الموضوع: نداء الى مسئولى مصلحة الكهرباء من بواب

السلام عليكم ورحمة الله وبركاته ...

المشاركة الأصلية كتبت بواسطة lena jo

انا لسه النهارده فافكر في نفس المشكلة و ده نداء من كل بوابين مصر. انا كل يوم باخاف و انا راكبه الاسانسير و المشكلة انه بيتقطع بغباء بعد ما كان مرة واحدة . اقتراح حضرتك مهم فعلا و ضروري و انا طرحته في مشاركة في موضوع مشابه و قلت لازم خريطة لانقطاع الكهرباء عشان نعمل حسابنا و اقترحت توفير الكهرباء يكون اولا من الرقابة علي سرقة الكهرباء من الشارع من الاكشاك و القهاوي المخالفة و اجبار المحلات و المولات و اي نشاط مشابه علي استعمال اللمبة الموفرة و تقليل الاضاءة. و طبعا الزينة المستخدم فيها الانوار اللي بتنتشر في رمضان نمنعها تماما.و ربنا يتوب علينا من حياة الفقر دي اللي هما معيشنا فيها و لسة كمان ياما هنشوف

انا للاسف مشفتش المشاركة بتاعت حضرتك وبضم صوتى مع صوت حضرتك فى الاقتراحات دى وربنا يهدى المسئولين ويبدأ يفكروا فى حلول بديلة قبل الصيف ان شاء الله ...

المشاركة الأصلية كتبت بواسطة أبو آسر

يا سيدي الفاضل البلد دي كل مشاكلها الجوهرية حلولها من أبسط ما تكون سواء أزمات مرور أو زحام المؤسسات الحكومية أو أزمات طاقة وسولار وبنزين أو كهرباء أو مياه ... إلخ وقليل من النظام والضمير والتفكير والتخطيط هيحل أكتر من 80% من الأزمات
لكن لو عملت كده مش هتبقى عايش في مصر وفي ناس مش عايزة الأزمات دي تتحل أساسا لأنهم هما اللي بيفتعلوها لأغراض سياسية دنيئة من عشرات السنين والضحية في النهاية هو الشعب المصري والمواطن المطحون اللي الصهاينة وأعداء البلد عايزينه يفضل كده طول عمره ويشغلوه بأساسيات الحياة ويضيع وقته وعمره كله في البحث عن رغيف عيش ومياه وطعام غير مسرطن وبديهيات الحياة الإنسانية من كهرباء ومياه وغاز وصرف وإنترنت
لكن تقولي يفكروا ويشغلوا مخهم وينظموا أوقات قطع الكهرباء طالما لا مفر من قطعها علشان الناس تعمل احتياطاتها ومحدش يتضر والناس تبقى مستحملة ومستعدة ومتقبلة والكلام ده ؟! يبقى انت أكيد أكيد مش في مصر !

هى للاسف فعلا مشكلة الضمير اللى لو اتحلت اتحلت بيها كل مشاكل مصر ...

المشاركة الأصلية كتبت بواسطة miceg

القاهرة الكبرى من أكثر المحافظات تعرضا لقطع الكهرباء
انا بكلم أهلى في صعيد مصر والكهرباء شغالة تمام
شكلي كده هسيب الشغل فالقاهرة وأرجع تاني الصعيد
احنا لسه والله مشوفناش حاجة
حمل الكهرباء مع التكييفات لا تتحمله مصر ألايام المقبلة
يتوب علينا ربنا

هههههههههههههههه متفتكرنيش كان مسافر عند قرايبى فلقيت فعلا النور ما بيقطعش فبقالهم يابختوكم مبيقطعش النور عندكم ولما رجعت من السفر لقيتهم بيتصلوا بيا بعديها بيومين اقريت فيها الكهرباء قعدت اربع ساعات مقطوعة عندهم لحد دلوقتى مكسوف اسافر ههههههههههههههههه ....

المشاركة الأصلية كتبت بواسطة waleed0

الحل الوحيد لمشكة الكهرباء والطاقة في مصر هو رفع الدعم , ودي منطقة خطر من سنين كله بيخاف يقرب منها لانهم مش ناسيين اللي حصل ايام السادات

طبعا واسف جدا الحل ده مرفوض تماما معلش فى ناس لما بيجلها فاتورة الكهرباء 15 جنيه بتتخانق مع المحصل وتقوله ليه 15 جنيه وده حصل قدامى تقولى نرفع الدعم ...

المشاركة الأصلية كتبت بواسطة prof2013

فكره هايله بس ابقى قابلني وزي ما قال الاخ ابو اسر ان سهل يتم حل المشكله ولكن لن يحدث ذالك لاغراض سياسيه دنيئه هم يريدون ان تعود مصر الى الخلف ليس الى الامام

باذن الله مصر هتبقى احسن رغم كل اللى بيحصل او ده اللى نفسى فيه وبتمناه وبدعوا بيه دايما ...

المشاركة الأصلية كتبت بواسطة dodge2013

كرمش ورقه ب 20 جنيه وامورك سالكه باذن الله

يعني اي حد يتزنق في الاسانسير لما البواب يطلعه يديله 10 جنيه ده في اول مره

ولو اتزنق الزبون قصدي حد من السكان في الاسانسير مرتين ولا تلاته في نفس اليوم يبقى التعريفه 5 جنيه بعد المره الاولى

ولو حد مش من سكان العماره او ديليفري فا الموضوع ده متروك للبواب يشوف التسعيره الي تعجبه اكيد مش اقل من خمشتاشر جنيه

بس احتياطي قول للبواب يمد حبل ولا دوباره للمزنوق يشبك الفلوس ويطلعها عشان يضمن حقه

وسعتها البواب مش حيشتكي ده حيشكر بتوع الكهربا ولا يشد السكينه هوا بنفسه

ويمكن يبعتك تاني تقولهم لو سمحتوا كتروا من قطع الكهربا في المنطقه عندنا واهو كله ماشي

شفت ازاي العيب فينا مش عارفين نحل مشاكلنا بنفسنا بنرهق بيها المسؤولين

ههههههههههههههههههههه ... ربنا يعدل الامور

هههههههههههههههههه هى دى الحلول والا فلا ....

المشاركة الأصلية كتبت بواسطة trondo

فيه وحده طوارئ باالبطاريات
لما النور يقطع ينزل لاقرب دور و يفتح الباب وتقدر تخرج و متتحبس

دا احسن حل

الف شكر لمشاركة حضرتك ...
وبعد اذن حضرتك ممكن اعرف وحدة الطوارئ دى تكلفتها ايه وصيانتها اخبارها ايه ولازم تركب من الاول ويتعمل حسابها فى الاسانسير ولو مش معمول حسابها من الاول ليها حل ام لا ...
وجزاكم الله خيرا ...