ماذا تفعل أذا أضطرتك الظروف لخناقة مع سواق ميكروباص

**فتح الباب** · 06-04-2014 03:32 AM

كل الردود ذات فكر راقى ......... كل الاحترام للاخوه الزملاء . تحياتى

**Amr Elshamy** · 06-04-2014 03:50 AM

انا اكم ما بيحصل معايا وبالاخص مع سواقين التاكسي ومرة سواق تاكسي نزل وقعد يصيح بصوت عالي وانا مردتش عليه نهائى قولتله انت راجل محترم ومتشكر لانك احترمتنى قدام مراتي طبعا هيغلط تاني ف طبيعي مش هرد عليه وانزل للمستوى دا لان الاشكال دي بتبقي مبرشمه وحتي لو مش كدا مش هعرف اتخانق ومعايا مراتي
لكن بقي لو مش معايا مراتي انا تحت الكرسى بتاعي حاجه بتوفى الغرض للاشكال اللى زي دي ف لما بكون لوحدي ببقي زيهم ويمكن على اوحش كمان " هعمل ايه مضطر "
ف نصيحه طول ما معاك مراتك اوعى تتخانق

**VTEC** · 06-04-2014 03:56 AM

بص يا باشا فى الزمن ده اتبع مبدأ السلامه متضمنش السواق ده يبقى شارب ايه ولا واخد حبايتين مخلينه مش حاسس بنفسه فدايماّ حاول تتجنب المشاكل مع الفئه دى بالذات
انا حصل معايا موقف مشابه كنا عربيتين ورا بعض و سواق مكروباص قطع الطريق على واحد صاحبى ماشى قدامى كان حيلبسه فيه يا اما فى الرصيف بس الحمدلله عرف يلم العربيه المهم صاحبى كان معاه اتنين كمان فوقف قدامه و نزل يزعق و السواق غلطان و مش عاجبه الكلام و ابتدى يزعق و يشتم و الموضوع قلب بخناقه و كان السواق معاه واحد كمان واحنا كنا خمسه طبعاّ السواق واللى معاه اتروقو لولا الناس اللى وقفت تحوش كانوا محدش فيهم طلع من تحت ايدنا بس الحمدلله ربنا ستر ساعتها مكنش معاهم سلاح
بص حاول تبقى بارد كده و متنفعلش و دايماّ حط احتمال ان اللى قدامك ده مش باقى على حاجه سواقين المكروباصات دول ملوش بيت ولا مستقبل عشان يخاف عليه
وربنا يستر طريقنا كلنا

**MEMODINA1** · 06-04-2014 04:42 AM

اولا الموضوع دا مهم جدا جدا وبيتكرر كل ثانية مش كل يوم ..
بص نصيحة منى فى الايام دى لو اتخانقت ممكن تروح فيها مش مجرد كلمة لاة بجد ممكن تاخد مطوة او كباس او اى حاجة لان الناس دى بتبقى شاربة وبيبقى غاية فى قلة الادب وعدم الاحترام وانعدام الاخلاق ...

بس راى بصراحة مينفعش تتخانق لانك معاك زوجتك ودا خطر كبير عليها صدقنى.. وكمان هما اتنين وانت لوحدك وطبعا محدش يقولى انى واحد بس اللى هيتخانق لاة هتلاقى الاتنين عليك ولو كانوا عشرة برضة هتلاقيهم كلهم عليك .. معدش فية رجولة اصلا فى الناس اللى زى دى ... وصدقنى اول ما هتتخانق محدش هيجى جمبك من الناس اللى فى الشارع الكلام دا كان زمان ..هيسبوك لحد ما واحد فيكم لقدر الله .. ممكن يموت التانى ..

انا كمان اتمنى اسمع رد باقى الاعضاء ..
خدوا بالكم الراجل لوحدة وكمان معاة زوجتة فياريت الردود تبقى فيها منطقية شوية ..

