بسم الله الرحمن الرحيم


زملائي الاعزاء بقسم تويوتا،
الموضوع موجود في عربيات كتير ، و الهدف منه اني ارد علي استفسار ملاك كوروﻻ 2014 اللي اشتكو انهم لو سابو نور العربية مفتوح و مخدوش بالهم و قفلو العربية و مشيو العربية هتفضل منورة و البطارية هتفضي. الكلام ده غير صحيح بالمرة .
اول شئ لو حضرتك شلت المفتاح من الكونتاكت و انت مش قافل الانوار العربية هتعملك اصوات تنبيهية مزعجة و تنورك علامة تعجب في التابلوه بلون اصفر، طيب افرض اني مسمعتش و لا شفت الكلام ده ،خلاص كدة العربية هتعاقبني و تفضي البطارية !!

اكيد ﻷ طبعا ،،،

الموضوع ده انا جربته بنفسي امبارح بالليل بعد مرجعت ركنت العربية و مكنتش واخد بالي و شيلت المفتاح وانا مشغل النور طبعا التنبيه عملي ازعرينة و اخدت بالي فقلت طيب مجرب انزل و اقفل العربية و اقف جمبها شوية و اشوف الاخبار ايه و هل الانوار هتطفي ولا البطارية هتشيع ؟

وقفت مركز جامد و فتحت الموبايل و عملت ستوب واتش،،،،
فات دقيقة و محصلش حاجة
فات 5 دقايق ولا الهوا
فات 10 دقايق مفييييش
فات 15 دقيقة ملل السنين
و قلت خلاص كدة العربية هتفضل منورة ، بس مفقدتش الامل قلت مش خسارة في العربية اقف جمبيها ان شالله ساعة و كانت المفاجئة
بعد 20 دقيقة بالتمام و الكمال الانوار اتطفت لوحدها و العربية شدت اللحاف و نامت .

يعني ايه الكلام ده ؟ يعني كل اللي كان متضايق من ان الكوروﻻ مش بتطفي الانوار اوتوماتيك اقوله متضايقش نفسك ابدا و هي لايمكن هتضايقك و لا هتزعلك .

الموضوع ده اهداء الي الاخ العزيز باسم نجيب اللي كان الموضوع ده مضايفه جدا.