ضيف جديد علي بروتون جين 2

**مايكل لويس** · 31-03-2014 05:08 PM

طبعا وبعد لف كتير قررت اشتري بروتون وطبعا بعد ما قريت وتابعت علي المنتدي قررت انها خلاص عربيتي القادمة
وربنا اكرمني بواحدة موديل 2009 بس عاملة 110000 بس كويسة واستعمال نضيف قوي
بس اول مشكلة كانت ليا معاها
عندي الانتظار مش شغال ولما سالت في عصام صفا قالي تغير مسطرة ب 550 قولت اشوف غيرو روحت امير وجوزيف قالي مش موجودة روحت الراعي في الحرفيين كان هيبيعلي استيراد ب 250
نزلت لفيت شوية في دمشق برضوا ملقتش ودي كانت صدمتي لاني كنت راكب لانسر 2008 وعمري ما حصلي كدة اول محل بدخلة بشتري منه كل حاجة
بس مفيش مشكلة ادينا بنتدرب
تاني مشكلة بعد اول تفويلة العربية ما مشيتش 10-15 كيلو ولقيت موشر البنزين نزل ربع الحقيقة اتصدمت جدا دة انا اللانسر ال 1300 كنت بقعد 3-4 ايام علشان الموشر يتحرك من مكانة مش ينزل للربع انا مشاويري مصر الجديدة شيراتون هليوبليس الكوربة دة اخري علشان كدة اتصدمت
روحت الفحص الفني وقولتلهم علي الموضوع دة قالولي هنشوف وبعدها قالولي لا دة عادي الاستهلاك العادي ساعتها قولت انا هطلع من هنا ابيعها دة يوم ونص وربع التانك
وكمان في مشكلة تالتة هي ان التيل بيصفر وبيطلع غبار اسود علي الجنط ولما قولتلهم في الفحص قالولي لا دة عادي وكمان الصفارة دة عادي والتيل مليان وفل
ساعتها حسيت اني هموت مشلول يعني هقضي باقي حياتي بعربية بتصفر وانا بفرمل :)
عموما انا قولت شوية واغير التيل واريح نفسي بس لما اخلص قراية مواضيع بديل التيل من علي المنتدي ;)
دي كانت اول ايام ليا مع الجين 2
فياريت الي ليه راي او اي ملحوظة يقولهالي مع العلم اني سواقتي هادية مش بحرق غيارات

**memo_p910** · 31-03-2014 06:17 PM

موضوع مؤشر التانك ده مش مقياس اول ربع فعلا بينزل بسرعه لكن الاستهلاك عادي جدا

**will_smith** · 31-03-2014 06:41 PM

صدمتنى ..!!! وانا اللى كنت عايز اجيب بروتون :(((

**kokowasfy** · 31-03-2014 10:16 PM

ربنا يباركلك فيها و مبروك عليك

**Ahmed 1993** · 01-04-2014 12:58 AM

ايه الصدمه دى دا انا كنت بدور على واحده 2009 اوتوماتيك بس ان شاء الله خير وتكون حاجات تقدر تظبطها بس حضرتك ازاى مبصتش مثلا على حوار الانتظار دا قبل ما تشترى العربيه ؟ وكنت تشيك على العربيه كلها
وحوار البنزين دا انا اول مره اسمع عنه الصراحه ان شاء الله خير وتظبط فيها كل حاجه وتريحك

**مايكل لويس** · 01-04-2014 11:56 AM

اولا شكرا يا memo_p910 ,وانا هجرب اتابع مرتين تلاتة الاستهلاك
وشكرا للي رحبوا بيا
اكيد اما فحصتها وواخدها وانا عارف الحاحات دي بس طبعا دة بتمنه وقولت اديني بتدرب

اة يا جماعه كل دة مشاهدات ومحدش ناوي يشاركني ب اي حاجة

**eng.m7md.ali** · 01-04-2014 01:06 PM

مبروك عالعربية

ومتحاولش تحط العربية دي في مقارنة مع لانسر لانها هتبقى احسن في حاجات وهتبقى اسؤ في حاجات .. يعني عندك مثلاً النعومة هتلاقيها في اللانسر والخامات الاحسن بس هتلاقيها ضياع في الثبات والجري والسحب

عربيتك كويسة لا تقلق متنساش انها ماشية كتير يعني مش زيرو والمشاكل اللي عندك دي عادية جداً وسهلة

موضوع التيل اللي بيصفر اكيد التيل مش حلو وخامته وحشة ممكن تبقى تغير التيل عادي بس مفيش منه خوف او قلق واستهلاك البنزين متحكمش عليه بالطريقة دي ماهو يمكن يكون في مشكلة في العوامة مثلاً

موضوع قطع الغيار بردو متقارنهوش باللانسر بسبب الانتشار الرهيب للانسر عن الجين2 وعلى فكرة في حاجات كتير اوي في اللانسر اغلي من الجين .. مثلا الاكصدام شوفه في اللانسر بكام هتلاقيه ارخص في الجين2 ونفس الكلام عالكبوت والحاجات الاصلية ... بس طبعاً الانتشار هيبقى في صالح اللانسر

**مايكل لويس** · 01-04-2014 01:22 PM

eng f3lix
طبعا شكرا ليك
بس فين النصايح يعني بالنسبة للتيل انشاء الله هغيرة وكنت بتابع موضوع تيل الفيات فلو عندك ريكومند لحاجة تاني انصحني انا لسة جديد في الوضع وكمان استهلاك البنزين ممكن اروح اكشف علي اة تاني هما غالبا فحصوا الرشاشات والموتور قدام لكن لو في حاجة تاني اعملها يا ريت تقولي

**eng.m7md.ali** · 01-04-2014 02:17 PM

الاستهلاك تحسبه انك تفول بنزين للاخر وتمشي 50 كيلو او 100 كيلو وتروح تفول تاني وتشوف خدت قد ايه .. من هنا هتعرف الاستهلاك كام بالظبط

وانصحك تتابع المواضيع القديمة هنا هتلاقي الناس بتتكلم كتير عن موضوع التيل بس مقدرش انصحك بنوع معين عشان انا عربيتي واجا مش جين2