ليه اسعار الشقق التمليك بابراج فيصل بالجيزة رخيصة

بادور على الانترنت على شقة تمليك بالقاهرةمتشطبة وقريبة من المترو فى حدود امكانياتى وهى 80 الف جنيه

لقيت ارخص حاجة موجودة بمنطقة فيصل على امتداد جانبى شارع فيصل الرئيسى بمناطق
مييدان الساعه وشارع العشرين واللبينى بغطاطى والعمرانية وطهرمس الخ بالجيزة مساحات كبيرة تفوق ال 100 متر مربع فى ابراج حديثة وباسعار تبدأ من ستين الف الى 80 الف منها متشطب و بدون تشطيب او نص تشطيب مع حصة من الارض وكلها عروض تناسب امكانياتى

ممكن حد عارف ايه الاسباب لرخص اسعارها ويوضحها لى لانى لست من القاهرة

هل هذه الابراج بدون تراخيص
هل توجد عيوب فنية فيها مثلا
هل لايوجد مياه شرب نقية ويتم دق طلمبات ارضية مثلا لتوفيرها
هل لايوجد شبكات كهرباء مخصصة لها لان بعضهم يقول ان الكهرباء بالممارسة
هل لايوجد شبكة صرف صحى بالمنطقة

ارجو من الاخوة الكرام الافادة حتى لااغامر بتحويشة العمر لانى رايت بالتلفزيون عملية هدم لبعض الابراج قامت الحكومة بها خلف مبنى المحكمة الدستورية
ولو توجد شقة مناسبة و مضمونة ووضعها قانونى ياريت تدلونى عليها
ولكم منى جزيل الشكر

أكيد طبعا غير مرخصة والله أعلم الأساسات عاملة ازاي
وغالبا مفيش كهرباء رسمية ممكن يكون في كهرباء ممارسة بس
بس معلش هحبطك المبلغ اللي معاك ميجيبش شقة ولا حتى 50 متر وتكون مرخصة وبكهرباء رسمية والكلام ده
بس على فكرة مصر كلها دلوقتي من غير تراخيص والحكومة عاملة من بنها والناس بتبني زي ما هي عايزة وقبل ثورة يناير كان الحي بييجي يعمل إزالات صورية في الطوب ويقبض المعلوم والمقاول يكمل ويشطب ويبيع لكن من بعد الثورة حتى الإزالات الصورية دي مبقتش بتيجي والناس اتجرأت لدرجة شوارع رئيسية وحيوية زي جسر السويس مثلا الفلل اللي فيه بتتهد وتطلع أبراج من غير تراخيص برده
وكمان موضوع الكهرباء بقى سهل أي حد يرفع قضية على شركة الكهرباء والمحكمة تلزم الشركة إنها توصله كهرباء لدرجة إن في محامين بيتاجروا في موافقات جاهزة ! يعني ممكن تكون العمارة مش مرخصة بس تركب عداد رسمي عادي لكن الموضوع دلوقتي بقى صعب شوية مش زي الأول لكن وارد إنه يركبلك عداد مفيش مشكلة
ربنا معاك

مفيش ترخيص فى المنطقة دى عشان كده الاسعار مضروبة

هارد على حضرتك فى حدود معلوماتى المتواضعة
اولا ما تعتمدش على عناوين النت لان هاتلاقى مكتوب فيصل و ميدان الساعة و حاجات كده و فى الواقع هاتلاقيها جوة فى مجاهل كفر طهرمس اكتساح زراعات مش قريبة من فيصل اساسا
ثانيا كله مبانى بدون ترخيص و الكهرباء معظمها ممارسة أو مسروقة اصلا
ثالثا ده كلام الاعلانات و ساعة الشراء الفعلى هاتلاقى ان السعر ده المقدمة بس
احترس من النصب و النصابين و خاللى بالك كويس ربنا يسترها معاك
مافيش شقة تمليك النهاردة ب 60 الف ( ما لم تكن دى المقدمة طبعا كما قلت بالسابق ) و خاللى بالك لازم تستلم فورى بمجرد الدفع مش تدفع و يقولك هابني لك
انا ليا صديق دفع 45 الف مقدمة شقة من 5 سنين و صاحب البيت طلع بايعها 4 مرات و لقى واحد سكنها و مش عارف ياخد فلوسه لحد دلوقتى
طبعا فيه ناس محترمة بس صدقنى تاهوا فى زحمة النصب اللى فى البلد
و المثل بيقولك حرص و لا تخون
ربنا يسترها معاك و تحرى جيدا قبل الدفع

