وحش صيني بكل ما تحمله الكلمة من معنى...FAW Besturn

**refaei** · 14-04-2014 05:52 PM

يا جماعة والله العظيم مش هزار ومش كدب العربية مجننة الناس
اصحاب شركتي اللي انا شغال فيها معاهم مرسيدس ولما جربوا العربية عجبتهم جدا ده حتى ظابط المرور ساب الورق والشغل اللي ف ايده وجربها وهي اللي عدتني من حوار الطفاية والاسعافات والكلام ده
اللي حابب يشوفها وبالخصوص استاذ باسم ممكن يبعتلي رسالة وانا اديله رق تليفوني ونتقابل في الشيخ زايد ويقولي رايه بصراحة..
انا بقول الكلام ده لان والله والله والله العربية تستاهل والناس اللي نفسها تركب عربية محترمة يستاهلوا الـ besturn
لكن والله مش دعاية ولا علشان العربية معايا بس والله علشان فعلا هي احسن من الكوري والياباني بالكامل لحد سعر 150 و 160 الف

**bassem.naguib** · 14-04-2014 11:56 PM

بسم الله ما شاء الله ولا حول ولا قوة إلا بالله .. ربنا يباركلك فيها ويكفيك شرها .. وتفضل مبسوط بيها دائماً وعلى طول .. ومتنساش تطلع حاجة لله علشان ربنا يحفظهالك .

وسعيد بدعوة حضرتك .. وإن شاء الله في القريب العاجل

**sonytogy** · 20-04-2014 04:49 AM

يا اخ refaei ممكن صور للعربية تكون طبيعية علشان نتعرف عليها اكتر وياؤيت ل تقرير للعربية بعد الالف كيلومتر

**refaei** · 22-04-2014 05:22 PM

المشاركة الأصلية كتبت بواسطة sonytogy

يا اخ refaei ممكن صور للعربية تكون طبيعية علشان نتعرف عليها اكتر وياؤيت ل تقرير للعربية بعد الالف كيلومتر

انا اسف على التاخير يا جماعة بس انتو عارفين جو الاجازات بقى
ان شاء الله هانزل الصور تاني بس هي الصور اللي منزلها دي طبيعية كانت في الشارع
انا روحت عملت صيانة الالف كيلو عند 850 علشان كنت مسافر وهي دلوقتي عاملة حوالي 1200 كيلو
هما بيغيروا موبيل 5000 او 10000 حسب رغبتك وانا قولتلهم هاغير شل الترا 10000 ومفيش مشكلة في الموضوع ده براحتك ورفعوا العربية وربطوا عفشة وراجعوا السوائل واتفقت معاهم انهم يركبولي وحدة رفع قالو مفيش مشكلة هاتها ونركبها
بصراحة الناس محترمة جدا جدا بس المركز على قدو شويتين كدة تحس انه اقرب الى الورشة وده علشان ابقى صريح معاكم بس هما بيبنوا مركز جديد بجوار القديم ان شاء الله هايبقى تمام وفي مركز كبيييييييييييير جدا في العبور بس هما مش بيهتموا بيه لان المبيعات قليلة المهم اشتريت الزيت اخدت 4 كيلو وربع بالفلتر وحاسبت على الفلتر بس بتاع فولكس ب 88 جنيه بالضريبة والصيانة طبعا مجانا
نيجي بقى للعربية اللي.... راكب جيتا مش هايحس باي فرق تماما مع الفارق ان الفاو اشيك واوسع بكتييييييييييييير وطبعا الكماليات الكتيرة عن الجيتا وعلى الطريق ولا اروع الصوت بعد 120 تبدا تلاحظه بس لو عليت الكاسيت شوية انت في عالم تاني ... مثبت السرعة طبعا شئ هايل ومريح في السفر بشكل مش طبيعي ، الكيك داون بتاع العربية مقبول لوزنها انها تقيلة في الوزن بس لما ينزل من سرعة 6 الى 4 ده شي هايل بيدفع العربية دفعة قوية
لحد دلوقتي حاسس ان استهلاك البنزين عالي شوية بس هاحسب واقولكم ... ابعاد العربية تقريبا زي الكورولا 2014 وارتفاع مناسب جدا عن الارض الحمد الله مفيش مطب لمسها لحد دلوقتي في 3 محافظات مختلفة
انا اسف طولت عليكم بس العربية تستاهل الكلام عليها بصراحة
وتحت امركم في اي حاجة

**refaei** · 22-04-2014 05:27 PM

المشاركة الأصلية كتبت بواسطة هانى ظرف منصور

هى الفاو بيسترن اتوماتيك 1600ccاصبح سعرها 110 الف ؟ انا قرات السعر دة فى عدة مواقع وبيقولوا ان دة سعر 2014 هل الكلام دة صح؟

اللي انا متاكد منه ان سعرها 138 الف وبعدين هي واقفة على التاجر اصلا ب 129 الف تقريبا بدون المصاريف النثرية بقى بتاع مخلص الجمرك والنقل للمعرض والحاجات دي ودي معلومة اكيدة بالنسبالى

**هانى ظرف منصور** · 22-04-2014 07:39 PM

كلامك سليم انا اتاكدت من السعر

**وائل محمد حامد** · 25-04-2014 04:45 PM

السياره دي عامله ايه دلوقت والتوكيل اخباره ايه

**refaei** · 04-05-2014 01:03 PM

المشاركة الأصلية كتبت بواسطة وائل محمد حامد

السياره دي عامله ايه دلوقت والتوكيل اخباره ايه

انا اسف على التاخير بس ظروف الشغل
العربية زي الفل بسم الله ما شاء الله واحساس بالفخامة والراحة وانها واسعة جدا جدا من الداخل ده احساس جميل وان الشنطة بتشيل كل حاجة ابني وكمان شنطة السفر والغطاء ده شئ هايل بجد عربية مريحة جدا
بالنسبة للتوكيل لسة هاجرب عند 10 الاف واقول القصة ماشية ازاي بس ناس محترمة جدا جدا