استمراراً لمسلسل الحرائق....حريق بمنزل لنا!

**NaderNabil** · 06-10-2008 12:44 AM

إمبارح الساعة 11:30 باليل كنت قاعد عند واحد صاحبي في البيت عازمنا عزومة من اللي هي...فراخ و كباب حلة و مكرونة ....حاجة كده تفتح النفس...

لسه كنا هانقوم نقعد على السفرة...الاقي خالي بيكلمني و بيقوللي البيت بتاع وادي حوف مولع ....هات المقاتيح بتاعته و تعالى هناك بسرعة...

البيت ده أصلا مهجور من حوالي 8 سنين كده...هو عبارة عن دور واحد و فيه شقتين...واحدة تبعنا و التانية مأجرنها لناس معرفه و كده....الشقة بتاعتنا فاضية تماما...و الشقة بتاعة الجيران فيها كل العفش تقريبا بس محدش عايش فيها...

أوصل هناك ألاقي عريتين مطافي و الناس ملمومة و دخان و نار من الشقة بتاعة الجيران....فضلوا حوالي ساعة بيطفوا فيها.....

السؤال بقى ايه سبب الحريق...رغم ان البيت مهجور و مافهوش كهرباء حتى و لا عداد و مقفول من كل ناحية؟

بعد ما خلصوا بتوع المطافي دخلنا نبص ...لاقينا شباك المنور (حديد) مفكوك و القزاز اللي وراه مكسور و طبعا حرامي دخل!!

بس لازم أحكيلكوا الأول علي قصة ليها علاقة بالموضوع ده....

من حوالي سنة كان فيه حرامي بيخش الشقة دي و تقريبا كان عايش فيها:D....المعفن سرق احواض الحمامات و المطبخ و لامؤاخذه المراحيض.....و طبعا طول ما هو قاعد في الشقة كان بيتسلي و ياخد حاجة....مرة يفك كبلات الكهرباء كلها....و مره اتسلي علي التلاجتين و خد الكومبريسور بتاعهم.....ماهو فاضي بقي و محدش دريان بيه....
لحد ما في يوم الجيران من العمارة التانية حسوا بيه و بلغوا البوليس و قبضوا عليه متلبس...و طبعا اتسجن!

القصة دي ربطناها باللي حصل امبارح.....و فيه استنتاج من اتنين:

1- اما انه خرج من السجن و قرر ينتقم فا دخل بنفس الطريقة اللي كان بيخش بيها وولع في البيت

2- اما انه كان برده عايش جوه و ده اللي برجحه أكتر....و هو قاعدد ولع سيجارة و رماها فا مسكت في الباركيه او مرتبة أو أي نيلة زرقاء....
أصلا الأوضة اللي اتفحمت تماما كان ناقصها دولاب و نيش!!!!يعني ممكن يكون قلبهم في سكته و هو قاعد....و كمان لاقينا في المنور رغيفين عيش طازة و مكان معمول كأن فيه حد قاعد عليه....

المهم ان فيه محضر و جم عاينوا و ماشيين في الإجراءات دلوقتي...

انا بقي مش عارف ايه قصة الحرائق اللي ماشية اليومين دول....زي مايكون شوية هواء فيهم شرار ماشيين في مصر كلها و المكان اللي بيعدوا فيه لازم يحرقوه....

بجد زهقت....

ربنا يحفظنا و يحفظكم جميعا

**1.8Tee** · 06-10-2008 01:02 AM

لازم بواب أو حارس يا نادر.

**Ayman_Abdullah** · 06-10-2008 01:09 AM

شكل الحرامى كان بيحب الشيبسى و لما عرف انه ولع النهارده قرر ينتقم

ولا يهمك ياباشا اللى يجي فى الريش بقشيش

انا رأيى أجرها أحسن

**Nour_Peugeot** · 06-10-2008 01:16 AM

علش يا باشا الكام ده بظبت حصل معا واحد صحبي و سرق بلاط الشقة بالكامل

**NaderNabil** · 06-10-2008 01:19 AM

علش يا باشا الكام ده بظبت حصل معا واحد صحبي و سرق بلاط الشقة بالكامل

واحنا واقفين و احد من الجيران بيحكلنا ان كان عندهم شقة مركونة بردو...و الحرامي مسح الشقة...مسبش فيها فتفوتة....حتي الأبواب و الشبابيك و الحلوق بتاعتهم أخدها...كان ناقص ياخد الطوب و يسبها عواميد!!

بس جديد موضوع البلاط ده:)

انا رأيى أجرها أحسن

هي تتباع عشان نخلص من قرفها

**islambana** · 06-10-2008 02:07 AM

ربنا معاكم يانادر ويصبركم وكويس انكم فكرتوا في حكايه البيع دي

**WalidAdel** · 06-10-2008 02:14 AM

الله يكون في العون والله بس حكاية انه كان قاعد فيها دي غريبه اوي هيا في صحراء مفيش جيران او اي حاجه يحسوا بيه يعني و هوه اصلاً مخفش و هوه بيفكك البيت حته حته و طلعهم ازاي و الناس فين يعني اللي في الشارع
قلبه جامد اوي الحرامي ده

**aif** · 06-10-2008 02:21 AM

ربنا يعوض عليكم يا نادر
الحمد لله ان مافيش اصابات
...
لكن فعلا لازم البيت ما يتسابش كدة ....لأن واضح انها بقت معروفة عند الحرامية .... وخلي بالك ممكن يكونو بيقولو لبعض علي الاماكن الخالية اللي مافيهاش حراسة
يعني ممكن الجدع اللي في السجن ده يكون قال لواحد زميله في السجن علي المكان ده عشان يستخبى فيه مثلا ..
.......ايه حكاية الحرايق الكتير دي .....هي الدنيا مولعة كدة ليه ؟؟؟؟؟؟