بصراحة موش عارف اشكرحضراتكم اذاى
لسرعة الرد الوافى على تساؤلاتى
انا فعلا حسيت ان فيه حاجة موش طبيعية فى الموضوع
وحضراتكم اكدتم شكوكى
انا فعلا كنت ناوى اشوف الوضع على الطبيعة واتأكد انه يوجد ترخيص للمبنى بالحى التابع له
وان المرافق متوفرة..اما التشطيب فكنت ناوى انى اعمله على مهلى بالتدريج
المهم انى الاقى المكان الكويس والسليم قانونا
خلاص ادور فى منطقة اخرى وربنا يوفقنى
وياريت الاخوة اللى من القاهرة او الجيزة يدلنى على منطقة مناسبة
اركز بحثى فيها وتكون على قد امكانياتى
ولكم منى جزيل الشكر ووافر الاحترام لجميع الاخوة الافاضل

اقتباس:

---

المشاركة الأصلية كتبت بواسطة almohaor

بصراحة موش عارف اشكرحضراتكم اذاى
لسرعة الرد الوافى على تساؤلاتى
انا فعلا حسيت ان فيه حاجة موش طبيعية فى الموضوع
وحضراتكم اكدتم شكوكى
انا فعلا كنت ناوى اشوف الوضع على الطبيعة واتأكد انه يوجد ترخيص للمبنى بالحى التابع له
وان المرافق متوفرة..اما التشطيب فكنت ناوى انى اعمله على مهلى بالتدريج
المهم انى الاقى المكان الكويس والسليم قانونا
خلاص ادور فى منطقة اخرى وربنا يوفقنى
وياريت الاخوة اللى من القاهرة او الجيزة يدلنى على منطقة مناسبة
اركز بحثى فيها وتكون على قد امكانياتى
ولكم منى جزيل الشكر ووافر الاحترام لجميع الاخوة الافاضل

---

حدد طيب إمكانياتك بالضبط علشان الناس تقدر تساعدك
طبعا زي ما قلتلك المبلغ ده ميجيبش شقة مترخصة خالص آخره هيكون مقدم وهتلاقي القسط الشهري كبير كمان
لو مش فارق معاك موضوع التراخيص وعايز شركة مضمونة وتشتري شقة 100 م ب85 ألف جنيه كاش غير 10 خدمات أسانسير وعداد كهرباء بيتدفعوا بعد فترة أنا ممكن أدلك بس اللي أعرفها في جسر السويس مش ناحية فيصل خالص

مع احترامي وتقديري لكل الاخوة اللي ردوا

اخي الفاضل انا ساكن قريب من هذه المنطقة في شارع العشرين الرئيسي تحديدا
هذه المناطق عشوائية اي انها مناطق شعبية تجد شارع عرضه 6 متر وبرج 15 دور علي الصفين
بتكون فيها كهرباء وصرف وكله سليم ولكن المنطقة مش حتعجبك
وكمان التشطيب سلق بيض للتوفير
عمتا التجربة خير دليل انزل بنفسك روح المناطق دي شوف المنطقة والشقق والعمارات اللي تعجبك شوف اوراقها مظبوطة من ارض وملكية شقق وان كان في شركاء تاكد من سريان التوكيلات
وتوكل علي الله
احب اقولك لو انتا في مقتبل العمر ممكن تبدأ بحسب امكانيات هذه المتوفرة

السلام عليكم ورحمة الله وبركاته

اتوجه بجزيل الشكر لكل الاخوة الكرام

انا امكانياتى المادية لاتزيد عن 80 الف ودى فلوس مكافأة نهاية الخدمة من معاش واسهم وووثائق جماعية يعنى ربنا يستر لازم كل شىء يكون سليم وقانونى دى تحويشة العمر كما يقولون