**hilal** · 06-04-2014 05:25 AM

مع احترامي للجميع
تقديري للموقف كما يلي:
1- لو انا اللي غلطان ، هحاول امتص غضبه ، واعتذر له ، وغالبا بينتهي الامر على خير
2- لو هو اللي غلطان فلابد من تقدير الموقف وتوازن القوى كما يلي:
- لو معاك اسرتك ، الزوجة او الاطفال ، فلا داعي للبهدلة ، اعتذر برده وامتص غضبه عشان اسرتك
- لو لوحدك او معاك صديق ، وتقدر عليه بسهولة ، انزل واعمل معاه الواجب
- لو حسيت ان توازن القوى في صالحه ، ماتردش عليه ، حتى لو شتمك واستفزك ، لانك لازم تختار اخف الضررين
تحياتي لسيادتك

**dodo2000** · 06-04-2014 09:22 AM

مينفعش تنزل من نفسك مع الاشكال دى لان بكل بساطة اى حد فينا خربوش صغير فى الوش هيأثر فينا و على مظهرنا و وضعنا وسط الناس و الشغل و فى كل مكان على العكس الاشكال دى ولا يفرق معاها حاجة حتى لو وشهم مقسوم نصين و غير كده ساعة النرفزة الشيطان بيبقى شاطر و ممكن تموته ولا تعمل حاجة تضرك
فبكل بساطة و بكل برود اعصاب تقوله معلش حقك عليا و مأخدتش بالى و هتمتص غضبه

**mummy_47** · 06-04-2014 09:54 AM

المشاركة الأصلية كتبت بواسطة memodina1

اولا الموضوع دا مهم جدا جدا وبيتكرر كل ثانية مش كل يوم ..
بص نصيحة منى فى الايام دى لو اتخانقت ممكن تروح فيها مش مجرد كلمة لاة بجد ممكن تاخد مطوة او كباس او اى حاجة لان الناس دى بتبقى شاربة وبيبقى غاية فى قلة الادب وعدم الاحترام وانعدام الاخلاق ...

بس راى بصراحة مينفعش تتخانق لانك معاك زوجتك ودا خطر كبير عليها صدقنى.. وكمان هما اتنين وانت لوحدك وطبعا محدش يقولى انى واحد بس اللى هيتخانق لاة هتلاقى الاتنين عليك ولو كانوا عشرة برضة هتلاقيهم كلهم عليك .. معدش فية رجولة اصلا فى الناس اللى زى دى ... وصدقنى اول ما هتتخانق محدش هيجى جمبك من الناس اللى فى الشارع الكلام دا كان زمان ..هيسبوك لحد ما واحد فيكم لقدر الله .. ممكن يموت التانى ..

انا كمان اتمنى اسمع رد باقى الاعضاء ..
خدوا بالكم الراجل لوحدة وكمان معاة زوجتة فياريت الردود تبقى فيها منطقية شوية ..

انا معاك مائة في المائة...احنا مش بتوع خناقات ..احنا ناس متعلمة ومتحضرة ..مينفعش ننزل لهذا المستوى المتدني...
انا هقولك اعمل ايه لو في مكانك....الراجل داخل علي وبيشوح وبيزعق:
مش هنزل من العربية نهائي...
انا اسف مش قصدي..مخدتش بالي .. وحقك علي ....انت معاك حق..
في اي حاجة حصلت للميكروباص ..هدفعلك ثمنها ...
هتلاقيه مشي على طول لانك حسسته انه هو المنتصر ...وانت مش هتقابله تاني ..
ممكن تاخذ رقم الميكروباص وتعمل محضر بعد كده....لكن مش هتاخذ حق ولا باطل لانه ممكن يصتقصدك...
اوعى تبهدل نفسك في اي خناقة ..دايما حاول تتجنب الخناقة. لانك دايما هتكون الخسران والخناقات اللي بالايدي بعتبرها بتاعه المتخلفين...يعني مش لازم كارفور في وقت متأخر كده.....انا معود نفسي من بعد الثورة اقصى مشوار اناوالاسرة 9 مساء...لكن لو لوحدي ممكن 11 او 12وده نادرا جدا عشان م.هاني هو اللي بيسهرني في المركز
...وربنا سيتر علينا جميعا

**Mustafa_Zain** · 06-04-2014 10:45 AM

أنا عارف المكان ده كويس جدا جدا جدا... وده للأسف ملوش حل نهائي لأ ده سوء تصميم للنفق... أهم حاجة إنك تكون حافظ مكانه كويس ومستعد له من بدري أو تدخل التفريعة الغلط وأمرك لله وتلف من أي مكان تاني... المشكلة الأكبر إنه في مدخل اسكندرية وصعب على أي حد مش اسكندراني إنه يتوقع مكانه...

