الصدمات و الخبطات

**moustafa_nabil3** · 05-10-2008 06:06 PM

السلام عليكم
أنا عارف أن عنوان البوست مش ظريف بس أنا كنت عايز أسأل السؤال التالي :

أنا كنت بتفحص الصفحة بتاعة تويوتا عشان كنت بفكر في الياريس ، و لقيت أن أشهر حاجة الناس بتتكلم عليها أن اكصدامات الياريس ضعيفة شوية و في كذا واحد بيحكي عن حادث حصل للعربية اليارس بتاعته و ازاي أن الخبطة على الرغم من أنها بسيطة الا انها كلفتة كتيير .
طبعا أنا معنديش أي معلومات عن اليارس اللهم الا اللي أنا بأقرأه على الانترنت .

و السؤال هو ، حسب علمي ، هناك تشابه كبير بين اليارس و السيريون و تحديدا ما علمته هو أن الموتور بتاع العربيتين واحد . فهل السيريون هي كمان اكصدماتها ضعيفة و ممكن يحصل فيها نفس الحكيات اللي الواحد بيسمعها عن الياريس ؟؟؟

أنا طبعا لا أعيب الياريس و لكن أي سيارة زي ما فيها مزايا أكيد فيها نقاط ضعف ، طبعا مسألة ضعف الاكصدامات مش مشكلة خطيرة مادام السائق في مأمن و لكن كلكم عارفين شوارع مصر المحروسة ، حيث تكون السيارة معرضة لكثير من المخاطر . أنا مش هقول واحد خبط فيك بس من أبسط الحاجات ممكن تخبط في مطب عالي رصيف طوبة عالية غطا بلاعة وووو حدث و لا حرج.

نفس سؤالي أيضا بالنسبة للماتيرا ؟؟

و ربنا يحفظنا من حوادث الطريق

السلام عليكم

**OlaOsman** · 05-10-2008 06:18 PM

أول طلوعة لية بالسيريون اتخبطت مني من ورا.. كنت طالعة على مطب صناعي مش عاملة حسابه ففرملت فجأة راح اللي ورايا عربيته لبست في عربيتي.. طبعا صوت الخبطة كان صعب اوي، انما لما نزلت أبص على الخبطة لقيت نقرة بسيطة، و ده عشان كنت بادور عليها، انما من يومين حاولنا ندور عليها امبارح انا و أخويا ما لقينهاش.

دي تجربة ممكن تدل على ان السيريون إكصدامها أو صاجها قوي.. و ممكن ما تدلش على حاجة خالص عشان انا ماعنديش خبرة أوي في خبطات العربيات.. بس عموما انا مبسوطة ان الخبطة دي ما سابتش أثر :)

**أبو عبدالله** · 05-10-2008 08:34 PM

أخي الكريم احب ان اوضح اولا ان ماتور العربيتين ليس مثل بعض

وانما مختلفين تماما

ثانيا التشابه بين الياريس والسيريون ممكن يكون في التقفيل والخامات والباقي الحاجات اما ميكانيكيا ............. لا

ثالثا موضوع الأكصدامات فهو عيب وميزة في نفس الوقت

أولا الكصدامات تقريبا زي بعض في الخامة وبما ان سعرهم قريب ايضا من بعضهم

الأكصدامات جميلة جدا في الخبطات الخفيفة خصوصا الركن والحاجات اللي زي كده
لأنها طرية وبتاخد الخبطة ومتعلمشي

يعني انا مثلا العربيه اترزعت عندي والحمد لله اكتر من 5 مرات من الخلف واطحنت
ومع ذلك لو نظرت للسيارة من الخلف مش هتصدق ان العربية دي اتخبطت جامد قبل كده

مشكلة الأكصدامات الطرية انها في الخبطات الجامده مش هتشيل الخبطة زي الاكصدام الناشف يعني

هيا ميزتها عن الناشف انها مش هتنكسر ولا هتتعوج لأنها بترجع تاني عادي لمكانها

**MoToRiZeR** · 06-10-2008 05:34 AM

انا في مرة خبطت في عمود واحد حاطه يحجز بيه ركنة و مكنتش شايفه في المراية .. و يعني الإكصدام إطحن لأني كنت راجع بسرعة شوية و إتخلع من مكانه و كان معايا واحد صاحبي إترعب من شكله .. و لاقاني عادي جداَ رحت مدخل إيدي ورا الإكصدام رديته و شبكت الكلبسات بتاعته رجع زي ما كان مفيش أثر غير للخدوش بس . كان نفسي أصوره عشان محدش كان هيصدق المنظر .

فا السيريون ممتازة للخبطات و الترييحات اللي علي سرعات مش عالية و هي دي الشائعة في مصر إن واحد يخبطك في مطب أو في إشارة أو تريح علي حجر كبير مش باين إن عمود واحد زارعه في الأرض عشان يركن وسطيه .. و دي ميزة إن الإكصدام مرن جداَ ..إنما لو الإكصدام فيبر أو صاج مش هينفع ترده إلا عند السمكري .. بس في الحوادث علي سرعات أعلي شوية إكصدام السيريون هيتدغدغ طبعا و معظم السيارات الحديثة بتدمر تماما في الحوادث و العياذ بالله .. لسة شايف في المنيل ياريس واخدة خبطة كلت الشنطة كلها و الله إتقلبت هاتش باك . ربنا يكفينا جميعاَ شر الحوادث .

**hitham_sh** · 09-10-2008 09:44 AM

انا راي ان اكسضمات السريون جميله جدا جدا ومن احسن مميزاتها انا خبطتها مش اقل من 10 مرات ورى وقدام كل الي بيحصل انها ياما تطبق شويه لجوه فادخل ايدي من ورى الكرتيره واردها تاني او يتفك من مكانو فاركب الكلبسات تاني وخلاص ولا يبقى الا الخدوش