرصاصة بدون حتي ان يهدئ من سرعته
و لا من يركب السيارة حانق علي المترجل انه يمشي في وسط الطريق لان الرصيف لم تمهده الدولة للسير فهو اما عالي في واطي يحتاج الي رياضيين للسير عليه او متكسر لا يصلح للسير و لو سار عليه كبار السن لوقعو وكسرت عظامهم او هو عليه اشغالات

هل تظن في هذه اللحظة ان حدثت ان سائقي التاكسي لن يعملو
احب ان ابشرك اخي الحبيب بل سيعملو و سيرزقو و لن يأخذ منهم احد رزق قد كتبه الله له و ربنا ما يكتب علي احد انه يتحط في احراج انه يضطر ان يركب مع احد اخي الكريم ان الامر عظيم فلو كنا نحن ملاك السيارات نخاف من الموقف ( امنيا ) فهم يخافون معنويا فصدقني من معه اجرة التاكسي ويعلم انه من الممكن ان يجده بسهولة لن يركب معنا ببلاش سيستحي و سيظل منتظرا للتاكسي

و لكن امام كل راكب تاكسي هناك 1000 لا يستطيعون تحمل تكاليفه هؤلاء يحتاجون لمن يريح اقدامهم

طبعا انا كتبت الكلام الكتير ده مش رد فقط علي مشاركة حضرتك و لا مجادلا لوجهة نظرك و لكن لان هناك من يتابعنا ومن الممكن ان يأثر فيه كلام حضرتك او كلامي سواء بالسلب او بالايجاب حتي تعم الفائدة تحياتي لك اخي الكريم

ملحوظة مهمة

احيانا اخواني الافاضل اسير في طريق انا نفسي صاحب الدعوة لا اقف فيه لاحد ومن الممكن ان يقف غيري فيه و انا ممكن اقف في مكان يحسبه غيري غير آمن و هكذا لذلك الموضوع نسبي جدا احبتي في الله وبه تباين في الحكم علي المكان و الزمان و الهيئات التي ستقف لها علي الطرقات

---

عندك حق طبعا ان الموضوع مش هيوصل للدرجة اللى انا قلتها ولكن احنا شعب فهلوى وحضرتك عارف

الموضوع مش هيتم في يوم وليلة او ممكن ما يتمش اصلا بالطريقة اللى انا قلتها طبعا ، القصد ان الواحد بيفكر لمآلات الامور يعنى اي امر لما الواحد يعمله بيفكر لو كل الناس عملته ايه التأثير المتوقع ، ممكن عمليا يستحيل الموضوع يكبر بالدرجة دى بس الواحد بيفترض كدة من باب انه يعرف دى حاجة صح ولا لا لأن في نظري الحاجة اللى مهما كل الناس عملوها ما تأثرش على حاجة هى دى الحاجة الصح وتصرفك اللى لو انت عملته ما ياثرش على حاجة بس لو اتكرر 1000 مرة يأثر ده تصرف خاطئ ، زي مثلا "المشى عكس الاتجاه لتخطى طابور طويل وبعدين ينط ويكسر على اخر واحد في الطابور ويدخل مكانه "

بس انا بكلم حضرتك برضه عن تجربة الى حد ما صغيرة عندنا في المنوفية الموضوع بدأ كدة زمان كان مثلا اجرة التاكسى 2 جنيه يوديك اي مكان داخل البلد ، بدأ يظهر ناس بعربيات ملاكى عادية ولكن لونها اخضر (شبه التاكسى بس مش تاكسى ) بحيث تقف للناس وبدل مثلا ما تدفع 2 جنيه يركب 3 مثلا كل واحد يدفع 50 قرش ولا حاجة .. !

واحدة واحدة الموضوع ده كتر جدا وبقت العربيات دى شغالة زي التاكسى بالظبط وبنفس الاجرة مع الفرق انها ملاكى وبدون المعوقات والمشاكل اللى بتقابل بتوع التاكسى في سعر التاكسى والترخيص والضريبة وو الخ .. وطبعا بتوع التاكسى مش طايقينهم وياما عملوا وقفات لمنع الكلام ده ولكن لا حياة لمن تنادى

مثال تانى ان التاكسى كان يخليك تركب المشوار لوحدك ما يركبش حد معاك ، واحدة واحدة الناس بقت تقبل انها تركب حد تانى في سبيل تقاسم الاجرة ، بعدها بقى الامر الواقع ان التاكسى يركّب اكتر من واحد وكلهم يدفعوا الاجرة كاملة .. الخ من الامثلة


في النهاية انا ما قصدتش ان الناس اللى تركّب ناس معاها احتسابا للاجر عند ربنا هى اللى تقطع على التاكسى
انا قصدت الناس اللى هتندس وتبدأ تاخد اجرة زيها زي التاكسى ، بالاعتماد على ان الناس بدأت تعتاد ركوب سيارات ملاكى ليست اجرة بسهولة بما فيها المفاسد والمخاطر المترتبة على الموضوع ده لان لو ركبت عربية ملاكى وحصللك حاجة مالكش دية ولا تعرف تعمل اي حاجة لانك تعتبر مخالف للقانون بركوب سيارة بأجرة مدفوعة وهى ليست معدة للاجرة

الحمد لله ان فعلا بعمل كده من سنين و باخد دعا اااااد كده بس فعلا لازم الحذر وغالبا بركب ناس كبيره فالسن او اسرة