اقتراح حملة شكاوي لمنطقة المطبات بطريق السخنة - القطامية
السلام عليكم ورحمة الله وبركاته
طبعا كلنا عاصرنا الحادث المفزع اللي تعرض له كريم منير واحمد عبد العزيز ومدام سماح ( بسكوتة ) اثناء الرجوع من السخنة في عيد ميلاد المنتدي اول امس والحمد لله ربنا ستر والاصابات كانت خفيفة وربنا يتم شفاهم علي خير
الحادث كان بسبب المطبات الموجوده عند نهاية الطريق عند القطامية
الطريف بياخد منحني جامد يمين وبينتهي عند منطقة مكسرة ومظلمة اللي هي مدخل الدائري
اللوحات التحذيريةقبل المطبات مش واضحة ومش كافية وتكاد تكون منعدمة خصوصا بالليل
والاكثر خطورة ان الطريق ده السرعة فيه 120 والطريق ممهد كويس والناس بتجري فيه ... وفجأة يلاقو المطبات دي وهي حوالي 6 مطبات بين كل منها اقل من 50 متر
واللي مش ح يلاحظ اللوحة التحذيرية ومش حافظ الطريق ح يضطر انه يفرمل بشدة وطبعا لو اخد المطب بسرعة العربية ح تتبهدل وممكن تنقلب
ده غير ان اللي وراه ممكن يخبط فيه نتيجة الفرامل المفاجأة
طبعا احنا بننصح اي حد على الطريق انه مش بس يحترس في المنطقة دي ... لكن كمان لازم يشغل فلاشر الانتظار لتنبيه اللي وراه لأنه ممكن يكون مش حافظ الطريق او اول مرة يمشي عليه او مخدش باله من اليافطة التحذيرية اليتيمة اللي موجوده
طيب احنا دورنا ايه كمنتدي سيارات رائد في مصر ؟؟
انا باقترح نعمل حملة جماعية في نايل موتورز باننا نبعت شكاوي لادارة المرور وللجهات المسئولة عن هذا الطريق نطالب فيها بوضع لوحات تحذيرية متعددة ومضيئة علي مسافة كافية قبل المطبات لا تقل عن 500 متر
وعمل مطبات عين قط تحذيرية قبل المطبات ب 100 متر لضمان عدم تكرار الحوادث بسبب هذه المطبات وايضا بضرورة رصف واضاءة مدخل الدائري الذي هو في حالة يرثى لها بما لا يتناسب مع مدخل القاهرة من طريق السخنة الذي يمثل شريان حيوي لمنطقة سياحية في منتهى الاهمية
...
احنا عددنا بالآلف في هذا المنتدي الجميل
لو فقط الفين او 3 آلاف شكوي وصلت لادارة المرور ووزارة الداخلية ومكتب رئيس الوزراء ومحافظ القاهرة
اكيد ده ح يضطرهم للحركة وعمل اجراءات سلامة في هذه المنطقة
وبكدة يبقي اصابات زملاءنا وتلفيات سياراتهم لم تذهب هباء ... بل تسببت في اصلاح جزء خطير من الطريق وانقذت ارواح وسيارات ممكن تتعرض لنفس الحادث واسوء كمان
انا ح ابدأ البحث عن العناوين ونشرها هنا
وكل واحد يكتب شكوي لكل جهة ... اعتقد مش كتير 3 او 4 خطابات ان كل زميل يرسلها لانقاذ ارواح ممكن تروح في هذا المكان الخطر
في انتظار رأيكم ومقترحاتكم
