الموضوع: بعد الاستلام - مقارنه سيراتو 2010 وسيراتو 2014

صباح الفل عليكم

الحمد لله ربنا وفقني بعد تدوير علي عربيه تكون كويسه في رينج ال 160000 وطبعا كان الاختيار علي السيراتو والموضوع هنا يقتصر بس علي مقارنة بين السيراتو 2010 والسيراتو 2014 ونقاط القوه والضعف في الاتنين

تقول المواصفات الاول

1-سيراتو 2010 سبورت وكيل
جنوط 17
جميع الكماليات ما عدا فتحت سقف ومفتاح بصمه

2- سيراتو 2014 خليجي سعودي
جنط 16
طاره مالتي
بلوتووث
تحكم اضاءه امامي
ABS
Air bag 2
تابلوه وفرش 2 لون
ايموبليزر وانذار اصلي ( حكلمكم عنه عشان تحفه وفعلا اصلي )
وباقي الكماليات الاساسيه



المقارنه :

1- الخامات - حدث ولا حرج - السيراتو 2014 يضرب القديمه بالشبشب في جوده الخامات - تحسن رهيب في جوده الخامات - ملحوظ من اول ما تفتح الباب وفي كل حته في العربيه الكيا بتنافس الالماني تقريبا لان كان معايا التيوتا والشارك وبرضه اعلي منهم
يعيب علي السيراتو 2014 ضعف الصاج الخارجي عن 2010

2- المحرك

2014 ناعمه جدا ومتجاوبه والفنيس ال 6 نقله تحفه بصراحه لكن مش حقدر اقيم التسارع عشان التليين
2010 صوت المحرك عالي طبعا عشان 4 نقله وكلنا عارفينه - عفي بس مزعج (2014 تكسب )

3- العفشه
ههههههه مش عارف اقول ايه - انا قعدت اضحك نص ساعه علي مقلب ال 2010
العربيه ال 2014 ناعمه بنسبه 200% او 300 % عن ال 2010 واكيد طبعا حيبقي في فرق عشان الجنط ال 17 بس برضوا الموضوع مختلف تماما
وده بحكم عليه من خبره في مواضيع العفشه بالذات - لا لا يا جماعه الموضوع تحت اي ظرف فرق شاسع - حتي لو الاتنين جنط 17 ( 2014 تكسب )

4- استهلاك البنزين
2014 اقل طبعا عشان ال 6 نقله لكن مش فارق كتير - مش ملحوظ يعني

5- الثبات
انا متاكد زي الشمس ان السيراتو 2010 اثبت وده عن موقفين مريت بيهم - ممكن يكون عشان الجنط ال 17 لكن برضوا احساس الثبات اعلي في 2010 ( 2010 تكسب )

6- القياده

لو بدور علي قياده رياضيه و فرك - خليك مع 2010 لان ال 2014 تجبرك علي الاستمتاع بالراحه والنعومه والهدوء
يبقي قياده رياضيه ( 2010 تكسب )
قياده دلع (2014 تكسب )

7- المساحه

السيراتو 2010 كانت شنطتها واسعه فعلا ومش فارقه كتير عن 2014 لكن المساحة الداخليه للركاب حدث ولا حرج ال 2014 اوسع بكتيييييييييير يعني اللي قاعد ورا مستريح ورجليه مستريحه حتي لو مرجع الكراسي اللي قدام ( 2014 تكسب )

8- الاضاءه الداخليه والخارجيه

السياتو 2010 احلي في الوان التابلوه ونوره والاضاءه الخارجيه كمان - حاسس ان نور ال 2014 ضعيف سواء نور الصالون او الانوار الخارجيه ( 2010 تكسب )

9- الشكل الخارجي والداخلي

وده طبعا ذوق وبيختلف من واحد للتاني - لكن انا مصر علي ان 2010 شكلها الخارجي احلي وكمان التابلوه احلي ( لو كانو عملوه بخامات 2014 مكنتش اشتاريت 2014 اصلا :) ---- ( 2010 تكسب )

10 - العزل

2014 طبعا تكسب من غير شرح

11- الرؤيا والنقاط العمياء

ال 2014 فيها مشاكل في الرؤيه فعلا سواء كانت بسبب تصميم الزجاج وحجمه او حجم العربيه اللي كبروه من غير حساب لراحه السائق - ال 2010 اسهل كتير في تحديد الابعاد ورؤيه النقط العمياء سواء في جوانب او اما وخلف السياره ( 2010 تكسب )


عموما في التقيم ده برضوا هروح لل 2014 لانها فعلا عربيه تحفه اجمالا عن ال 2010

اتمني اكون غطيت شويه من الملاحظات - ولو فيه اي استفسار انا تحت امركم ولو حبيتوا ترجعوا لمواضيعي عن تقيم السيراتو 2010 حتلاقوها موجوده :)