-
تحذير من أرابكوم
السلام عليكم ورحمة الله وبركاته
الموضوع دا يا جماعة أنا كنت شفته على أحد الجروبات على الفيس بوك وبصراحة إستفزنى تعامل أرابكوم مع العملاء بتوعها اللى بيدفعوا دم قلبهم علشان ياخدوا حاجة أصلية ومحترمة.. ولكن هيهات.. أرابكوم كمان طلعوا نصابين وبيستوردوا جنوط ورق.. يعنى حتى الجنط الصينى مش هيحصل فيه اللى حصل
انا تواصلت مع صاحب المشكلة وعرضت عليه انى أنقل المشكلة بتاعته هنا فى المنتدى علشان بس الشركات الكارتونية اللى عاملة لنفسها إسم على مفيش وإتضحوا إنهم زيهم زى أى ورشة كاوتش على الطريق.. ونبتدى الحكاية اللى انا واخدها كوبى وبست من صاحب المشكلة واللى كمان هحط رقم تليفونه للى مش مصدق
بسم الله
انا اشتريت الجنوط دي يوم ١٤/١١ اللي فات و بعديها بشهرين تقريبا او شهر و نص و انا راجع من الشغل و ماشي في حدود ال ٨٠ ٩٠ لبست النقرةاللي في الصور و العربية طبعا قعدت تعووم و كانت هتلبس في الرصيف المهم
الحمد لله و تاني يوم طلعت علي ارابكوم قالي يا باشا احنا في مصر و زعقت و سيبت الجنط علي اساس انهم هيبعتوا الصور للوكيل و يشوفو رادوا ايه تاني يوم مفيش تالت يوم قالولي لو عايز نجبلاك علي حسابك فردة قولتلهم لأ ده المفروض انتوا تتحملوه و المهم قالوا لأ و بعدين مكانوش عايزين يدوني فاتوره اصل الحسابات مش موجودين و اي كلام و رحتلهم يوم من بدري و نزللي ابن صاحب الحل و في أيدوا الفاتوره و بعدين قالي احنا في مصر و بتحصل و طلاعلي جنط مكسور و قالي شوفت قولتلوا مش بالطريقة ده مش من اول نقرة في الشارع يحصل كده قالي انا ممكن اجيبلك فردة تانية و هتدفع حاجة بسيطه لما تيجي و لو معجبكش ارجعلك الطقم و اديك فلوسك كلها قولت الاحترام ده غريب و اداني الفاتوره و قالي شهر عشان الفرده تيجي وفضلت مستني بدل الشهر شهرين و شوية و بعدين كلموني قالولي الفردة جت قولتلوا طيب اجيب معايا كام قالي ١٣٠٠ قولتلوا فين بقيالحاجة البسيطة قالي ماهو كده بعد الخصم قفلت معاه وكلمت ابن صاحب المحل قالي تمام ماهو انا عملك كده خدمه و مش هتحمل انا تمن الجنط قولتلوا خلاص انا كده مش مسترايح انا هرجع الباقي وروحت فكوا الجنوط و خدوا التلاته و كشفوا عليهم و بعدين قعد يقولي هنا في خاربوش و دول مستعملين و انا هديك ٦٠٪ من تمن التالات جنوط قولتلوا ده كده يبقي حرام قالي ده كل الي اقدر اعملوا معاك لو عندك حد ياخود منك تالت فرد بيعهملوا انا خالاص مش هبيعلك الفرده الرابعة
طبعا كده انا بقي معنديش حل تاني حاولت ازويد المبلغ شوية قالي مفيش هما ال ٢٥٥٠ جنيه طبعا كده الطقم راح في دهية و قالي اتفضل روح على خزينة المحل روحت قالي الفاتورة عشان احسب اتدهالوا وبعدين مرجعهاش راح قاللي انا هخدها عشان هعمل بيها ارتجاع و ابن صاحب المحل قالي انا هديهم لواحد بيشتري جنوط مستعمله المهمم اخدت الفاتورة عشان اصورها بالموبيل شدها مني و مرديش يديهالي وبعدين طلعت بره عشان اعمل تليفون اشوف اي حد يعرفهم مفيش فايده و دخلت لقيت واحد بيزعق وبيصولوهم عايزين تدولوا الفاتوره عشان يروح يعملوكوا بيها مشكلة المهم انا عشان اطلع بأي حاجة قولتلوا انا مش هعملوكوا حاجة فين الفلوس و لا مش هتدوهالي بردوا قالي اتفضل و قولتلوا فين الجنط المكسور اللي ابن صاحب المحل قالي ده بتاعك مش بتاعي خلاص اخدتوا و مشيت عشان هوا ده اسبات حقي الوحيد مع العلم ان فردة الكاوتش سليمه ١٠٠٪ وقولتلهم كده قالولي عادي و في صورت الفاتوره و هما بيشدواها مني
انا كنت دافع ٥٧٠٠ في الجنط سبتوني لغايت ما حطوني بعد ٣ شهور تقربيا امام امر واقع و رمولي ٢٥٥٠ وحتى مرضيوش يدوله فاتورة بالكاوتش
لؤى سمير
٠١٠٠٠٠٨٢٢٦٦
http://imageshack.com/a/img854/9936/0st9.jpg
http://imageshack.com/a/img849/3017/fm7l.jpg
http://imageshack.com/a/img843/6067/31nv.jpg
http://imageshack.com/a/img513/6184/wyfk.jpg
م/أحمد نبيل
-
لا حول ولا قوة الا بالله .... ربنا يعوض عليه الناس خلاص الفلوس بيخلوها تتحول
-
استغفر الله العظيم
كأنك بعت الطقم مستعمل يعني
-
-
فى بعض الناس بقت اهم حاجه عندهم الفلوس وارواح الناس فى ستين داهيه بس هيا دى مش نصاحه ولا فهلوه علشان خايف من الفاتوره ومش خايف من ربنا لا حول ولا قوة الا بالله
-
طيب الحل إيه مع الشركة القذرة دى اللى أرواح الناس بتمثلهم مجرد فاتورة خايفين إنها تطلع
-
-
لا تقلق
المشكله فى مصر ان كل واحد بيبص تحت رجليه مش بيعمل لحساب سمعته
المحل اللى باعله الجنوط ده ان أجلاً ام عاجلاً هيقفل
وبدل ما كان حاطط فى مخه انه يتوسع ويبقى عنده فروع كتير
-
-
-
-
-
انا معرفش تفاصيل الموضوع, بس انا اعرف احد اولاد صاحب المحل ,و بأمانة ربنا على المستوى الشخصى شخصية محترمة جدا و بتاع ربنا, و الله أعلم.
