الموضوع: حكايتي مع التويوتا وربنا كرمني بالنيو سيراتو

المشاركة الأصلية كتبت بواسطة mostafa magdy

أخي العزيز ..
أكاد أكون أكتر واحد علي وجه الأرض خاسس بيك .. و مش عايزك تستغرب لسبب .. بس معلش هطول عليك ..
البدايه إني فكرت أبيع الاوكتافيا عشره العمر زي ما بيقولوا ..
روحـت أشوف الجديد .. كانت طالعه من عيني الأوبل أسترا الجديده و الفلوينس الجديده و كان الكورولا 2014 لسه ..
طيب يا عم خليك في الياباني و بتاع و بلاش الأوروبي .. جبت كورولا 2013 ب 172000 فئه تانيه و لون فضي برده .. و نفسي برده قافله منها مع أول ركبه والله .. بس كانت عاجبهم عندي في البيت ..
عايز أحبها والله .. بس مش عارف .. جبت لها جهاز دي في دي و جي بي إس و كاميرا و حوارات كلفتني فوق ال 5000 و نواكل أصليه .. و حاجات أد كده .. و زينون من بره مخصوص ليها .. و ترخيص 3 سنين .. و برده مش عارف أحبها .. و الحمد لله إني معملتش الفرش الجلد ..
قررت أبيعها .. كانت ال 2014 نزلت !!!!!
بعد ما صرفت أجمالي ع العربيه بتمنها و كل حاجه 185000 بعرضها قالولي ب 150000 و العربيه عامله 2000 كيلو !!من هنا لهنا إتباعت ب 165000 ..
عايز أقولك النحس الأكبر .. والله يوم ما جيت أخرجها من الجراج بتاعي باب الجراج وقف في النص .. لا يعرف يخرج العربيه ولا عايز يطلع .. جبت واحد بيعملي ليه صيانه من وقت للتاني .. ولا الهوا .. أضطر يفككه عشان أطلعا و الراجل المشتري واقف و أنا في نص هدومي منه ..
خرجنا العربيه و الحمد لله .. فوجئت بخدش بطوووووووووووووووول العربيه من الإكصدام للإكصدام و العربيه الأكياس البيضا اللي ع الكبوت و السقف و الشنطه لسه موجوده أساسا !!!
المشتري أتعفرت و حقه .. و انا قلت له خلاص لو عايز تفض الموضوع مفيش مشكله .. من هنا لهنا كان معاه راجل كبير قالي لأ إحنا منرجعش في كلامنا .. و كانوا دافعين عربون !! و إتبااااااااااااااااااعت و غارت
و جبت الفلوينس .. و الحمد لله مرتاح و زي الفل !!
معلش و قلبي عندك و ربنا يجعلها أخر خساره ..

مصطفي باشا، اولا مبروك عليك العربية .
انا عندي تعقيب بسيط، العربية عاملة زي العروسة ممكن تكون زي الفل و الناس كلها شايفنها كويسة و جميلة لكن انت متشوفهاش كدة خالص و تشوفها انها عادية و مش هي دي اللي انت عاوزها ، و تشوف واحدة تانية تعجبك جدا و تلاقي ناس كتييير جدا رأيهم مختلف عنك و يقولولك التانية احلي.
فهي ارتياح نفسي في الاول و الاخر و انت استريحت في الفلوانس و ده لا يعيب الكورولا بدليل انها عجباهم عندك في البيت.
وانا بقول و هفضل اقول اي عربية جديدة توديها عند صنايعي هيعكلك الدنيا خصوصا لو في الضفيرة و ده برضو لا يعيب الكورولا بدليل اللي حصل مع استاذ محمد بدر في السبورتاج لما الصنايعية عكولو الدنيا فهل هذا يعيبها ؟ هل لعب صنايعي و تبوظع لاي شئ في العربية يعني ان العربية وحشة او مش اعتمادية ؟ هو المفروض الاعتمادية انك تقطع الضفيرة عند صنايعي و العربية تقولك متخفش انا اعتمادية و ممكن اشتغل عادي و الضفيرة ضربت ؟
ابدا ده مش مفهوم الاعتمادية و بدون شك الكورولا معروفة باعتماديتها وزي مقولتلك لي ككامل الحق في اختيار اللي تستريح فيه و احيك علي اختيارك للفلوانس .

حاجة اخيرة و ارجوك تقبلها مني بصدر رحب ، انا شايف من وجهة نظري ان السعر اللي بعت بيه قليل علي عربية وكيل مش خليجي و حط تحت كلمة و كيل دي مليون خط ، ليه؟
لأن انا كان معايا كورولا ٢٠١١ هاي لاين كنت جايبها ب ١٥٠ الف مشيت بيها ٥٠ الف كم و بعتها بعد ٣ من الشقي و المرمطة ب ١٦٥ الف يعني بأكتر ما بعتها ب ١٥ الف و الله و الله صاحب العربية بيقولي انه طول ماهو ماشي الناس بتسأله تبيع و بكااام ب ١٧٥ والله والله الكلام ده ربنا يشهد عليه.
ممكن نكون استعجلت في البيع او وقعت مع تاجر او او بس انا بقولك اللي حصل معايا و فعلا العرببة بتتباع بكده و اكتر من اللي بعت بيه و كلامي علي الوكيل مش الخليجي لان ٢٠١٣ وكيل مستعمل بتتباع ب ١٩٥ الف و الله علي ما اقول شهيد .