اشتغلت ايام الدراسه ؟ طب في الاجازه حتى ؟ تعالى اقولك انا اشتغلت ايه ..!!!

**a_nbm** · 30-03-2014 03:37 PM

سؤال ...
كنت بتشتغل ايام الدراسه ؟ قولنا اه او لأ وليه ؟
كنت بتشتغل في اجازه اخر السنه ؟ قولنا اه او لأ وليه ؟
طيب هل لما ربنا يكرمك ويبقى عندك ابن هاتخليه يشتغل في الاجازه ولا هايقضيها نت ومصايف؟

انا عن نفسي كنت بشتغل في اجازه اخر السنه (بعد معانااااه كبيره مع والدي عشان يوافق كنت في اولى اعدادي) والدي كان متخيل انه كده بيهني ويبهدلني مع العمال والصنايعيه
بس انا كنت شايف العكس
كنت شايف اني باخد خبره افضل في الحياه
وده فعلا اللي حصل
الحمد لله بقيت اعرف اتعامل مع كل اصناف البشر من الغفير للوزير
وشبكه علاقات واسعه جدا
وعملت فلوس كتير لدرجه اني خطبت وجبت شبكه وكتبت كتابي وانا لسه في اولى كليه (الحمد لله)
ومحدش دفعلى قرش واحد الحمد لله (بكالوريوس هندسه)
طبعا انا اشتغلت شغلانات كتيييييييييير .... (ميكانيكي ... بليه يعني ... سمكري ...استرجي .... اويمجي ...... نقاش ..... كهربائي ... نجار ... امن ....في الطباعه ......بائع متجول ..... سواق توكتوك....... ........ .......... ده اللي فاكره دلوقتي )بس اغربهم اتنين بصراحه

1- بعت مناديل في القطارات
2- وكنت بجمع خرده (بلم خرده يعني .... ومحدش يضحك هههههه ههههه)

طبعا حوار المناديل اكتشفت ان كل قطر فيه واحد بيكون هو اللي مسيطر عليه وماينفعش ان حد تاني يبيع فيه غيره وكانت بتبقى مشكله بس كانت بتعدي
وكمان الناس كانت بتشتري مني عشان كانوا بيحسوا ان انا طالب وبيشجعوني (كنت بحس كده بالذات الستات والبنات) وكان كتير منهم يوقفني ويتعرف عليا لدرجه واحد منهم كان شغال في الانتربول الدولي واداني الكارت بتاعه وقالي لو وقعت في اي مشكله اتصل بيا ومالكش دعوه

اما شغل الخرده ده كان مكسبه عالي جدا لانك بتجيب فلوس ما الهوا وكانت مشاكله ان ممكن حد تاني لو حس انك مش ابن كار يبقى عايز يثبتك وياخد الحاجه اللي معاك (طبعا كنت لازم ترسم انك ابن كار وكده وبتاااع ...... على طريقه خخخخخخخخخخخخ انت عيل مالكش عاااازه اثلاااااااااا ههههه ههههههه)

بقيه الشغلانات كانت كويسه الحمد لله وكانت الناس كل اجازه تتحايل عليا عشان اروح معاهم
وكمان لما دخلت الكليه بقى كله يقولي يابشمهندس (وانا لسه طالب اصلا)
وكانت الزباين بتستغرب المفروض تقوله يابليه ولا حاجه ..كانت الاسطوات تقلهم لاااا دا بشمهندس قد الدنيا وكانوا فرحانين بيا قوي

لو ربنا كرمني بطفل طبعا هانزله يشتغل في الاجازه وفي نفس الوقت هاعلمه احسن تعليم

دي حكايتي
وياريت نسمع حكايتك عشان نستفيد كلنا
وكمان لو عندك ابن بتعمل معاه ايه ......؟؟ او هاتعمل معاه ايه .........؟؟

**hilal** · 30-03-2014 03:50 PM

تقبل تحياتي على هذا الموضوع الرائع
وتحياتي لوالدك الكريم الذي وافق على ذلك رغم المخاطر التي كنت تتعرض لها

