عربيه لانوس ١ مستعمله ... تعمل ايه اول ماتشتريها

**Trondo** · 07-04-2014 04:38 AM

اعضاء المنتدى الكرام

اشتريت عربيه لانوس ١ موديل ٢٠٠٠ لاخويا
فابريكا بره و جوه عامله ٢٠٥ الف كيلو

العربيه فيها بعض الصدأ ناحيه البابان من تحت بسيط و ناحيه الشبكه الاماميه من الداخل

دول حلهم ايه ؟! و مش عاوز اهين دواخل العربيه و عاوز اخلص من الصدأ دا

تاني حاجه العربيه كعفشه و ميكانيكا و تكييف كويسه .

لكن سؤالى دلوقتى ايه الخطوات اللى تتعمل على طول بعد شراء العربية

اول حاجه رحت عملتها غيرت فلتر زيت اصلى ب ٢٥ جنيه و زيت شيل ٥ الالاف كيلو ب ١٥٠ جنيه

الزيت اللى فيها نزل محروق خالص و الراجل قالى الكارتيره بتجيب زيت و لازم تتعمل

و بيقولى معمول لها جوان و المفروض بيتعمل لها سيلكون عضم مش جوان

و قالى الزيت دا كده اغسل بيه الموتور و ابقي نزله و حط ال ١٠ الالاف علشان صاحب العربيه مهمل

و غيرت فلتر الهوا طالع لونه اسووووود خالص بواحد كورى ب ٣٥ جنيه

زودت زيت الفرامل بزيت bp . الربع ب ١٥ جنيه

دلوقتي ايه المفروض يتعمل بالترتيب ؟!!

عاوز الصح يتعمل ايه علشان العربيه مش هيغيرها قبل سنتين تلاته

ايه السيور اللى تتغير ؟! اعمل سكان كمبيوتر ولا ؟!

مياه التبريد اعمل فيها ايه ؟! اغيرها و احط مياه خضرا او حمرا

ياريت لو حد يعرف مكان محترم للانوس و تكون اسعاره كويسه

صراحه شوفت كام موضوع لاستاذ عصام و حاجه ممتازه جدا تسلم ايده بجد

**a_mohamedsamir** · 07-04-2014 08:02 AM

أولا ألف مبروك
ثانيا طالما ان اللى باع لك العربيه مهمل يبقى تغير الآتى
طقم سيو تقسيمه ، تكييف ،باور
والفضل تغير البلى كمان.
بوجيهات جديده هات NGK اللى كودها bpr6es
ولو سلوك البوجيهات تعبانه هات طقم جديد
و حتعمل غسيل لدورة التبريد وتحط مياه خضراء
وإنشاء الله كله يبقى تمام

**amirock** · 07-04-2014 08:03 AM

غير سير الدينامو و التكييف و التقسيمة و شيك علي البيل وغير فلتر البنزين و البوحيهات

**Trondo** · 07-04-2014 08:17 AM

تمام كده

يبقى التلات سيور اغيرهم دينامو و تقسيمه و تكييف

واغير البوجيهات و اجيب ال ngk

اغير مياه التبريد و احط مياه خضرا

موضوع زيت الباور و الفرامل و الفتيس ... لازم اغيره ولا يتزود

حد عنده فكره عن خرابيش الازاز اللى قدامه مطرح المساحه ... لها علاج ولا

موضوع الصدأ اللى فى الباب و الكبوت اصوره احسن الناس تشوفه ؟!

شاكر جدا لتعاونكم ياشباب

**a_mohamedsamir** · 07-04-2014 08:23 AM

زيت الفرامل الافضل تغيره كله
الباور والفتيس فيهم وجهتين نظر
الاولى بتقول تغيرهم كل فتره مثلا سنتين
والثانيه بتقول زودهم بس مش محتاجين تغيير
و انا مع الراى الاول لان الزيوت مع الوقت والاستخدام اكيد بتفقد جزء من خواصها

**Ahmed-SAMIR** · 07-04-2014 10:37 AM

الاساسيات مفيش فيها كلام تانى بعد كلام الرجالة جابولك من الاخر انما بالنسبة للزيت ماتغيرش زيت 10000 ما دام موتورك معدى 100000 كيلو حسب ما اتعلمت من الناس هنا فى المنتدى
وربنا يباركلك فيها

**Abo Yasso** · 07-04-2014 10:56 AM

المشاركة الأصلية كتبت بواسطة trondo

تمام كده

يبقى التلات سيور اغيرهم دينامو و تقسيمه و تكييف

وطرمبه المياه

واغير البوجيهات و اجيب ال ngk

اغير مياه التبريد و احط مياه خضرا

اهم حاجه هنا انك تكبس الدوره لآنه لو كان بيحط مياه عاديه هتلاقى الصدا جو المواسير عامل حكايات

موضوع زيت الباور و الفرامل و الفتيس ... لازم اغيره ولا يتزود

حد عنده فكره عن خرابيش الازاز اللى قدامه مطرح المساحه ... لها علاج ولا

موضوع الصدأ اللى فى الباب و الكبوت اصوره احسن الناس تشوفه ؟!

شاكر جدا لتعاونكم ياشباب

الزيت هاتو فيسكو 5000 فوق الممتاز

**تامر.محمد** · 07-04-2014 12:31 PM

غير الزيوت دي احسن طالما صاحب العربية السابق كان مهمل

ما تنساش تتمم على ظبط الهوا و الترصيص و الزوايا , و بالمرة حد يبص لك على الكاوتش يقول لك حالته ايه بالظبط