في البدايه اتقدم بالشكر لكل اعضاء المنتدي عامة.. وقسم رينو خاصه علي تبادل خبراتهم و امانتهم في عرض عيوب ومميزات كل سيارة لمساعدة متخذي القرار
حلوة متخذي القرار دي ... تحس انك في "Support decision making presentation"
شكرا لمساعدتكم ليا في اتخاذ قرار شراء سيارة رينو فلوانس.. وخاصه الاستاذ Meggieboy و الاستاذ miceg واتمني يكون قرار صائب ان شاء الله
طيب ...ندخل في الموضوع
بعد الاطلاع علي معظم المواضيع المتعلقه ب فلوانس (مشاركه..مشاركه)استقريت علي الفئات 178 الف و 188 الف بعد قرار سابق اني اروح ل 169.5 الف و اركب لها rear camera زي بعض الاعضاء المحترمين هنا
ولكن الاغراءات كانت بتزيد ونطه في نطه وصلت للهاي لاين 188 الف

المشكله في الندره وبالتالي عدم توافر الالوان ( مش لاقي غير اسود و فيراني) وبصراحه انا نفسي في لون تاني خالص لاني بحب اكون مختلف و متميز ... فاخترت اللون ال..... "موكا" زي معظم الشباب في المنتدي وده بصراحه لانه لا يقاوم

نتيجه البحث كانت كالتالي:
التوكيل: معندوش حاجه خالص... لازم تحجز ب 10000 وتستني شهرين
محمد ذكي: عند واحده اسود ب 188 الف
القرش: عند واحده اسود ب 189 الف.. تقريبا هيجيبوهالي من عند محمد ذكي :)لانهم قالو هايجيبوهالي من المخزن
اما فئه ال 178 الف فموجود فيها الوان اسود و فيراني و سيلفر
الغريبه ان محدش جابلي سيرة خصومات خالص!!!
النصائح المطلوبه من حضراتكم:
1- اشتري منين؟.. وياريت لو حد بيدي خصومات
2-هل الافضل احجز مع التوكيل؟ ... ولا اخد حاجه استلام فوري من الالوان المتوفرة؟... ولو كدة.. اقتراحاتكم ايه في الالوان؟
3-التامين في رينو مع شركه ايه؟ واسعاره؟والخدمه اخبارها ايه؟ "علما اني معنديش مانع ادفع بريميم اكبر بس شركه التامين تتعامل مع التوكيل ديريكت
4- كان عندي اسئله اكتر من كده ..بس نسيتها من كتر الكتابه "طبعا ده من حسن حظكم" ده اذا كان حد هيقرا كل اللي انا كتبته اصلا :)

اشكركم شكرا جزيلا علي كل مساعداتكم الفترة اللي فاتت ... ومستني ارائكم
اخوكم أحمد