أخيرا عملتها و جبت الموتوسيكل .....
كان نفسي اجيب الباجاج البوكسر بس لما سالت عليه قاللي ب 6700 و رحت تاني يوم لقيته زاد وبقى ب 7000 و المحل مش شغال قسط ...
رحت محل تاني بتاع واحد معرفة لقيت عنده الهانكو 150 ب 5600
دفعت 1500 مقدم و قسط 425 على 12 شهر باجمالي 6600 جنيه ...
المهم بقى :::
اتعلمت السواقة عليه و بدئت اتحرك بيه من 8 ايام , الطلعة صعبة وتلخبط و لسه مش قادر اظبطها .. المشي العادي خلاص بقيت معقول فيه و مش قلقان لكن في الزحمة بتلخم و انسى الغيارات ..
مشواري 50 كيلو رايح و زيهم راجع ... طبعا بوصل مكسر و ظهري واجعني و باخدلي بتاع نص ساعة على ارتاح من المشوار و بكون لابس فوق الهدوم بلوفر و جاكت عشان بطلع الساعة 6 الصبح و انا راجع بكون بالبلوفر بس ... طبعا بلبس نظارة شمس عشان تحمي عينيا ..
لسه عايز اجيب خوذة و نظارة عادية عشان لما بمشي بالليل حاجات عجيبة بتخبط في وشي وعينيا ...
مشواري كله على طريق الصعيد الشرقي و الهوا بتاع العربيات النقل تقريبا زي كرابيج المياه في حمام السباحة ... و الرملة و حاجات تانية مش عارف ايه بتخبط فيا طول الوقت بس بجاول اني مركزش ...
الموتوسيكل وانا ماشي بحس انه بيشخلل و يزن و رحت لميكانيكي ربطلي المكنة و هشوف بكره الفرق ايه ...
بتاخد لتر زيت موبيل ب 25 جنيه و التانك بياخد 16 ليتر تقريبا مش متاكد ..
و المانيوال بيقول انها اقصى سرعة ليها 90 لكن الناس بتقول انهم بيمشوا 120 .. انا اقصى حاجة وصلتها 100 في منزل و الهوا كان معايا بس حسيت ان المكنة بتلعب رحت مهدي ...كمان انا اتعلمت السواقة من اسبوع بس ولازم اكون مخلي بالي و هادي في السواقة دي مش عربية فيها كابينة و اكصدام لا دي منك للارض عدل .. و ربنا يستر ..
سبب الشرا ان العربية مع المدام في القاهرة و انا في المنيا و حتاج اتحرك في اماكن المحاجر و ايجار عربية ربع نقل بالسواق هيكلفني 250 جنيه في اليوم فقلت ان ده حل اوفر و افضل و ارخص كتير ...
المكنة لونها رمادي عشان الاسود و الاحمر منتشرين جدا في الموقف و شغالين بالاجرة لكن الرمادي ده مش موجود خالص غير المكنة بتاعتي فهتكون مميزة ...
لسه مراتي و والدتي و اخواتي ميعرفوش اني اشتريتها و سايبها مفاجأة ... والدتي من زمان ايام الكلية قلبت الدنيا لما كنت عايز اجيب مكنة و رفضت و السنة دي برضه مراتي كانت معترضة و شغالة تريقة عليا عشان هسيب الهندسة و اشتغل ديليفري .... لكن ظروف الشغل و الاحوال المالية جبرت الواحد يبيع العربية و مش هينفع اقضيها مواصلات ....
طبعا دلوقتي لازم اروح ارخص المكنة بس يمكن كمان اسبوع كده و لا حاجة لما الفاتورة تيجي من الشركة و معايا مؤقتا فاتورة من المحل عشان امشي بيها .. لكن الداخلية في مناطق المحاجر بتخاف من الناس و بيقصروا الشر معاهم عشان بعض الناس في الجبل تجار سلاح و مخدرات و هاربين من احكام ...
سمعت من ناس ان المكنة ممكن تسافر بيها مصر عادي و ان مشوار 250 كيلو مش كتير و ممكن اسافر بيها .... لكن الصراحة مش بفكر في كده خالص حاليا ..لكن هعملها قريب بعد ما ارخص ...
الصور لما ارجع القاهرة هرفعها و هحط الكتالوج بتاعها ...
مقدرش اقول انها اختيار ممتاز او انها افضل اختيار لاني مركبتش غيرها ... لكن انا شايف انه قرار ممتاز و اقتصادي ....