-
انا حاط رقم التليفون الخاص بصاحب المشكلة... الجنوط تمنها حوالى 7500 جنيه على ما أتذكر
-
ربنا يعوضه
انا شوفت الموضوع ده في صفحة علي الفيسبوك و انا كنت ناوي اشتري جنوط منهم لكن بعد الحركات اللي هم عملوها غيرت رأيي
-
قال رسولنا الكريم صلى الله عليه و سلم "من غشنا فليس منا " صدق رسول الله صلى الله عليه و سلم
الحقيقة احنا نفتقد الاسلام فى كل تعاملاتنا و التحذير بقى من اى حد و فى كل شى الامانة و الصدق و الضمير و الخوف من ربنا ضاع للاسف الشديد و بقينا بدور على الدقن و الجلالبية و نسينا اخلاق صاحب اللحية رسولنا الكريم عليه افضل صلاة و سلام
-
حسبنا الله ونعم الوكيل ..
هما عندهم حق احنا فعلا في مصر ..
بس في الغش والنصب مش في الطرق وبس
-
هو فعلا الافضل ان الناس كلها تعرفهم وتقاطع التعامل معاهم .. ده الحل
-
ربنا يعوض عليه - النصب بقي في كل حاجة ربنا ينتقم منهم
-
-
علشان كده التعامل نع التوكيل انضف و اضمن بدل الشركات الزباله دي
-
هو طبعا اخد الفاتوره علشات التاني ميبلغش حماية المستهلك ,,,,انصح كل واحد انو ياخد الفاتوره بعد ميشتري اي حاجه ,,,,علشان التجار بيخافو جدا من حماية المستهلك و ده عن تجربه
-
ربنا يعوض عليه
يعنى أدفع 7500 جنية وبعد شهرين أخدهم 2500 حسبى الله ونعم الوكيل
المفروض أرابكوم تاخد عبرة للحصل لشركة على رضا المتخصص لجنوط المرسيدس والبى أم
وبسبب السياسة الزفت والاسعار الأوفر قفل وكان قد أرابكم كام مرة
أنا من رأى كن راح على حماية المستهلك كان أحسنلة
وربنا يسترها معانا أجمعين
-
اكيد ياجماعه الجنوط ديه مقاسه كبير والكاوتش low profile والنوع ده من الكوتش ممكن اي نقره جامده تكسر الجنط ده حتى لو الجنط اصللي والكوتش احسن نوع كان ممكن برضو يتكسر، بصراحه انا مش شايف اي غلض على ارابكوم وهم كده ناس محترمين انو رضي يشتري منك جنض مستعلم.
يعني خاليك مكانهم واحد اشترى منك low profile tires والناس كلها عارفه المقاس ده خطر ازاي في شوارعنا( والله حتى في استراليا كانت بتشتكي من الشوارع مع الانواع ده من الكاوتش) وبعد كام يوم دخل في حفره والا بلاعه وبعد كده جي يقولاك الجنوط ده وحشه وده غش، بصراحه كلام مش منطقي
-
لابد ان الشركه دى لو محترمه كانت ترد على كل ده او تحاول ارضاء العميل باى طريقه او اسلوب يتوافق بين الاتنين ولكن من الواضح انها شركه بتحاول نهب جيوب المتعاملين معها .... دون وضع الحساب ان تاتى مشكله زى دى من الممكن ان تؤثر سلبا على التعامل معها ..... وان كان اى فرد فيها مؤدب وعلى خلق طيب كان فين وقت الاشكال ده ولماذا لم يحاول التوفيق بين العميل من جهه والشركه من جهه اخرى وبحيث ان كلا منهما يتحمل جزء من الخساره مع ترضيه العميل ..... ياخوانا العميل وسمعه اى شركه اهم كتيييييير من الفاتوره وكام الف تلهفهم الشركه بنطاعه من العميل ... هل الشركات في مصر فاهمه كده ........ واحب اعرف من كل الاخوه الاعضاء المحترمين ازاى ممكن تتعامل مع شركه زى دى بعد كده .... ولو الشركه بريئه من كل او جزء من زللك عليها التوضيح .... تحياتى للجميع .
Content Relevant URLs by
vBSEO 3.6.0 PL2