المهم... أنا للأسف من الناس اللي بتؤثر السلامة في أي موقف لأني مش بتاع خناق وممكن فعلا يكون شارب أو معاه سلاح والحمد لله اللي زيي ملوش ديه في البلد... أنا بحاول أكون بارد على الآخر ونظام معلش، حقك عليا، مخدتش بالي، أنا غلطانلك، وفي أغلب الأحيان أول لما بكسر على أي حد بأرفع ايدي علطول وأعتذر عشان ميتعملش معايا اللي حصل معاك...

تبقى المشكلة الجوهرية إن الشخص ده ممكن يكون من النوع (الــ..............) ويكون طالبه معاه خناق وهنا ربنا يسترها معاك ومعانا...

أخيرا أذركم ونفسي بقول رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قُتِلَ دُونَ مَالِهِ فَهُوَ شَهِيدٌ ، وَمَنْ قُتِلَ دُونَ أَهْلِهِ فَهُوَ شَهِيدٌ ، وَمَنْ قُتِلَ دُونَ دِينِهِ فَهُوَ شَهِيدٌ ، وَمَنْ قُتِلَ دُونَ دَمِهِ فَهُوَ شَهِيدٌ )

**amr011111** · 06-04-2014 10:53 AM

فيه كذا تصرف للموضوع ده
1- لو انت عارف انك تقدر تضربه وتخرشمه يبقى متفكرش لحظه وانزل كسره لانهم فئه ضاله الا من رحم ربى

2- لو انت مش بتاع خناقات وضرب يبقى انسى موضوع انك تقعد ساكت او تهديه علشان هوه هيزود فى الحكايه طالما لقاك جايب ورا فالحل انك تنزل تزغق وتعلى صوتك وتقوله يا بنى ادم ما انا هلبس فى الرصيف وحبة زعيق وخلاص

**MEMODINA1** · 06-04-2014 10:59 AM

المشاركة الأصلية كتبت بواسطة mummy_47

انا معاك مائة في المائة...احنا مش بتوع خناقات ..احنا ناس متعلمة ومتحضرة ..مينفعش ننزل لهذا المستوى المتدني...
انا هقولك اعمل ايه لو في مكانك....الراجل داخل علي وبيشوح وبيزعق:
مش هنزل من العربية نهائي...
انا اسف مش قصدي..مخدتش بالي .. وحقك علي ....انت معاك حق..
في اي حاجة حصلت للميكروباص ..هدفعلك ثمنها ...
هتلاقيه مشي على طول لانك حسسته انه هو المنتصر ...وانت مش هتقابله تاني ..
ممكن تاخذ رقم الميكروباص وتعمل محضر بعد كده....لكن مش هتاخذ حق ولا باطل لانه ممكن يصتقصدك...
اوعى تبهدل نفسك في اي خناقة ..دايما حاول تتجنب الخناقة. لانك دايما هتكون الخسران والخناقات اللي بالايدي بعتبرها بتاعه المتخلفين...يعني مش لازم كارفور في وقت متأخر كده.....انا معود نفسي من بعد الثورة اقصى مشوار اناوالاسرة 9 مساء...لكن لو لوحدي ممكن 11 او 12وده نادرا جدا عشان م.هاني هو اللي بيسهرني في المركز
...وربنا سيتر علينا جميعا

كلام مظبوط تماما .. فعلا هما بيكونوا عايزين يحسوا بالانتصار فقط .. اعتقد دى زى حالة نفسية عندهم .. او مرض نفسى .. عموما موضوع الخروج متاخر دا انا لغيتة من حياتى لما يكون معايا عيلة او زوجتى لان مبقاش فى لا امن ولا امان فى كل المناطق .. على فكرة احنا من حقنا نخرج فى اى وقت ولكن صدقنى بعض التنازلات حاليا عشان تتجنب المشاكل ... هنالك مقولة تقول ... لولا الخطا لما وجد الندم ..!

الموضوع: ماذا تفعل أذا أضطرتك الظروف لخناقة مع سواق ميكروباص

LinkBack

أدوات الموضوع

عرض

-

-

-

-

-

المواضيع المتشابهه

سواق ميكروباص كان عجوز و سايق بالناس

سواق ميكروباص كسرلي الاكصدام الامامي

سواق ميكروباص

سواق ميكروباص من بنها للدائري

ماذا تفعل إذا اضطرتك الظروف للسفر للخارج وترك سيارتك بدو تشغيل

الكلمات الدلالية لهذا الموضوع

المفضلات

المفضلات

ضوابط المشاركة