مين جرب تفوييييل عربيته لحد الزور

**atpo56a** · 29-03-2014 02:06 PM

السلام عليكم احبائي اعضاء وزوار المنتدي
اكيد الكل او البعض منكم جرب انه يفوووول عربيته اللانوس لحد الزور انا حصل معايا انني استهلكت كل البنزين اللي في التنك لغايه ما العربيه توقفت حتي المارش لم يدور لعدم وجود بنزين المهم حطيت لتر بنزين لغايه ما رحت البنزينه المهم قلت للعامل فوووول للاخر
المهم المسدس فصل والعامل ابتدي يدوس سنه سنه تاته تاته تكه تكه لحد ما قاللي العربيه اخدت 40لتر
المهم رحت البيت وكان معايا جركن 10لتر قلت ازودهم واشوف حتاخد كام لتر استغربت لما لقيت الجركن خلص يعني 50لتر اخدتهم العربيه
للامانه انا قعدت انقط شويه شويه في القمع علشان لما كنت ازود في سكب البنزين كانت (بتزور) اي ان البنزين يتكب من بره كنت بانتظر شويه واكمل لغايه ما خلص الجركن ولو فيه تاني كانت حتشرب
ايه رأيكم في موضوع التفويل لحد الزور يعني اللانوس ممكن تاخد 50لتر واكثر __طيب ليه مسدس البنزينه بيفصل عند 40لتر رغم ان التنك كان فاضي يا ريت الافاده ليستفيد الجميع

**Farouk84** · 29-03-2014 03:19 PM

انا طول عمرى بفول لغايه الزور وخصوصا الايام اللى احنا فيها دى ..... محدش ضامن البنزين امتى يخلص من البنزينه.

**lad** · 29-03-2014 03:35 PM

انا على طول كدا و بتفرق حوالى 10 لتر بين التفويلة بتاعت اول تكة و تفويلة الزور

**elpasha1** · 29-03-2014 08:38 PM

انا كنت بفول للزور لما كانت معايا اللانوس

**ahmad_salama** · 29-03-2014 09:53 PM

النوبيرا عندي بتاخد بالظبط 17 لتر زيادة بعد ما المسدس بيفصل اوتوماتك

**agaty1st** · 30-03-2014 12:19 AM

مستحيل التانك يشيل أكتر من سعتة
كل الموضوع انك حطيت عالعداد 40 لتر لكن الفعلي اقل من كده
التفسير ان العامل لما بيلاقي العربيه هاتعدي منه بيخاف الزبون يمسك فيه

قبل اللانوس عربيتي الأبيزا شطبت مني بنزين جبت 5 لتر في جركن و دورت و روحت البنزينه خدت حوالي 55 لتر
مع العلم ان التانك الأساسي بيشيل 40 لتر و الاحتياطي بيشيل 7 لتر

انا عملت تجربه دلوقتي بعد ما حسيت ان مفيش بنزينه مضمونه حتى اللي مش بيسرق بيهمل في عيار عدادات البيع بشكل دوري وهي اني بصفر العداد و بمشي بالعربيه 300 كيلو و أفول للزور كل مره بنزينه مختلفه و الاستهلاك تراوح من 26 لتر الي 31 لتر
احسن ناس بتراعي ربنا شل المقطم و شل التجمع شارع التسعين كل مره 26 لتر
مع العلم ان ظروف القياده ثابته كل مره يعني بدون تكييف تسخين ثواني قليله و الصبح فقط طرق سريعه مشاوير يوميه ثابته في مواعيد ثابته ولو صادف و الظروف اتغيرت بلغي نتيجة الأسبوع

**tarek_2005** · 30-03-2014 09:20 AM

الاستاذ صاحب الموضوع
تنك اللانوس سعته 48 لتر فقط
الزيادة الي انتا حطيتهم دول اما انك كنت اسهلكتهم من محطة البنزين الي المكان الي كملت التفويله فيه
او انهم سكبوا علي الارض لو عربيتك هاف اوبشن من خرطوم الفايز او مليت بيهم علبة الكانستر لو عربيتك فول اوبشن
او عندك جوان الطرمبة بيسرب وكبت البنزين الزيادة فوق التنك

انا طول عمري بفول عربيتي للزور واكثر مرة اخدت بنزين كان 42.5 لتر وعمر لمبة البنزين مخلتها تنور لانها بتنور عند وجود 4 لتر بالتنك