الشقة عايزها فى مكان قريب من المترو
وهى ليست للاقامة الدائمة بالقاهرة
هى للطوارىء لى ولاولادى يعنى للعلاج او التعليم اذا دعت الضرورة لمصلحة او امر ما بالقاهرة عشان الواحد مايبقاش تقيل على قرايبى بالفاهرة


وساعمل فعلا بنصيحة الاخوة الاعزاء واعاين الامر على الطبيعه والتأكد من صحة المستندات والتراخيص وموش لازم يكون فى فيصل وموش لازم مساحتها 100 متر يعنى سبعين تمانين بس المهم قريبة من المواصلات العامة
واكررشكرى لكل من تفاعل مع الموضوع
والله الموفق

انت بتقول الشقه تكون قرب محطه المترو ده معناه في اول فيصل عشان تكون قريب من المترو واسعار اول فيصل دلوقت من 1500 الي 2000 جنيه للمتر شارع العشرين وكفر تهرمس ارخص من اول فيصل بس بعيد عن محطه المترو طبعا سعر المتر ده نص تشطيب

اقتباس:

---

المشاركة الأصلية كتبت بواسطة wwaeel

انت بتقول الشقه تكون قرب محطه المترو ده معناه في اول فيصل عشان تكون قريب من المترو واسعار اول فيصل دلوقت من 1500 الي 2000 جنيه للمتر شارع العشرين وكفر تهرمس ارخص من اول فيصل بس بعيد عن محطه المترو طبعا سعر المتر ده نص تشطيب

---

شكرا اخى الكريم على اهتمامك وتوضيحك
لانى لم انزل لمنطقة فيصل واذا كانت الاسعار كده
فالافضل انى اشوف حاجة فى حدائق الاهرام
لانه بيقولوا انه فيه خط مترو جديد سيمد الى هناك
وانا لى قريب ساكن فيها بيشكرفى هذه المنطقة
حيث الشوارع واسعة والعمارات لاتزيد عن خمس او ست ادوار

اكررشكرى لسيادتكم ولجميع الاخوة الاعزاء ممن تفاعلوا واهتموا بالموضوع

اقتباس:

---

المشاركة الأصلية كتبت بواسطة almohaor

شكرا اخى الكريم على اهتمامك وتوضيحك
لانى لم انزل لمنطقة فيصل واذا كانت الاسعار كده
فالافضل انى اشوف حاجة فى حدائق الاهرام
لانه بيقولوا انه فيه خط مترو جديد سيمد الى هناك
وانا لى قريب ساكن فيها بيشكرفى هذه المنطقة
حيث الشوارع واسعة والعمارات لاتزيد عن خمس او ست ادوار

اكررشكرى لسيادتكم ولجميع الاخوة الاعزاء ممن تفاعلوا واهتموا بالموضوع

---

باشا اقل شقة في حدائق الاهرام تدخل في 400 الف جنيه
واضح ان حضرتك مش متابع بقالك فترة

اقتباس:

---

المشاركة الأصلية كتبت بواسطة yuong313

باشا اقل شقة في حدائق الاهرام تدخل في 400 الف جنيه
واضح ان حضرتك مش متابع بقالك فترة

---

فى شقق ب 120_150 الف هناك

اهم عيب في العمارات دي انها على فيصل
شوف الشارع واقف طول الوقت ازاي ومتعرفش تمشي فيه على رجلك فتخيل لو العمارات دي كلها سكنت الدنيا هناك هاتبقى عاملة ازاي
عن نفسي لو حد قالي خدي فيلا ببلاش واسكني هناك لا يمكن اوافق

سيدى الفاضل لا يوجد سعر 80 الف فيى متفرعات فيصل هذا السعر كان من خمس سنين حاليا 120 وانت طالع وعلى شوراع 8 متر
وبالنسبة للتراخيص فاغلبهم مش مرخص الا لو شارع رئيسى وهيكون غالى

وحاليا حدث حالات هدم للغير مرخص
فى مناطق شعبيةاخرى بالجيزة هتلاقى فيها هذا السعر ولكنها ستكون متواضعة