**elfarashah** · 30-03-2014 04:15 PM

سلام الله عليكم ورحمته وبركاته

موضوع أحييك عليه لأنه يستحق القراءة والمتابعة والإشادة

ولكن

بصراحة أنا صعب أعمل كدة لو ليا إبن دا مش صعب وبس دا مستحيل كمان

بمنطق أي أب وأي أم يصعب عليهم يبهدلوا ابنهم خاصة لو مش محتاج ده

يدرس ويخلص ويسلمني شهادته وبعدين في حفظ الله بقى مع نفسه

يعمل اللي هو عايزه ومش معنى كدة إني أقفل عليه أو أمنعه من خبرات الحياة

لكن مش بالضرورة يكون بالشكل ده ..يعني مثلا لو في كلية وحب يشتغل

حاجة معقولة في الصيف على سبيل التجربة ( مفيش مشاكل ) لكن غير كدة

إستحالة .. برغم إني معجبة بكفاحك وخبرتك لكن للأسف معنديش الجرأة ولا القلب

اللي يخلوني أتصرف كدة مع ابني بعدين

إحترامي لشخصك ولموضوعك الرائع

برعاية الله حفظه

**msa142** · 30-03-2014 04:16 PM

انا حياتي شبهك كدا اول مره اشتغل كنت ف تانيه ابتدائي كان ليا صحاب كتير بيشتغلو شغله اهلهم وكدا
المهم اشتغلت مع حد صاحبي ف الخرده كنت ف اليوم بجيب فوق ال 5 جنيه طبعا مبلغ ضخم بالنسبه لحد ف سني ساعتها وكنت بلف عشان اي حته حديده كان الكيلو بيعمل ربع جنيه او نص مش فاكر
وبعدها قررت افتح شغل مع نفسي وبقيت بشوي دره ع الكورنيش وبعديها فضلت اشتغل باليوميه ف شركه تعبئه سمنه وبعد كدا انقطعت عن الشغل لانشغالي بالدراسه بعد كدا رجعت اشتغلت ف مجال الكمبيوتر كنت كل صيف اشتغل في محل شكل واكتسبت خبره كويسه جدا ف الفوتوشوب والاوتوكاد نفعوني ف دراستي دلوقتي واخيرا اشتغلت ف شركه الزجاج الدوائي السنه الي فاتت
ودلوقتي انا ف كليه هندسه قسم عماره
عموما انا كنت بشتغل عشان مكنتش،بلاقي نفسي ف عيشه اللعب واكل واشرب من غير متعب ف لقمه عيشي واعرف قيمتها

**ahmedalaahosny** · 30-03-2014 04:45 PM

متابع باهتمام

**د.محمود صلاح** · 30-03-2014 06:13 PM

كنت بشتغل كل صيف اثناء الدراسة في الكلية في نادي اجتماعي لعمل العاب وانشطة للأطفال .. واخذت دورات تدريبية لإعداد القادة في هذا المجال .. في البداية كنت متطوع وبعدين بقيت آخذ أجر .. وبعدين انشغلت في الحياة العملية بعد التخرج ..

موضوع ممتاز ..

**أبو آسر** · 30-03-2014 06:27 PM

أنا أيام الكحرتة والشقاوة من أكتر من 14 سنة اشتغلت كذا شغلانة بردة في الصيف منها waiter في نادي الأطباء بالجربي برأس البر واتعرفت على ناس برده كانت بتحترمني جدا لما بيعرفوا إني طالب بالجامعة وبشتغل في الأجازة ومنهم كانوا بييجوا النادي يسألوا عليا مخصوص علشان يدوني التيبس في إيدي :)
وقبلها كنت شغال ببيع دباديب واكسسوارات حريمي على فرشة في شارع النيل برأس البر برده :)
واشتغلت برده في شركة تايم شير وكنت بقف أمام محلات مشهورة بالمنصورة والمحلة ورأس البر أوقف الناس وأديهم دعوة لحضور حفلة للتعرف على التايم شير زي الناس الرخمة اللي بتشوفوهم دلوقتي أمام كارفور وفي البنزينات :) وطبعا كنت بقابل أشكال وألوان منهم ناس كانت بتجري ورانا في الشارع وتبقى عايزة تضربنا ههههههههههه وناس تانية اتعرفت عليهم منهم رجل أعمال لبناني أعجب بيا وبأسلوبي وحب يشغلني معاه في استيراد وتوزيع ماكينات من ألمانيا وحوار كبير كده مكملتش فيه
بصراحة كانت تجارب ممتعة ومفيدة وأكسبتني خبرات جامدة في الحياة وعلى عكس ما كنت متوقع إنها شغلانات بعضها مهين كانت الناس بتحترمني جدا وتقدرني واكتشفت أن العمل لا يعيب الشخص بل يرفع من قدره أحسن ما أقعد في البيت وآخد مصروفي من بابي ومامي :)